ଥୁଆମୂଳ ରାମପୁର, ୩୧।୧ (ଦୁର୍ଗା କୀର୍ତ୍ତି): ପେଟର ଭୋକ ଆଉ ପରିବାର ପ୍ରତିପୋଷଣର ଚିନ୍ତା ଜଣେ ଗରିବ ଯୁବକଙ୍କୁ ସୁଦୂର କେରଳକୁ ଟାଣି ନେଇଥିଲା। କିନ୍ତୁ ସେହି ଦାଦନ ଖଟିବା ଆଜି ଏକ ପରିବାର ପାଇଁ ଅଭିଶାପ ସାଜିଛି। କଳାହାଣ୍ଡି ଜିଲା ଥୁଆମୂଳ ରାମପୁର ଥାନା ଅନ୍ତର୍ଗତ ରାଣିଦୁମେର ଗ୍ରାମର ରଥ ଗୌଡ଼(୨୨) ନାମକ ଜଣେ ଯୁବକ ଗତ ଅକ୍ଟୋବର ୭ ତାରିଖରୁ କେରଳର ଆଲୁଭା (Aluva) ରେଳ ଷ୍ଟେଶନରୁ ନିଖୋଜ ହୋଇଥିବା ବେଳେ ଆଜି ପର୍ଯ୍ୟନ୍ତ ତାଙ୍କର କୌଣସି ପତ୍ତା ମିଳୁନାହିଁ।
ପ୍ରାପ୍ତ ସୂଚନା ଅନୁଯାୟୀ, ରଥ ଗୌଡ଼ କେରଳରୁ ନିଜ ଗାଁକୁ ଫେରିବା ସମୟରେ ଫୋନ କରି ସ୍ତ୍ରୀ ଲଳିତାଙ୍କୁ କହିଥିଲେ, “ମୁଁ ଘରକୁ ଆସୁଛି”। କିନ୍ତୁ ସେହି କଥା ହିଁ ଶେଷ କଥା ଥିଲା। ଏହା ପରଠାରୁ ତାଙ୍କର ମୋବାଇଲ ବନ୍ଦ ହୋଇଯାଇଥିଲା। ପ୍ରାୟ ୪ ମାସ ବିତିଯାଇଥିଲେ ମଧ୍ୟ ସେ ଘରକୁ ଫେରିନାହାନ୍ତି। ଏହି ଘଟଣାରେ ଅଧିକ ଚିନ୍ତାଜନକ ବିଷୟ ହେଉଛି ଯେ, ରଥଙ୍କ ନିଖୋଜ ହେବାର କିଛି ସମୟ ପରେ ଜଣେ ବ୍ୟକ୍ତି (ଯିଏ ନିଜକୁ ଦୀଲିପ ଦୁଆରା ବୋଲି ପରିଚୟ ଦେଉଛନ୍ତି) ପରିବାରଲୋକଙ୍କୁ ଫୋନ କରି ଟଙ୍କା ମାଗୁଛି। ପ୍ରଥମେ ୫ ହଜାର ଏବଂ ପରେ ୫୦ ହଜାର ଟଙ୍କା ଦାବି କରିବା ସହ, ଟଙ୍କା ନଦେଲେ ରଥଙ୍କୁ ଜୀବନରୁ ମାରିଦେଇ ତାଙ୍କ ଶରୀରର ଅଙ୍ଗପ୍ରତ୍ୟଙ୍ଗ ବିକ୍ରି କରିଦେବାକୁ ଧମକ ଦେଉଛି। ଏହି ଫୋନ କଲ ପରେ ପରିବାରଲୋକେ ସମ୍ପୂର୍ଣ୍ଣ ଭୟଭୀତ ହୋଇପଡ଼ିଛନ୍ତି।
ନ୍ୟାୟ ପାଇଁ ପରିବାର ଲୋକେ ଦ୍ୱାର ଦ୍ୱାର ବୁଲୁଛନ୍ତି:
* ଅକ୍ଟୋବର ୧୦, ୨୦୨୫: ଥୁଆମୂଳ ରାମପୁର ଥାନାରେ ପ୍ରଥମେ ଲିଖିତ ଅଭିଯୋଗ।
* ଅକ୍ଟୋବର ୧୭, ୨୦୨୫: ଜିଲ୍ଲା ଆରକ୍ଷୀ ଅଧୀକ୍ଷକ (SP) ଙ୍କୁ ଗୁହାରି।
* ନଭେମ୍ବର ୩, ୨୦୨୫: କଳାହାଣ୍ଡି ଜିଲାପାଳଙ୍କ ଅଭିଯୋଗ ଶୁଣାଣିରେ ଦରଖାସ୍ତ।
ଏତେ ସବୁ ପରେ ମଧ୍ୟ ପୋଲିସ କିମ୍ବା ପ୍ରଶାସନ ପକ୍ଷରୁ କୌଣସି ଆଖିଦୃଶିଆ ପଦକ୍ଷେପ ନିଆଯାଇ ନ ଥିବା ପରିବାର ପକ୍ଷରୁ ଅଭିଯୋଗ ହୋଇଛି। ଗରିବ ପରିବାରଟି ଆଜି ଅସହାୟ ଅବସ୍ଥାରେ ଦିନ କାଟୁଛି। ଘରେ ବୃଦ୍ଧ ବାପା କାଳିଆମଣି ଗୌଡ଼, ମାଆ ନେପୁରା ଏବଂ ସ୍ତ୍ରୀ ଲଳିତାଙ୍କ ଆଖିରୁ ଲୁହ ଶୁଖୁନାହିଁ। ସବୁଠାରୁ ଦୁଃଖଦ ବିଷୟ ହେଉଛି ରଥଙ୍କର ୬ ମାସର ଏକ ଛୋଟ ପୁଅ ଅଛି, ଯିଏ ନିଜ ବାପାଙ୍କୁ ଚିହ୍ନିବା ପୂର୍ବରୁ ହିଁ ଅନାଥ ହେବାକୁ ବସିଛି।
ରାଜ୍ୟରେ କାମଧନ୍ଦାର ଅଭାବ ଯୋଗୁ ଶିକ୍ଷିତ ବେରୋଜଗାର ଓ ଗରିବ ଶ୍ରମିକମାନେ ବାହାର ରାଜ୍ୟକୁ ଦାଦନ ଖଟିବାକୁ ଯାଇ ଏଭଳି ଅଭାବନୀୟ ପରିସ୍ଥିତିର ଶିକାର ହେଉଛନ୍ତି। ଏହି ଘଟଣା ରାଜ୍ୟ ସରକାରଙ୍କ ଦାଦନ ନିୟନ୍ତ୍ରଣ ବ୍ୟବସ୍ଥାର ବିଫଳତାକୁ ପଦାରେ ପକାଇଛି। ରଥ ଗୌଡ଼ ଜୀବିତ କି ମୃତ, ତାହା ଅତିଶୀଘ୍ର ସ୍ପଷ୍ଟ କରିବା ସହ ତାଙ୍କୁ ଉଦ୍ଧାର କରିବା ପାଇଁ ଅଞ୍ଚଳବାସୀ ଓ ପରିବାରଲୋକେ ପ୍ରଶାସନ ନିକଟରେ କାକୁତି ମିନତି କରୁଥିବା ଜଣାପଡିଛି।
Dharitri – Odisha’s No.1 Odia Daily