ଢେଙ୍କାନାଳ ଅଫିସ, ୨୯।୧୨: ଢେଙ୍କାନାଳ ସହର ପୂର୍ତ୍ତ ବିଭାଗ କାର୍ଯ୍ୟାଳୟ ସମ୍ମୁଖରେ ବୁଧବାର ସନ୍ଧ୍ୟା ପ୍ରାୟ ୬ଟାରେ ଯୁବ ବିଜେଡି ନେତା ତଥା କାମାକ୍ଷାନଗର ଅଞ୍ଚଳର କାହ୍ନୁଚରଣ ସାହୁ (୪୦)ଙ୍କ ଉପରକୁ ଗୁଳିମାଡ଼ ହୋଇଛି। ଏଥିରୁ ସେ ଅଳ୍ପକେ ବର୍ତ୍ତିଯାଇଥିବାବେଳେ ଦୁର୍ବୃତ୍ତମାନେ ତାଙ୍କ ନାଲି ରଙ୍ଗର କାର୍ (ନଂ. ଓଡ଼ି ୦୨ ବିବି ୨୯୧୫) ନେଇ ଫେରାର ହୋଇଯାଇଛନ୍ତି। ଜନଗହଳିପୂର୍ଣ୍ଣ ସ୍ଥାନରେ ଅଭିଯୁକ୍ତଙ୍କ ଏଭଳି ଆତଙ୍କରାଜ ଆଲୋଡ଼ନ ସୃଷ୍ଟି କରିଛି।
କାହ୍ନୁ କୌଣସି କାର୍ଯ୍ୟରେ ଢେଙ୍କାନାଳ ପୂର୍ତ୍ତ ବିଭାଗ କାର୍ଯ୍ୟାଳୟକୁ ଆସିଥିଲେ। କାମ ସାରି ବାହାରିବା ବେଳେ ୫ଜଣ ମୁଖାଧାରୀ ଦୁର୍ବୃତ୍ତ ତାଙ୍କୁ ଅପହରଣ କରିନେବାକୁ ଉଦ୍ୟମ କରିଥିଲେ। ତେବେ ଧସ୍ତାଧସ୍ତି ମଧ୍ୟରେ କାହ୍ନୁ ଅଭିଯୁକ୍ତଙ୍କ କବଳରୁ ଖସିଯାଇ ପୁନର୍ବାର କାର୍ଯ୍ୟାଳୟ ଭିତରକୁ ପଶିଯାଇଥିଲେ। ଏହି ସମୟରେ ଦୁର୍ବୃତ୍ତମାନେ ତାଙ୍କ ଉପରକୁ ଗୋଟିଏ ରାଉଣ୍ଡ ଗୁଳିମାଡ଼ କରିଥିଲେ। ତେବେ ଏଥିରୁ ସେ ବର୍ତ୍ତିଯାଇଥିଲେ। ଘଟଣା ସମ୍ପର୍କରେ ସେ ଫୋନ୍ ଯୋଗେ ସୂଚନା ଦେବା ପରେ ଟାଉନ ଥାନା ପୋଲିସ ପହଞ୍ଚତ୍ ତାଙ୍କୁ ସୁରକ୍ଷିତ ଭାବେ ଉଦ୍ଧାର କରି ଥାନାକୁ ନେଇଥିଲା। ସେତେବେଳକୁ ମୁଖାଧାରୀମାନେ କାହ୍ନୁଙ୍କ କାର୍ ଧରି ଚମ୍ପଟ ମାରିସାରିଥିଲେ। ଏସ୍ପି ଲୋଗାନ୍ୟାଗୀ ଦିବ୍ୟା ଭି. ଟାଉନ ଥାନାକୁ ଆସି ସ୍ଥିତି ଅନୁଧ୍ୟାନ କରିଛନ୍ତି। ଘଟଣାସ୍ଥଳରୁ ଖୋକା ଜବତ କରାଯାଇଛି। ଅଭିଯୁକ୍ତଙ୍କୁ ଧରିବାକୁ ପୋଲିସ କାହ୍ନୁଙ୍କ ସହ ବିଭିନ୍ନ ସ୍ଥାନରେ ଚଢ଼ାଉ କରିଥିଲା। ତେବେ କେହି ଗିରଫ ହୋଇନାହାନ୍ତି। ରାତି ପ୍ରାୟ ୧୦ଟାରେ କାହ୍ନୁଙ୍କ ଅଭିଯୋଗକ୍ରମେ ଟାଉନ ଥାନାରେ ନଂ. ୭୧୦/୨୨ରେ ମାମଲା ରୁଜୁ ହୋଇଛି।
୨ ମାସ ମଧ୍ୟରେ କାହ୍ନୁଙ୍କ ଉପରେ ଏହା ହେଉଛି ଦ୍ୱିତୀୟ ଥର ଆକ୍ରମଣ। ଏଥିପୂର୍ବରୁ ଗତ ଅକ୍ଟୋବର ୧୮ରେ ତାଙ୍କ ଘର ଉପରକୁ ବୋମାମାଡ଼ ହୋଇଥିଲା। ଏହି ଘଟଣାରେ ଅଦ୍ୟାବଧି କାହାରିକୁ ଗିରଫ କରାଯାଇନାହିଁ। ଏ ସଂକ୍ରାନ୍ତରେ କାହ୍ନୁ ନିଜ ପ୍ରତିକ୍ରିୟାରେ କୁହନ୍ତି, ତାଙ୍କର କାହା ସହିତ ରାଜନୈତିକ କି ବ୍ୟବସାୟିକ ଶତ୍ରୁତା ନାହିଁ। ତଥାପି ଦୁଇଥର ଆକ୍ରମଣ ହେଲାଣି। ଏହାର ତଦନ୍ତ କରି ସତ୍ୟାସତ୍ୟ ଉନ୍ମୋଚନ କରିବାକୁ ସେ ଦାବି କରିଛନ୍ତି।
