ଵ୍ରହ୍ମପୁର, ୪/୨(ସୁବାସ ଚନ୍ଦ୍ର ପାଢ଼ୀ): ଗଞ୍ଜାମ ଜିଲା କବିସୂର୍ଯ୍ୟନଗର ଥାନା ଅନ୍ତର୍ଗତ ଗୁଡିଆପାଳି ଛକ ନିକଟରେ ଯୁବକଙ୍କୁ ସଂଘବଦ୍ଧ ଭାବେ ମରଣାନ୍ତକ ଆକ୍ରମଣ ହୋଇଛି । ଗୁରୁତର ଯୁବକ ହେଲେ ଗୁଡ଼ିଆଳିର ବାବୁଲା ସ୍ୱାଇଁ(୨୪)। ତାଙ୍କ ଶରୀରରେ ବିଭିନ୍ନ ସ୍ଥାନରେ ଖଣ୍ଡାଚୋଟ ପଡିଛି । ଆହତଙ୍କୁ ଉଦ୍ଧାର କରି ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ପୋଲିସ ତାଙ୍କ ବୟାନ ରେକର୍ଡ କରିଛି। ସେ ଏବେ ଏମକେସିଜି ମେଡିକାଲରେ ଭର୍ତ୍ତି ହୋଇଥିବା ବେଳେ ପୋଲିସ ଘଟଣାର ଖବର ପାଇ ସେଠାରେ ପହଞ୍ଚି ତଦନ୍ତ କରୁଛି ।
ପୂର୍ବ ଶତ୍ରୁତାରୁ ବାବୁଲାଙ୍କୁ ଅପରାଧୀ ଗୋଷ୍ଟି ଖଣ୍ଡାରେ ଆକ୍ରମଣ କରିଥିବା ପ୍ରାଥମିକ ତଦନ୍ତରୁ ପୋଲିସ ସନ୍ଦେହ କରୁଛି । ସିସିଟିଭି ଯାଞ୍ଚ କରିବା ସହ ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ବିଭିନ୍ନ ସ୍ଥାନରେ ଚଢାଉ କରୁଛି । ଘଟଣାରୁ ପ୍ରକାଶ ଯେ, ବାବୁଲା ବୁଧବାର ଅପରାହ୍ନରେ ତାଙ୍କର ସାଙ୍ଗ ସହ ଘରକୁ ଫେରୁଥିଲେ। ଦୁଇଟି ବାଇକରେ ୪ଜଣ ଯୁବକ ତାଙ୍କୁ ପିଛା କରି ଗୁଡ଼ିଆଳି ନିକଟ ଆଇଟିଆଇ ଛକରେ ତାଙ୍କ ବାଇକକୁ ପଛପଟୁ ଧକ୍କା ଦେଇଥିଲେ। ପଛରେ ବସିଥିବା ବାବୁଲା ବାଇକରୁ ଖସି ତଳେ ପଢିଯାଇଥିଲେ। ସେ କିଛି ବୁଝିବା ପୂର୍ବରୁ ଅପରାଧୀ ଗୋଷ୍ଠୀର ଯୁବକମାନେ ତାଙ୍କୁ ମରଣାନ୍ତକ ଆକ୍ରମଣ କରିଥିଲେ। ବାବୁଲାଙ୍କୁ ଛାଡି ଭୟଭୀତ ହୋଇ ତାଙ୍କ ସାଙ୍ଗ ବାଇକ ଧରି ସେଠାରୁ ଚାଲିଯାଇଥିବା ପୋଲିସ କହିଛି । କବିସୂର୍ଯ୍ୟନଗର ଥାନା ଗୁଡିଆଳି ଛକ ନିକଟରେ ଯୁବକକୁ ଖଣ୍ଡାରେ ହାଣି ସଂଘବଦ୍ଧ ଆକ୍ରମଣ ହୋଇଛି । ଜମିଜମା ବିବାଦରୁ ଆକ୍ରମଣ ହୋଇଥିବା ସୂଚନା ମିଳିଛି ।
