ପାରାଦୀପ,୨୫।୨(ଶରତ ରାଉତ): ପାରାଦୀପ ତାରିଣୀଗଡା ଅଞ୍ଚଳର ବହୁଚର୍ଚ୍ଚିତ ମହିଳା ମୃତ୍ୟୁ ଘଟଣାରେ ପୋଲିସକୁ ଅନେକ ସୂଚନା ମିଳିଛି। ମୃତକାଙ୍କ ପରିଚୟ ମିଳିବା ସହ ବଳାତ୍କାର ପରେ ଛାତରୁ ଠେଲି ହତ୍ୟା କରାଯାଇଛି ବୋଲି ଜଣାପଡିଛି। ଘଟଣା ସମ୍ପର୍କରେ ପାରାଦୀପ ଆଦର୍ଶଥାନା ଅଧିକାରୀ କାବୁଲି ବାରିକ କହିଛନ୍ତି, ମୃତ ଯୁବତୀଙ୍କ ଘର ତିର୍ତ୍ତୋଲ ଥାନା ଅଞ୍ଚଳରେ। ତାଙ୍କୁ ଝାଡ଼ଖଣ୍ଡର ଯୁବକ ଲିଫ୍ଟ ଦେବା ଆଳରେ ପାରାଦୀପ ଆଣିଥିଲେ। ତାରିଣୀଗଡା ସ୍ଥିତ ଭଡାଘରକୁ ନେଇ ବଳାତ୍କାର କରିବା ପରେ ଛାତରୁ ଠେଲି ହତ୍ୟା କରିଛନ୍ତି ବୋଲି ପ୍ରାଥମିକ ତଦନ୍ତରୁ ଜଣାପଡିଛି ବୋଲି ସେ କହିଛନ୍ତି। ଏହି ଘଟଣାରେ ମୃତ ଯୁବତୀଙ୍କ ପରିବାର ପକ୍ଷରୁ ପାରାଦୀପ ଆଦର୍ଶଥାନାରେ ଅଭିଯୋଗ କରିବା ପରେ ପୋଲିସ ୫୪/୨୬ରେ ମାମଲା ରୁଜୁ କରିଛି। ମୃତଦେହ ଚିହ୍ନଟ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଏଥିରେ ସଂପୃକ୍ତ ଅନ୍ୟ ଯୁବକଙ୍କ ବିଷୟରେ ଅଧିକ ତଦନ୍ତ ଆରମ୍ଭ କରିଛି।
ସୂଚନାଯୋଗ୍ୟ, ତାରିଣୀଗଡା ସ୍ଥିତ ବ୍ୟାଙ୍କ ପାଖ କଲୋନୀରେ ଶମ୍ଭୁ ଖୁଣ୍ଟିଆଙ୍କ ୪ ମହଲା କୋଠା ତଳେ ସୋମବାର ସକାଳୁ ସଂପୃକ୍ତ ଯୁବତୀଙ୍କ ଉଲଗ୍ନ ମୃତଦେହ ପଡିଥିବା ଦେଖିବାକୁ ମିଳିଥିଲା। ପରେ ପୋଲିସ ପହଞ୍ଚି ତଦନ୍ତ କରିବାରେ ଜଣାପଡିଥିଲା ଛାତରୁ ଖସି ଯୁବତୀଙ୍କ ମୃତ୍ୟୁ ଘଟିଛି। ଉକ୍ତ ଘରର ଉପର ମହଲାରେ ରହୁଥିବା ୭ ଜଣ ଯୁବକଙ୍କୁ ଅଟକ ରଖି ପଚରାଉଚରା କରିଥିଲା। ପୋଲିସ କିନ୍ତୁ ଯୁବତୀଙ୍କ ପରିଚୟ ମଙ୍ଗଳବାର ସନ୍ଧ୍ୟା ପର୍ଯ୍ୟନ୍ତ ମିଳୁ ନ ଥିଲା। ସନ୍ଧ୍ୟାରେ ପୋଲିସ ସ୍ବତନ୍ତ୍ର ଏକ୍ସପର୍ଟ ଟିମ ସହିତ ଘରର ଟିକନିଖ ଯାଞ୍ଚ କରିବା ବେଳେ ଝାଡ଼ଖଣ୍ଡ ଯୁବକଙ୍କ ବେଡ ତଳୁ ଯୁବତୀଙ୍କ ଅନ୍ତଃବସ୍ତ୍ର, ପୋଷାକ, ଚପଲ ଆଦି ମିଳିଥିଲା। ସେହି ଘରର ରୋଷେଇ ଘର ତାଜା ଉପରୁ ଯୁବତୀଙ୍କ ମୋବାଇଲ ଉଦ୍ଧାର କରାଯାଇଥିଲା। ସୁଇଚ ବନ୍ଦ ଥିବା ମୋବାଇଲ ଖୋଲିବା ପରେ ଯୁବତୀଙ୍କ ପରିଚୟ ମିଳିଥିଲା।
