ମୁମ୍ବାଇ, ୬।୧୨: ଶେଫାଳି ବର୍ମାଙ୍କ ଅର୍ଦ୍ଧଶତକ ସତ୍ତ୍ୱେ ଭାରତ ବୁଧବାର ଏଠାରେ ଅନୁଷ୍ଠିତ ପ୍ରଥମ ମହିଳା ଟି୨୦ କ୍ରିକେଟ ମ୍ୟାଚରେ ଇଂଲଣ୍ଡଠାରୁ ୩୮ ରନରେ ହାରି ଯାଇଛି। ଇଂଲଣ୍ଡ ୨୦ ଓଭରରେ ୬ ଉଇକେଟ ହରାଇ ୧୯୭ ରନ କରିଥିବାବେଳେ ଭାରତ ୨୦ ଓଭରରେ ୬ ଉଇକେଟ ହରାଇ ୧୫୯ ରନ କରିବାକୁ ସକ୍ଷମ ହୋଇଥିଲା।
ଭାରତ ପକ୍ଷରୁ ଶେଫାଳି ସର୍ବାଧିକ ୫୨ ଓ ଅଧିନାୟିକା ହରମନପ୍ରୀତ କୌର ୨୬ ରନ କରିଥିଲେ। ଇଂଲଣ୍ଡ ବୋଲରଙ୍କ ମଧ୍ୟରେ ସୋଫି ଏକଲେଷ୍ଟୋନ ୩ଟି ଏବଂ ନାଟ୍ ସ୍କିଭର-ବ୍ରଣ୍ଟ, ଫ୍ରେୟା କେମ୍ପ ଓ ସାରା ଗ୍ଲେନ ଗୋଟିଏ ଲେଖାଏ ଉଇକେଟ ନେଇଥିଲେ। ବିଜୟ ଫଳରେ ଇଂଲଣ୍ଡ ୩ ମ୍ୟାଚ ବିଶିଷ୍ଟ ସିରିଜରେ ୧-୦ରେ ଅଗ୍ରଣୀଲାଭ କରିଛି।
ଟସ୍ ଜିତି ଇଂଲଣ୍ଡ ଫିଲ୍ଡିଂ ନିଷ୍ପତ୍ତି ନେଇଥିଲା। ଭାରତର ରେଣୁକା ସିଂ ଚମତ୍କାର ବୋଲିଂ କରି ଇନିଂସର ପ୍ରଥମ ଓଭରରେ ଇଂଲଣ୍ଡକୁ ଡବଲ ଝଟ୍କା ଦେଇଥିଲେ। ତେବେ ଡାନି ଓ୍ବାଟ୍ଟ ଓ ନାଟ୍ ସ୍କିଭର-ବ୍ରଣ୍ଟ ଦ୍ରୁତ ହାରରେ ରନ ସଂଗ୍ରହ କରି ତୃତୀୟ ଉଇକେଟରେ ୮୭ ବଲ୍ରୁ ୧୩୮ ରନର ଭାଗୀଦାରି ଗଢ଼ିବାରୁ ଇଂଲଣ୍ଡ ବଡ଼ ସ୍କୋର ଆଡ଼କୁ ମୁହାଁଇଥିଲା। ଓ୍ବାଟ୍ଟ ୪୭ ବଲ୍ରୁ ୭୫ (୮ ଚୌକା, ୨ ଛକା) ଓ ବ୍ରଣ୍ଟ ୫୩ ବଲ୍ରୁ ୭୭ (୧୩ ଚୌକା) ରନ କରି ଇଂଲଣ୍ଡ ଇନିଂସ ଗଢ଼ିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ।
ଶେଷ ଭାଗରେ ଆମି ଜୋନ୍ସ ୯ ବଲ୍ରୁ ୨୩ (୩ ଚୌକା, ୧ ଛକା) ରନର ମୂଲ୍ୟବାନ ଇନିଂସ ଖେଳିଥିଲେ। ଭାରତ ପକ୍ଷରୁ ରେଣୁକା ସିଂ ୩ଟି, ଶ୍ରେୟଙ୍କା ପାଟିଲ ୨ଟି ଓ ସାଇକା ଇଶାକ ଗୋଟିଏ ଉଇକେଟ ନେଇଥିଲେ। ଏହି ମ୍ୟାଚରେ ଭାରତର ସାଇକା ଇଶାକ ଓ ଶ୍ରେୟଙ୍କା ପାଟିଲ ଟି୨୦ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ। ଉଭୟ ଖେଳାଳି ଡେବ୍ୟୁ ମ୍ୟାଚରେ ଉଇକେଟ ନେବାରେ ସକ୍ଷମ ହୋଇଥିଲେ।
