ରାୟଗଡା, (ଆଶିଷ ରଞ୍ଜନ ପଣ୍ଡା): ଧାନବାଦ-ଆଲେପୀ ଏକ୍ସପ୍ରେସ ଟ୍ରେନରେ ଯାତ୍ରା କରୁଥିବା ଜଣେ ଯୁବତୀ ରାୟଗଡା ରେଳ ଷ୍ଟେଶନରୁ ନିଖୋଜ ହୋଇଥିବା ନେଇ ରାୟଗଡା ଜିଆରପିଏସ ଥାନାରେ ସୋମବାର ନିଖୋଜ ଯୁବତୀଙ୍କ ପରିବାର ପକ୍ଷରୁ ଏକ ଏତଲା ଦିଆଯାଇଥିବା ପୋଲିସ ସୂତ୍ରରୁ ଜଣାପଡିଛି । ନିଖୋଜ ଯୁବତୀ ଜଣଙ୍କ ହେଲେ ଓଡ଼ିଶାର ବଲାଙ୍ଗିର ଜିଲା ତୁରେଇକେଲା ଥାନା ଅନ୍ତର୍ଗତ ମାନ୍ଦଳା ଗ୍ରାମର ସ୍ବର୍ଗତ ସତ୍ୟ ସାହୁ ଓ ସତ୍ୟଭାମା ସାହୁଙ୍କ ୨୦ବର୍ଷିୟ ଝିଅ କସ୍ତୁରୀ । ଏ ନେଇ କସ୍ତୁରୀର ବଡ ଭାଇ ଉପେନ୍ଦ୍ର ସାହୁ ଆଜି ରାୟଗଡା ସରକାରୀ ରେଳବାଇ ପୋଲିସ (ଜିଆରପି) ଥାନାରେ ଦେଇଥିବା ଏତଲାରେ ଉଲ୍ଲେଖ କରିଛନ୍ତି ଯେ,ଗତ ଜାନୁଆରୀ ମାସ ୧୧/୧୨ତାରିଖ ରାତ୍ରରେ ତାଙ୍କ ମା’ ସତ୍ୟଭାମା,ଭଉଣୀ କସ୍ତୁରୀ ଓ ଭାଇ ଲିଙ୍ଗରାଜ ତିନିଜଣ ଆନ୍ଧ୍ର ପ୍ରଦେଶର ଗୁଂଟୁର ରେଳ ଷ୍ଟେଶନରୁ ଧାନବାଦ -ଆଲେପି ଏକ୍ସପ୍ରେସ ଟ୍ରେନରେ ଟିଟିଲାଗଡ ଅଭିମୁଖେ ଯାତ୍ରା କରୁଥିଲେ। ଟ୍ରେନଟି ଯେତେବେଳେ ରାୟଗଡା ରେଳ ଷ୍ଟେଶନରେ ପଂହଚିଥିଲା। ତାଙ୍କ ଭଉଣୀ ଉକ୍ତ ବଗିରେ ନ ଥିବା ମା ସତ୍ୟଭାମା ଦେଖିବାକୁ ପାଇ ଟ୍ରେନର ସମସ୍ତ ବଗିରେ ଏବଂ ଷ୍ଟେଶନରେ ମଧ୍ୟ ଖୋଜାଖୋଜି କରିଥିଲେ । କିନ୍ତୁ ଭଉଣୀର କୌଣସି ପତା ମିଳି ନ ଥିଲା । ଉକ୍ତ ଦିନ କସୁରୀ ସବୁଜ ରଙ୍ଗର ଶାଲୱାର ସୁଟ ପିନ୍ଧିଥିବା ବେଳେ ତାଙ୍କ ଉଚ୍ଚତା ପ୍ରାୟ ୫ଫୁଟ ,ମଧ୍ୟମ ଶରୀର ସହ ତାଙ୍କ ରଙ୍ଗ କଳା ହୋଇଥିବା ଦର୍ଶାଇଛନ୍ତି । ଦୀର୍ଘ ୨୯ଦିନର ଖୋଜାଖୋଜି ପରେ ମଧ୍ୟ କସ୍ତୁରୀର କୈାଣସି ଖୋଜଖବର ନ ମିଳିବାରୁ ଆଜି ରାୟଗଡା ଜିଆରପି ଥାନାରେ ଏ ନେଇ ଭଉଣୀ ନିଖୋଜ ହୋଇଥିବା ନେଇ ଏତଲା ଦାୟର କଲୁ ବୋଲି ଉଲ୍ଳେଖ ରହିଛି । ଘଟଣାକୁ ନେଇ ଜିଆରପିଏସ ଥାନା ଆଇଆଇସି ବିନୟ ପ୍ରକାଶ ମିଂଜଙ୍କ ନିର୍ଦ୍ଦେଶ କ୍ରମେ ଏଏସଆଇ ରମାକାନ୍ତ ଦାଶ ତଦନ୍ତ କରୁଛନ୍ତି ।
