ଇସଲାମାବାଦ,୨୪।୧୦: ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦ ପାକିସ୍ତାନରେ ପୁଣି ସକ୍ରିୟ ହୋଇଛି। ସଂଗଠନ ଏବେ ଜମାତ-ଉଲ-ମୋମିନାତ ନାମରେ ଏହାର ପ୍ରଥମ ମହିଳା ବ୍ରିଗେଡ ଆରମ୍ଭ କରିଛି। ଅକ୍ଟୋବର ୮ରେ ଏହାର ନିଯୁକ୍ତି ଆରମ୍ଭ ହୋଇଥିଲା। ଅପରେଶନ ସିନ୍ଦୂର ସମୟରେ, ଭାରତୀୟ ସଶସ୍ତ୍ର ବାହିନୀ ପାକିସ୍ତାନର ପଞ୍ଜାବର ବାହାୱାଲପୁରରେ ଜୈଶର ମର୍କଜକୁ ଧ୍ୱଂସ କରିଥିଲା। ଏହା ଆତଙ୍କବାଦୀମାନଙ୍କର ମୁଖ୍ୟ ଆଡ୍ଡା ଥିଲା। ଅପରେଶନ ସିନ୍ଦୂର ପରେ, ଜୈଶ ପାକିସ୍ତାନୀ ସେନାର ସମର୍ଥନରେ ପୁର୍ନସଂଗଠିତ ହେଉଛି।
ସୂତ୍ର ଅନୁଯାୟୀ ପଞ୍ଜାବ ଏବଂ ସିନ୍ଧରୁ ପ୍ରାୟ ୧,୫୦୦ ଆତଙ୍କବାଦୀ ଜୈଶରେ ଯୋଗ ଦେଇଛନ୍ତି। ଏହା ସହିତ, ଜୈଶର ମଦ୍ରାସା ଏବଂ ମସଜିଦଗୁଡ଼ିକ ପ୍ରାୟ ୧୦୦ କୋଟି ଦାନ ସଂଗ୍ରହ କରିଛନ୍ତି। ଜୈଶ ପଞ୍ଜାବ ଏବଂ ପାକ ଅଧିକୃତ କଶ୍ମୀର (PoK)ରେ ଧ୍ୱଂସପ୍ରାପ୍ତ ଶିବିର ମରାମତି ପାଇଁ ପାଣ୍ଠି ସଂଗ୍ରହ କରିଛି।
ଜୈଶ-ଏ-ମହମ୍ମଦ ଆସନ୍ତା ମାସରେ ପାକିସ୍ତାନୀ ସହରଗୁଡ଼ିକରେ ୧୦୦ରୁ ଅଧିକ ମର୍କଜ ସମ୍ମିଳନୀ କରିବାକୁ ନିଷ୍ପତ୍ତି ନେଇଛି। ଅଫଲାଇନ ପ୍ରସାରଣ ସହିତ ଅନଲାଇନ ପାଠ୍ୟକ୍ରମ, ଗ୍ରାମାଞ୍ଚଳରେ ଯୁବକମାନଙ୍କୁ ମାଇଣ୍ଡ ଓ୍ବାଶ କରିବା ଏବଂ ସେମାନଙ୍କୁ ମୌଳବାଦୀ ଚିନ୍ତାଧାରା ସହିତ ଶିକ୍ଷା ଦେବାର ଲକ୍ଷ୍ୟ ରଖିଛି। ଏହା ମାଧ୍ୟମରେ, ଜୈଶ ଆତ୍ମଘାତୀ ବୋମା ବିସ୍ଫୋରଣକାରୀଙ୍କ ଏକ ସେନା ଗଠନ କରୁଛି।
ଜୈଶ ମୁଖ୍ୟ ମାସୁଦ ଆଝାରଙ୍କ ଭଉଣୀ, ସାଦିଆ ଏବଂ ସୁମାଇରା, ପ୍ରତିଦିନ ନିଯୁକ୍ତି ପାଇଥିବା ଲୋକଙ୍କୁ ୪୦ ମିନିଟ ତାଲିମ ପ୍ରଦାନ କରିବେ। ଏହି ତାଲିମ ଅନଲାଇନରେ କରାଯିବ। ଆତଙ୍କବାଦୀ ସଂଗଠନ ଏହି ଅନଲାଇନ କ୍ଲାସଗୁଡ଼ିକୁ ବ୍ୟବହାର କରି ଇସଲାମ ଏବଂ ଜିହାଦ ପାଇଁ ମହିଳାମାନଙ୍କୁ ପ୍ରସ୍ତୁତ କରିବାକୁ ଲକ୍ଷ୍ୟ ରଖିଛି। ଏହି ତାଲିମ ପାଇଁ ଜୈଶ ମହିଳାମାନଙ୍କଠାରୁ ୫୦୦ ଟଙ୍କା ମଧ୍ୟ ନେଉଛି।
Dharitri – Odisha’s No.1 Odia Daily
