ମୁମ୍ବାଇ,୨ା୧୧: ଆଇସିସି ମହିଳା ଦିନିକିଆ ବିଶ୍ୱକପ୍ ୨୦୨୫ର ଫାଇନାଲରେ ଭାରତୀୟ ମହିଳା ଦଳ ଏକ ଐତିହାସିକ ପ୍ରଦର୍ଶନ କରି ଦକ୍ଷିଣ ଆଫ୍ରିକା ଆଗରେ ୨୯୯ ରନ୍ର ବିଜୟ ଲକ୍ଷ୍ୟ ରଖିଛି। ଦକ୍ଷିଣ ଆଫ୍ରିକାକୁ ଟାଇଟଲ୍ ଜିତିବା ପାଇଁ ବିଶ୍ୱକପ ଇତିହାସରେ ସବୁଠାରୁ ବଡ଼ ରନ୍ ଚେଜ୍ କରିବାର ଆବଶ୍ୟକତା ରହିଛି।
ଭାରତ ପକ୍ଷରୁ ଓପନର୍ ଶେଫାଳି ବର୍ମା (୮୭ ରନ୍) ଏବଂ ମିଡିଲ୍ ଅର୍ଡର ବ୍ୟାଟର୍ ଦୀପ୍ତି ଶର୍ମା (୫୮ ରନ୍) ଚମତ୍କାର ଅର୍ଦ୍ଧଶତକୀୟ ଇନିଂସ୍ ଖେଳି ଦଳର ସ୍କୋରକୁ ଏକ ବିଶାଳ ଆକାର ଦେଇଥିଲେ।
ଦଳକୁ ଏକ ଦୃଢ଼ ଆରମ୍ଭ ଦେଇଥିବା ଓପନର୍ ସ୍ମୃତି ମାନ୍ଧନା ୪୫ ରନ୍ କରି ଆଉଟ୍ ହୋଇଥିଲେ ମଧ୍ୟ ଏହି ବିଶ୍ୱକପ୍ରେ ସେ ୪୩୪ ରନ୍ ସଂଗ୍ରହ କରି ମହାନ ଖେଳାଳି ମିତାଲି ରାଜଙ୍କ ରେକର୍ଡ (୨୦୧୭ରେ ୪୦୯ ରନ୍) ଭାଙ୍ଗି ଏକକ ସଂସ୍କରଣରେ ସର୍ବାଧିକ ରନ୍ କରିବାରେ ପ୍ରଥମ ଭାରତୀୟ ବ୍ୟାଟର୍ ହୋଇଛନ୍ତି।
ଅନ୍ୟମାନଙ୍କ ମଧ୍ୟରେ ଜେମିମା ରୋଡ୍ରିଗ୍ସ ୨୪ ରନ୍ ଏବଂ ଅଧିନାୟିକା ହରମନପ୍ରୀତ କୌର ୨୦ ରନ୍ କରିଥିଲେ ମଧ୍ୟ ବଡ଼ ସ୍କୋର କରିବାରେ ବିଫଳ ହୋଇଥିଲେ। ଭାରତ ତା’ର ପ୍ରଥମ ବିଶ୍ୱକପ୍ ଟାଇଟଲ୍ ହାସଲ କରିବା ଲକ୍ଷ୍ୟରେ ବୋଲିଂ ଆରମ୍ଭ କରିଛି।
