ଦାରିଙ୍ଗବାଡ଼ି,୫ା୬(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବନାଞ୍ଚଳ କାର୍ଯ୍ୟାଳୟ ପରିସର ମଧ୍ୟରେ ଗୁରୁବାର ବିଶ୍ୱ ପରିବେଶ ଦିବସ ପାଳନ କରାଯାଇଛି। ଏହି ଅବସରରେ ବନାଞ୍ଚଳ ଅଧିକାରୀ ମାଧବ ଚନ୍ଦ୍ର ବେହେରାଙ୍କ ଅଧ୍ୟକ୍ଷତାରେ ଜାଗୃତି ସମ୍ପାଦକ କୈଳାସ ଚନ୍ଦ୍ର ଦଣ୍ଡପାଟ, ଏପିଓ କେଦାର ଚନ୍ଦ୍ର ପଣ୍ଡା,ବନପାଳ ସରୋଜ ମଙ୍ଗରାଜ, ବୁଡ଼ାଗୁଡା ବନପାଳ ମନ୍ମଥ ପରିଚ୍ଛା, ସିମନବାଡ଼ି ବନପାଳ ବନିତା ପ୍ରଧାନ ପ୍ରମୁଖ ଯୋଗଦେଇଥିଲେ। ଏହି ଅବସରରେ ପ୍ଲାଷ୍ଟିକ୍ ଫ୍ରି ସମ୍ପର୍କରେ ଏକ ଆଲୋଚନଚକ୍ର ଅନୁଷ୍ଠିତ ହୋଇଥିଲା। ବର୍ତ୍ତମାନ ସମୟରେ ଯେଉଁ ଭଳି ଭାବରେ ପ୍ଲାଷ୍ଟିକ ବ୍ୟବହାର ହେଉଛି ତାକୁ ନା’କରିବା ସମୟ ଆସିଯାଇଛି। ପ୍ଲାଷ୍ଟିକର ବିକଳ୍ପ ଭାବେ ଶାଳପତ୍ର ବ୍ୟବହାର କରିବାକୁ ଲୋକଙ୍କୁ ସଚେତନ କରିବା ସମ୍ପର୍କରେ ଆଲୋଚନା କରାଯାଇଥିଲା।
ସେହିପରି ଅଞ୍ଚଳରେ ପୋଡୁଚାଷ ଅଧିକ ହେଉଥିଲା। ୧୯୯୬ ପରଠାରୁ ଏହା ଧିରେ ଧିରେ କମିବାରେ ଲାଗିଛି। ଏହାକୁ ସମ୍ପୂର୍ଣ୍ଣ ବନ୍ଦ କରିବାକୁ ପଦକ୍ଷେପ ନେବା ଆବଶ୍ୟକ ବୋଲି ଜାଗୃତି ସମ୍ପାଦକ କୈଳାସ ଚନ୍ଦ୍ର ଦଣ୍ଡପାଟ କହିଥିଲେ। ଅନ୍ୟ ଜିଲା ଅପେକ୍ଷା କନ୍ଧମାଳ ଜିଲାରେ ଚଳିତ ବର୍ଷ ଜଙ୍ଗଲ ବୃଦ୍ଧି ପାଇଥିବା ସେ କହିଥିଲେ। ଦାରିଙ୍ଗବାଡ଼ି ପର୍ଯ୍ୟଟନକ୍ଷେତ୍ର ରହିଥିବା ବେଳେ ଦୈନିକ ଶହ ଶହ ପର୍ଯ୍ୟଟକ ଆସୁଛନ୍ତି ତେଣୁ ପ୍ଲାଷ୍ଟିକ ବ୍ୟବହାରକୁ ନା’କରିବାକୁ ସଚେତନ କରାଯିବାକୁ ଆଲୋଚନା କରାଯାଇଥିଲା। ସେହିପରି ଅଞ୍ଚଳରେ ସିଙ୍ଗଲ ୟୁଜ ପ୍ଲାଷ୍ଟିକ ବ୍ୟବହାରକୁ ରୋକିବା ଦିଗରେ ପଦକ୍ଷେପ ନେବାକୁ ଆଲୋଚନା ହୋଇଥିଲା। ବ୍ୟାପକ ପ୍ଲାଷ୍ଟିକ ବ୍ୟବହାର ଯୋଗୁ ବିଭିନ୍ନ ଭୟଙ୍କର ରୋଗ ସୃଷ୍ଟି ହେଉଥିବା କୁହାଯାଉଥିଲା। ତେଣୁ ପ୍ଲାଷ୍ଟିକ୍ ଫ୍ରି କରିବାକୁ କିଭଳି ଭାବେ ସମସ୍ତେ ପ୍ରୟାସ କରିବା ସହ ପରିବେଶକୁ ସୁରକ୍ଷା ଦେବାକୁ ଆଲୋଚନା କରାଯାଇଥିଲା।
ସେହିପରି ଜଙ୍ଗଲ ବଞ୍ଚିଲେ ପରିବେଶ ସୁନ୍ଦର ଓ ସ୍ବଚ୍ଛତା ରହିବ ଜଳବାୟୁ ସୁସ୍ଥ ରହିବ ବର୍ଷା, ଶୀତ ଓ ଗରମ ନିୟମିତ ରହିବ ଯାହାକି ଏବେ ପରିବେଶ ଦୂଷିତ ଯୋଗୁ ଜଳବାୟୁରେ ମଧ୍ୟ ପାରିବର୍ତ୍ତନ ହୋଇଛି। ତେଣୁ ପରିବେଶ ବଞ୍ଚାଇବାକୁ ଅଞ୍ଚଳରେ ଅଧିକରୁ ଅଧିକ ବୃକ୍ଷରୋପଣ କରାଯିବା ସହ ଜଙ୍ଗଲରେ ପାରମ୍ପରିକ ବୃକ୍ଷ ତଥା ଆମ୍ବ, ମହୁଲ, ପଣସ, ଲିଚୁ, ଜାମୁକୋଳି ଭଳି ଗଛ ଲଗାଇଲେ ଲୋକଙ୍କ ଜୀବନଜୀବିକା ସ୍ବାବଲମ୍ବୀ ହେବା ସହ ଜଙ୍ଗଲ ସୃଷ୍ଟି ହୋଇପାରିବ ବୋଲି କୁହାଯାଇଥିଲା। ଏହି ଅବସରରେ ବନ ବିଭାଗ ପକ୍ଷରୁ ବିଭିନ୍ନ ପ୍ରକାର ବୃକ୍ଷରୋପଣ କରାଯାଇଥିଲା।
