ବୀରମହାରାଜପୁର,୨୬।୧୨, (ଯୁଗଳ କିଶୋର ମିଶ୍ର): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ହିଲୁଙ୍ଗ ପଞ୍ଚାୟତ ଲୁଚାବନ୍ଦ ପାଖରେ ଗୁରୁବାର ସା ପ୍ରାୟ ୭ଟା୩୦ରେ ଏକ ଅଜଣା ଗାଡ଼ି ଧକ୍କାରେ ଜଣେ ଯୁବକଙ୍କ ମୃତ୍ୟୁ ଘଟିଛି। ମିଳିଥିବା ସୂଚନା ଅନୁସାରେ ମେଣ୍ଡାମାଳ ଗାଁର ଲବ ସେଠୀଙ୍କ ପୁଅ ସୁରେନ ସେଠୀ ବସ୍ତାରେ ଧାନ ଭରିବାକୁ ଯାଉଥିଲେ। ଅପର ପଟରୁ ଏକ ଅଜଣା ବୋଲେରୋ ସୁରେନକୁ ଧକ୍କା ଦେଇ ଫେରାର ମାରିଥିଲା। ଖବର ପାଇ ପରିବାର ଲୋକେ ସୁରେନଙ୍କୁ ଗୁରୁତର ଅବସ୍ଥାରେ ବୀରମହାରାଜପୁର ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରେ ତାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ସୁବର୍ଣ୍ଣପୁର ଜିଲା ସଦରମହକୁମାକୁ ସ୍ଥାନାନ୍ତରିତ କରାଯାଇଥିଲା। ଚିକିତ୍ସାଧିନ ଅବସ୍ଥାରେ ସୁରେନଙ୍କ ମୃତ୍ୟୁ ଘଟିଥିଲା। ମୃତ୍ୟୁ ବେଳକୁ ସୁରେନଙ୍କୁ ୩୪ ବର୍ଷ ହୋଇଥିଲା। ଶୁକ୍ରବାର ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା। ସୋନପୁରରୁ ଶୁକ୍ରବାର ପ୍ରାୟ ଦିନ ଗୋଟାଏରେ ବୀରମହାରାଜପୁରକୁ ମୃତଦେହ ପହଞ୍ଚିବାପରେ ବୀରମହାରାଜପୁର ମୁଖ୍ୟ ଛକଠାରେ ମୃତଦେହ ରଖି ସୁରେନ ପରିବାରକୁ ଉଚିତ କ୍ଷତିପୂରଣ ଦାବି କରି ଶତାଧିକ ଲୋକ ରାସ୍ତା ଅବରୋଧ କରିଥିଲେ। ଫଳରେ ଉଭୟ ପଟେ ଅନେକ ଗାଡ଼ି ଛିଡ଼ା ହୋଇଥିବା ଦେଖିବାକୁ ମିଳିଛି। ଖବର ପାଇ ବୀରମହାରାଜପୁର ଥାନା ଅଧିକାରୀ ସାରଙ୍ଗ ଧର ପାଣିଗ୍ରାହୀ, ତହସିଲଦାର ସୁଚିସ୍ମୀତା ପାଣିଗ୍ରାହୀ, ପୋଲିସ ଏସ ଆଇ ସୀତା ସେଠୀ ଓ ଅନ୍ୟାନ୍ୟ ପୋଲିସ କର୍ମଚାରୀ ଆନ୍ଦୋଳନ କାରିଗରୀଙ୍କ ସହିତ ଆଲୋଚନା କରି ମୃତକଙ୍କ ପରିବାରକୁ ୧୫ ହଜାର ନଗଦ ଟଙ୍କା ଦେବା ସହିତ ଶନିବାର ସା ପର୍ଯ୍ୟନ୍ତ ଦୁର୍ଘଟଣା ଘଟାଇଥିବା ଗାଡ଼ି ନମ୍ବର ଜଣାପଡ଼ିବ ଓ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା। ସୁରେନ ଜଣେ ଦିନ ମଜୁରୀଆ ଭାବରେ କାର୍ଯ୍ୟ କରି ପରିବାର ପୋଷଣ କରୁଥିଲେ। ସେ ତାଙ୍କ ପଛରେ ବୃଦ୍ଧ ମାଆବାପା, ସ୍ତ୍ରୀ ରିତା, ଦୁଇ ପୁଅ, ଦୁଇଭାଇ ବିରେନ ଓ କିରଣଙ୍କୁ ପଛରେ ଛାଡି ଯାଇଛନ୍ତି। ଏଣୁ ଉଚିତ କ୍ଷତିପୂରଣ ଦାବିରେ ଅଟଳ ରହିଛନ୍ତି ଆନ୍ଦୋଳନ ଜାରି। ଆଜିର ଆନ୍ଦୋଳନରେ ଜିଲା ପରିଷଦ ସଦସ୍ୟ ଲବ କୁମାର ସାହୁ, କଂଗ୍ରେସ ଯୁବ ନେତା ପ୍ରୀୟବ୍ରତ ସାହୁ, ସାମନ୍ତ ପାତ୍ର, କଂଗ୍ରେସ ଯୁବ ନେତା ସୁରେଶ ପଣ୍ଡାଙ୍କ ସମେତ ମେଣ୍ଡାମାଳ ଗ୍ରାମବାସୀ ଓ ଅନ୍ୟ ମାନେ ସାମିଲ ହୋଇଥିଲେ।
Dharitri – The Largest & Most Trusted Odia Daily
