ବୌଦ୍ଧ,୩୦ା୪(ଅଜିତ କୁମାର ବାରିକ): ଗତ ୨୭ ତାରିଖ ସନ୍ଧ୍ୟାରେ ସ୍ଥାନୀୟ ଜଗଦୀଶପୁର ଛକଠାରେ ରାସ୍ତା ମଝିରେ ବୌଦ୍ଧ ସହର ଗଣେଶ ବଜାରର ଯୁବ ବ୍ୟବସାୟୀ ମନୋଜ ପାତ୍ର ହତ୍ୟା ଘଟଣାରେ ଦୁଇ ଜଣ ଅଭିଯୁକ୍ତଙ୍କୁ ଗିରଫ କଲା ବୌଦ୍ଧ ପୋଲିସ। ଜଣେ ଅଭିଯୁକ୍ତ ଏବେ ମଧ୍ୟ ଫେରାର ଥିବା ଏସ୍ପି ଖବରଦାତା ସମିଳନୀରେ ସୂଚନା ଦେଇଛନ୍ତି। ଏଥିସହିତ ହତ୍ୟାକାଣ୍ଡର କାରଣ ସମ୍ପର୍କରେ ପର୍ଦ୍ଦାଫାଶ କରିଛନ୍ତି ଏସ୍ପି ରାହୁଲ ଗୋଏଲ। ଅଭିଯୁକ୍ତମାନେ ୩ ଜଣ ଗୋଟିଏ ସ୍କୁଟି ଯୋଗେ ଆସି ବ୍ୟବସାୟୀଙ୍କୁ ଟଙ୍କା ମାଗିଥିଲେ ଏବଂ ତାଙ୍କ ଗୋଦାମଠାରେ ବ୍ୟବସାୟୀଙ୍କଠାରୁ ଟଙ୍କା ଲୁଟ୍ ଉଦ୍ୟମ କରିଥିଲେ। ତେବେ ବ୍ୟବସାୟୀ ଜଣକ ନିକଟରେ ଟଙ୍କା ନ ମିଳିବାରୁ ତାଙ୍କୁ ବେକରେ ଏବଂ ଛାତିରେ ଛୁରି ଭୁସି ହତ୍ୟା କରିଥିଲେ ଦୁର୍ବୃତ୍ତ। ତେବେ ହତ୍ୟାକାଣ୍ଡରେ ୩ ଅଭିଯୁକ୍ତ ସାମିଲ ଥିବା ବେଳେ ସମସ୍ତ ଅଭିଯୁକ୍ତଙ୍କୁ ଚିହ୍ନଟ କରିଛି ପୋଲିସ। ୨ ଅଭିଯୁକ୍ତଙ୍କୁ ଗିରଫ କରିଛି ପୋଲିସ ଅନ୍ୟ ଜଣେ ଅଭିଯୁକ୍ତ ଏବେ ମଧ୍ୟ ଫେରାର ଥିବା ପୋଲିସ ସୂଚନା ଦେଇଛି। ତେବେ ଗିରଫ ଅଭିଯୁକ୍ତ ବୌଦ୍ଧ ସହର ବାପୁଜୀନଗର ଅଞ୍ଚଳର ୧୯ ବର୍ଷୀୟ ଆଶିଷ ଲୁହା ଓ ବଘିଆପଡ଼ା ଫାଣ୍ଡି ସାଲିବଙ୍କା ଗ୍ରାମର ୧୮ ବର୍ଷୀୟ ଆଶିନ ଦୀପ ବୋଲି ପୋଲିସ ସୂଚନା ଦେଇଛି । ତେବେ ହତ୍ୟାରେ ବ୍ୟବହୃତ ଛୁରି ସହିତ ଗୋଟିଏ ମୋବାଇଲ ଏବଂ ଗୋଟିଏ ସ୍କୁଟି ଜବତ କରିଛି ପୋଲିସ। ତେବେ ଅଭିଯୁକ୍ତମାନେ ନିଶାସକ୍ତ ଅବସ୍ଥାରେ ନଥିବା ବେଳେ ସବୁ ଜାଣି ଶୁଣି ହତ୍ୟା କରିଛନ୍ତି ଏବଂ ଟଙ୍କା ଲୁଟ୍ କରିବା ପାଇଁ ହି ଏହି ହତ୍ୟାକାଣ୍ଡ ଘଟିଛି ବୋଲି ଏସ୍ପି ସୂଚନା ଦେଇଛନ୍ତି। ତେବେ ହତ୍ୟାକାଣ୍ଡ ପରେ ଅଭିଯୁକ୍ତମାନେ ମାଉଲଶିଙ୍ଗା ନିକଟରେ ଥିବା ଜଙ୍ଗଲରେ ଲୁଚି ରହିଥିଲେ। ପୋଲିସ ଅଭିଯୁକ୍ତଙ୍କୁ ଖୋଜାଖୋଜି କରିଥିବା ବେଳେ ତାଙ୍କ ସେହି ଜଙ୍ଗଲରୁ ଗିରଫ କରି ପଚରାଉଚରା କରିବାରୁ ତାଙ୍କ ସହିତ ଆଉ ଜଣେ ଅଭିଯୁକ୍ତ ମଧ୍ୟ ଥିବା ସେମାନେ ପ୍ରକାଶ କରିଛନ୍ତି। ତେବେ ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରିବା ସହିତ ତାଙ୍କ ବୟାନ ଅନୁଯାୟୀ ଅନ୍ୟ ଅଭିଯୁକ୍ତଙ୍କୁ ଖୋଜିବାରେ ପୋଲିସ ପକ୍ଷରୁ ପ୍ରୟାସ ଜାରି ରହିଛି ବୋଲି ଏସ୍ପି ରାହୁଲ ଗୋଏଲ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
