ଭୁବନେଶ୍ୱର,୨୩।୫(ବ୍ୟୁରୋ): ଲିଙ୍ଗରାଜ ଥାନା ଅନ୍ତର୍ଗତ ସାମନ୍ତରାପୁର ମହାବୀରନଗର ଅଞ୍ଚଳରେ ରବିବାର ମନିଷା ନାହାକ ନାମ୍ନୀ ମହିଳାଙ୍କ ସନ୍ଦେହଜନକ ମୃତ୍ୟୁ ଘଟଣା ଭିନ୍ନ ମୋଡ଼ ନେଇଛି। ଯୌତୁକ ପାଇଁ ସ୍ବାମୀ ନିର୍ଯାତନା ଦେବା ସହ ଜୋରଜବରଦସ୍ତ ବିଷ ପିଆଇଦେଇଥିବାରୁ ସ୍ତ୍ରୀ ମନୀଷାଙ୍କ ମୃତ୍ୟୁ ଘଟିଥିବା ଅଭିଯୋଗ ହେବା ପରେ ପୋଲିସ ସୋମବାର ଅଭିଯୁକ୍ତ ସ୍ବାମୀଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେ ହେଲେ ବାଲିପାଟଣା ଥାନା ଅଞ୍ଚଳର ଲିଙ୍ଗରାଜ ପଣ୍ଡା। ଜାମିନ ନ ମିଳିବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ସୂଚନାନୁଯାୟୀ, ଗଞ୍ଜାମ ଜିଲା ଆସିକା ଥାନା ଅଞ୍ଚଳର ମନିଷା ୪ ବର୍ଷ ତଳେ ବାଲିପାଟଣା ଥାନା ଅଞ୍ଚଳର ଲିଙ୍ଗରାଜଙ୍କୁ ବିବାହ କରିଥିଲେ। ଲିଙ୍ଗରାଜ ଭୁବନେଶ୍ୱରରେ ଏକ ଘରୋଇ କମ୍ପାନୀରେ କାମ କରୁଥିବାବେଳେ ଉଭୟ ଲିଙ୍ଗରାଜ ଥାନା ଅଞ୍ଚଳରେ ରହୁଥିଲେ। ତେବେ ଶନିବାର ସ୍ବାମୀ ଓ ସ୍ତ୍ରୀଙ୍କ ମଧ୍ୟରେ କୌଣସି କାରଣକୁ ନେଇ ଝଗଡ଼ା ହୋଇଥିଲା। କିଛି ସମୟ ପରେ ମନିଷାଙ୍କୁ ଚେତାଶୂନ୍ୟ ଅବସ୍ଥାରେ ନେଇ ସ୍ବାମୀ ଲିଙ୍ଗରାଜ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଥିଲେ। ସେଠାରେ ଅବସ୍ଥା ଗୁରୁତର ହେବାରୁ ମନୀଷାଙ୍କୁ ଏମ୍ସକୁ ସ୍ଥାନାନ୍ତର କରାଯାଇଥିଲା। ହେଲେ ଚିକିତ୍ସାଧୀନ ଅବସ୍ଥାରେ ମନୀଷାଙ୍କର ରବିବାର ମୃତ୍ୟୁ ଘଟିଥିଲା। ଯୌତୁକ ପାଇଁ ମନିଷାଙ୍କୁ ସ୍ବାମୀ ଲିଙ୍ଗରାଜ ବାରମ୍ବାର ନିର୍ଯାତନା ଦେବା ସହ ଘଟଣା ଦିନ ବିଷ ପିଆଇ ହତ୍ୟା କରିଥିବା ମନିଷାଙ୍କ ମା’ ଥାନାରେ ଲିଖିତ ଅଭିଯୋଗ କରିଥିଲେ। ଏନେଇ ପୋଲିସ ଅଭିଯୁକ୍ତ ଲିଙ୍ଗରାଜଙ୍କ ନାମରେ ଆଇପିସି ଦଫା ୪୯୮ (କ), ୩୦୨, ୩୦୪ (ଖ), ୪ ଡିପି ଆକ୍ଟରେ ଏକ ମାମଲା (ନଂ. ୧୫୫/୨୩) ରୁଜୁ କରିଥିଲା। ସୋମବାର ପୋଲିସ ତାଙ୍କୁ ପଚରାଉଚରା କରିବା ପରେ ଗିରଫ କରିଥିଲା।
