ଭଞ୍ଜନଗର,୬।୯(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର କୃଷି ବିଜ୍ଞାନ କେନ୍ଦ୍ର ପକ୍ଷରୁ କୁକୁଡ଼ା ପାଳନ ଉପରେ ୫ ଦିନିଆ ଦକ୍ଷତା ବୃଦ୍ଧି ତାଲିମ ଶିବିର ଚାଲିଥିଲା। ତାହା ଉଦଯାପିତ ହୋଇଯାଇଛି। ଉକ୍ତ ତାଲିମ ଶିବିରରେ ଜିଲାର ବିଭିନ୍ନ ବ୍ଲକରୁ ୪୦ ଜଣ ଅଗ୍ରଣୀ ଚାଷୀ ଯୋଗ ଦେଇଥିଲେ। ଚାଷୀମାନଙ୍କୁ କୁକୁଡ଼ା ପାଳନର ବିଭିନ୍ନ ଦିଗ ଉପରେ ତାଲିମ ଦିଆ ଯାଇଥିଲା। ଅଣ୍ଡାରୁ ଚିଆଁ ଫୁଟାଇବା, ଦିନିକିଆ ଚିଆଁକୁ ବୃଡିଙ୍ଗ ଦ୍ୱାରା ବଡ କରିବା, ଉପଯୁକ୍ତ ଖାଦ୍ୟର ପ୍ରସ୍ତୁତି ତଥା ରୋଗ ନିରାକରଣ ଉପରେ ଏହି ତାଲିମରେ ବିଶେଷ ଭାବେ ଚାଷୀ ମାନଙ୍କୁ ଅବଗତ କରାଯାଇଥିଲା। ସରକାରଙ୍କ ଦ୍ୱାରା ପ୍ରଚଳିତ ବିଭିନ୍ନ ଜନ ଉପକାରୀ ଯୋଜନାରେ କିପରି ଭାବେ ନିଜକୁ ସାମିଲ କରି ଯୁବ ଚାଷୀ ମାନେ ଲାଭବାନ ହୋଇପାରିବେ ସେ ଉପରେ ସୂଚନା ମଧ୍ୟ ଦିଆଯାଇଥିଲା। ଚାଷୀ ମାନେ ନିଜ ହାତରେ ଅଣ୍ଡା ଫୁଟା ଯନ୍ତ୍ରର ପରିଚାଳନା, ଚିଆଁ ବୃଡିଙ୍ଗ ଓ ମୃତ ପକ୍ଷୀଙ୍କ ପୋଷ୍ଟମର୍ଟମ କରିବା ଶିଖିଥିଲେ। ଏହି ତାଲିମ ଦ୍ୱାରା ଚାଷୀମାନେ ନିଜର ଜ୍ଞାନ ଓ ଦକ୍ଷତା ବୃଦ୍ଧି ହେବା ସହ ସରକାରୀ ଯୋଜନା ବିଷୟରେ ଅବଗତ ହୋଇଥିବାରୁ ଖୁସି ପ୍ରକାଶ କରିଥିଲେ । ଆଗକୁ ଏପରି ଅଧିକ ତାଲିମ ଆଯୋଜନ କରିବା ପାଇଁ କୃଷି ବିଜ୍ଞାନ କେନ୍ଦ୍ର ଅଧିକାରୀଙ୍କୁ ଅନୁରୋଧ କରିଥିଲେ। କୃଷି ବିଜ୍ଞାନ କେନ୍ଦ୍ର ତରଫରୁ ପ୍ରାଣୀ ବୈଜ୍ଞାନିକ ଡା. ସିଦ୍ଧାର୍ଥ ରଣବିଜୁଳି ଏହି ତାଲିମ ପ୍ରଦାନ କରିଥିଲେ। କୃଷି ବିଜ୍ଞାନ କେନ୍ଦ୍ରର କର୍ମଚାରୀ ବନଜା ତ୍ରିପାଠୀ ଓ ପୂଜାରାଣୀ ବିଶୋଇ କାର୍ଯ୍ୟକ୍ରମକୁ ପରିଚାଳନା କରିବାରେ ସହାୟତା କରିଥିଲେ।
