ମୋହନା,୧୪।୮((ଗିରିଧାରୀ ପରିଛା/ମନ୍ମଥ ମିଶ୍ର):ଗଜପତି ଜିଲା ମୋହନା ବ୍ଲକ ଅଡବା ଥାନା ଏସ ଗରଡ଼ମା ଗ୍ରାମରେ ଦେଖିବାକୁ ମିଳିଛି ଏକ ଅଭାବନୀୟ ଘଟଣା। ନିଜ ସ୍ବାମୀଙ୍କୁ ଗାଁ ମଝିରେ ବାନ୍ଧି ରଖି ନିସ୍ତୁକ ପିଟିଛନ୍ତି ସ୍ତ୍ରୀ ସୁଭଦ୍ରା ମାଳବିଷୋୟୀ, ତାଙ୍କ ଭାଇ ଓ ସହଯୋଗୀ। ଗତକାଲି ଅପରାହ୍ନ ୩ରୁ ଗାଁ ମଝିରେ ଥିବା ଖୁଣ୍ଟରେ ବାନ୍ଧି ରଖିଥିଲେ। ଦୀର୍ଘ ୧୦ ଘଣ୍ଟା ପରେ ଖବର ପାଇ ଅଡବା ଥାନା ଅଧିକାରୀ ଓ ଟିମ ପହଞ୍ଚି ଯୁବକଙ୍କୁ ଉଦ୍ଧାର କରିଛନ୍ତି।
ଗାଁର ସୁଭଦ୍ରା ମାଳବିଷୋୟୀ ଗତ ତିନିବର୍ଷ ପୂର୍ବେ ବ୍ରାହ୍ମଣୀଗାଁ ଥାନା ବୁଡ଼ିଶିଳ ଗାଁର ଜଳନ୍ତ ବଳିଆରସିଂଙ୍କୁ ବିବାହ କରିଥିଲେ। ହେଲେ ପାରିବାରିକ କଳହ ପାଇଁ ସୁଭଦ୍ରା ୧୧ ମାସ ତଳେ ନିଜ ବାପଘରକୁ ପଳାଇ ଆସିଥିଲେ। ଘଟଣାରେ ଉଭୟ ପରିବାର ପକ୍ଷରୁ ଥାନା ମାମଲା ରୁଜୁ ହେବା ସହ କୋର୍ଟରେ ବିଚାରଧୀନ ଅଛି। ଗତକାଲି ଯୁବକ ଜଣକ ନିଜ ଗାଁ ବୁଡ଼ିଶିଳ ଗାଁରୁ ରାଶନ ଚାଉଳ ନେବାକୁ ଗରଡ଼ମା ଗାଁକୁ ଆସିଥିବାବେଳେ ଝିଅ ଘର ପରିବାର ଲୋକେ ଯୁବକଙ୍କୁ ମାଡ଼ ମାରିବା ସହ ରାତି ତମାମ ଗାଁ ଦାଣ୍ଡରେ ବାନ୍ଧି ରଖିଥିଲେ। ଖବର ପାଇ ଘଟଣାସ୍ଥଳରେ ପହଞ୍ଚି ପୋଲିସ ବୁଝାସୁଝା କରି ଯୁବକଙ୍କୁ ଉଦ୍ଧାର କରିଥିଲେ। ଅଧିକ ତଦନ୍ତ କରୁଥିବା ଅଡବା ଥାନା ଅଧିକାରୀ ଶୁଭ୍ରାନ୍ତ କୁମାର ପଣ୍ଡା କହିଛନ୍ତି।
