ଜାକର୍ତ୍ତା,୮ା୧: ଜକର୍ତ୍ତାଠାରେ ଚାଲିଥିବା ଏସିଆନ କ୍ୱାଲିଫାୟର୍ସ ୧୦ ମିଟର ମହିଳା ଏବଂ ପୁରୁଷ ଏୟାର ପିସ୍ତଲ ଇଭେଣ୍ଟରେ ଭାରତର ଯୁବ ଶୁଟର ବରୁଣ ତୋମାର ଓ ଇଶା ସିଂ ସ୍ବର୍ଣ୍ଣ ପଦକ ସହ ଅଲିମ୍ପିକ କୋଟା ହାସଲ କରିଛନ୍ତି। ଏହି ଦୁଇଜଣଙ୍କ ପରେ ପ୍ୟାରିସ ପାଇଁ ଯୋଗ୍ୟତା ହାସଲ କରିଥିବା ଶୁଟରମାନଙ୍କ ସଂଖ୍ୟା ୧୫ରେ ପହଞ୍ଚିଛି।
ଅବଶିଷ୍ଟ କ୍ୱାଲିଫାୟର୍ସରୁ ଭାରତର ଅନ୍ୟ କେତେଜଣ ଜୁଲାଇ-ଅଗଷ୍ଟ ଗେମ୍ସ ପାଇଁ ଯୋଗ୍ୟତା ଅର୍ଜନ କରିବାର ସମ୍ଭାବନା ରହିଛି। କଣ୍ଟିନେଣ୍ଟାଲ ଇଭେଣ୍ଟରେ ଭାରତ ସୋମବାର ଦୁଇ ସ୍ବର୍ଣ୍ଣ ସମେତ ୬ ପଦକ ହାସଲ କରିଛି। ୨୦ ବର୍ଷୀୟ ତୋମାର ଫାଇନାଲରେ ୨୩୯.୬ ଶଟ୍ ସହ ପ୍ରଥମ ସ୍ଥାନ ଅଧିକାର କରିଥିବା ବେଳେ ଅରୁଣ ଚିମା ୨୩୭.୩ ସ୍କୋର ସହ ରୌପ୍ୟ ଏବଂ ମଙ୍ଗୋଲିଆର ଦାଭାଖୁ ଏଙ୍କଥାଇଭାନ (୨୧୭.୨) ବ୍ରୋଞ୍ଜ ଜିତିଥିଲେ। ପୂର୍ବରୁ ତୋମାର (୫୮୬), ଚିମା (୫୭୫) ଓ ଉଜାଓ୍ବାଲ ମଲିକ (୫୭୫) ମୋଟ ୧୭୪୦ ସ୍କୋର କରି ୧୦ ମିଟର ଏୟାର ପିସ୍ତଲ ଟିମ୍ ସ୍ବର୍ଣ୍ଣ ଜିତିଥିଲେ। ତୋମାର ହେଉଛନ୍ତି ଟୋକିଓ ଅଲିମ୍ପିଆନ ସୌରଭ ଚୌଧାରୀଙ୍କ ସମ୍ପର୍କୀୟ ଭାଇ, ଯଏକି ୨୦୧୮ ଏସିଆନ ଗେମ୍ସରେ ଏକ ସ୍ବର୍ଣ୍ଣ ପଦକ ଲାଭ କରିଥିଲେ। ୧୯ ବର୍ଷୀୟା ଇଶା ମହିଳା ଇଭେଣ୍ଟରେ ୨୪୩.୧ ସ୍କୋର ସହ ସ୍ବର୍ଣ୍ଣ ପଦକ ହାସଲ କରିଥିଲେ। ପାକିସ୍ତାନର କିସ୍ମାଲା ତଲତ (୨୩୬.୩) ରୌପ୍ୟ ପଦକ ହାସଲ କରିଥିବା ବେଳେ ଭାରତର ଅନ୍ୟ ଜଣେ ରିଦିମ ସାଙ୍ଗଓ୍ବାନ (୨୧୪.୫) ବ୍ରୋଞ୍ଜ ପଦକ ପାଇଥିଲେ। ୨୧ ବର୍ଷୀୟା ତଲତ ମଧ୍ୟ ଅଲିମ୍ପିକ ଯୋଗ୍ୟତା ହାସଲ କରିଛନ୍ତି। ପାକିସ୍ତାନର ତୃତୀୟ ଶୁଟର ଭାବେ ସେ ଏହି ସଫଳତା ହାସଲ କରିଛନ୍ତି।