ଉକ୍ତ ଘରେ ଏକ ଠିକା ସଂସ୍ଥାର ୭ ଜଣ ଯୁବକ ରହୁଥିଲେ। ସେଥିରେ ଝାଡ଼ଖଣ୍ଡର ଯୁବକ ରବିବାର ଅନଗୋଳ ଯାଇଥିଲେ। କାରଣ ସେଠାରେ ତାଙ୍କର ସମ୍ପର୍କୀୟଙ୍କ ବାଇକ ଥିଲା। ସେହି ବାଇକ ଯୋଗେ ପାରାଦୀପ ଫେରୁଥିଲେ। ରବିବାର ସନ୍ଧ୍ୟାରେ ତିର୍ତ୍ତୋଲ ଥାନା ଅନ୍ତର୍ଗତ ଜୟପୁର ଛକରୁ ଯୁବତୀ ଜଣଙ୍କ ଲିଫ୍ଟ ମାଗିଥିଲେ। ତାଙ୍କୁ ବାଇକରେ ଆଣି ରାତି ୧୦ଟାବେଳେ ସେହି ଭଡାଘରକୁ ନେଇଥିଲେ। ସକାଳ ୪ .୧୫ରେ ଯୁବତୀ ତଳକୁ ଖସି ପଡିବାର ଦୃଶ୍ୟ ପଡୋଶୀ ଘର ସିସିଟିଭି ଫୁଟେଜରୁ ଜଣାପଡିଥିଲା।
ସଂପୃକ୍ତ ଯୁବତୀ ଯୁକ୍ତ ୩ ପାସ କରିବା ପରେ କମ୍ପ୍ୟୁଟର ଶିକ୍ଷା ନେଉଥିଲେ। ତାଙ୍କର ଢିଙ୍କିଆ ଅଞ୍ଚଳର ଜଣେ ପୁରୁଷ ବନ୍ଧୁ ସହିତ ସେହି ରବିବାର ଶାରଳା ମନ୍ଦିର ଯାଇଥିଲେ। ସେଠାରେ ପ୍ରେମୀ ଯୁଗଳଙ୍କ ମଧ୍ୟରେ କୌଣସି କାରଣରୁ ମନାନ୍ତର ହୋଇଥିଲା।ପୁରୁଷ ବନ୍ଧୁ ତାଙ୍କୁ ଜୟପୁର ଛକରେ ଛାଡି ଘରକୁ ପଳାଇଥିଲେ। ସେଠାରେ ଅଟକି ଥିବା ବେଳେ ଅଭିଯୁକ୍ତ ଝାଡ଼ଖଣ୍ଡ ଯୁବକ ବାଇକରେ ଲିଫ୍ଟ ଦେଇ ପାରାଦୀପ ଆଣିଥିଲେ। ସେହିଦିନ ଯୁବକଙ୍କ ପରିବାର ପକ୍ଷରୁ ତିର୍ତ୍ତୋଲ ଥାନାରେ ନିଖୋଜ ଅଭିଯୋଗ ହୋଇଥିଲା।
ଯୁବତୀଙ୍କୁ ବଳାତ୍କାର କରାଯାଇଥିବା ଘଟଣାରେ ଜଣେ କିମ୍ବା ଏକାଧିକ ଲୋକ ସଂପୃକ୍ତ ତାହା ଏ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଘଟଣା ସମ୍ପର୍କରେ ଏବେବି ଅନେକ ଦିଗ ଉପରେ ତଦନ୍ତ ଜାରି ରହିଛି ବୋଲି ଥାନାଧିକାରୀ ବାରିକ କହିଛନ୍ତି।