କୋଲକାତା,୧୫।୮: ଦିନକୁ ଦିନ କୋଲକାତାର ଆର.ଜି କର ମେଡିକାଲ କଲେଜ ଏବଂ ହସ୍ପିଟାଲର ବିବାଦ ତୀବ୍ର ହେବାରେ ଲାଗିଛି। ଘଟଣାକୁ ନେଇ କେବଳ ରାଜ୍ୟ ନୁହେଁ ସାରା ଦେଶ ଉଠୁଛି ପଡୁଛି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଭାଜପା କ୍ରମାଗତ ଭାବେ ଟାର୍ଗେଟ କରୁଥିବାବେଳେ ମମତା ବାନାର୍ଜୀ ମଧ୍ୟ ବିରୋଧୀଙ୍କ ପ୍ରତିଟି ପ୍ରଶ୍ନର ଗୋଟି ଗୋଟି କରି ଉତ୍ତର ଦେଇ ପ୍ରତିଆକ୍ରମଣ କରୁଛନ୍ତି।
ତେବେ ଡାକ୍ତର ବଳାତ୍କାର ଘଟଣାକୁ ନେଇ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ବଡ଼ ଘୋଷଣା କରିଛନ୍ତି। ସେ କହିଛନ୍ତି, ଅଗଷ୍ଟ ୧୮ ସୁଦ୍ଧା ଏହି ମାମଲାରେ ଦୋଷୀଙ୍କୁ ଫାଶୀ ଦେବାକୁ ଦାବି କରିଛନ୍ତି। ଏହା ସହିତ ସେ ଏହି ମାମଲାର ତଦନ୍ତକୁ ସିବିଆଇକୁ ହସ୍ତାନ୍ତର କରିବାକୁ ନିଷ୍ପତ୍ତିକୁ ସ୍ବାଗତ କରିଛନ୍ତି। କହିରଖୁଛୁ କି, କୋଲକାତା ହାଇକୋର୍ଟ ଏହି ମାମଲାର ତଦନ୍ତ ସିବିଆଇକୁ ଦେଇଛନ୍ତି।
ମମତା ବୁଧବାର ଡାକ୍ତର ବଳାତ୍କାର ଓ ହତ୍ୟା ମାମଲାର ଯଥାଶୀଘ୍ର ସମାଧାନ କରିବାକୁ ସିବିଆଇକୁ ଅନୁରୋଧ କରିଛନ୍ତି। ଏଥିସହ ଦୋଷୀମାନଙ୍କୁ ରବିବାର ଫାଶୀ ଦେବାକୁ ଦାବି କରିଛନ୍ତି। ଗୁରୁତ୍ୱପୂର୍ଣ୍ଣ କଥା ହେଉଛି ସିଏମ ମମତା ବାନାର୍ଜୀ ଦାବି କରିଛନ୍ତି ଯେ ଏହି ମାମଲାରେ ରାଜ୍ୟ ପୋଲିସ ୯୦ ପ୍ରତିଶତ ତଦନ୍ତ ଶେଷ କରିଛି।
ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜନୈତିକ ଦଳମାନଙ୍କୁ କହିଛନ୍ତି, ଆପଣ ମୋତେ ଦୁର୍ବ୍ୟବହାର କରିପାରିବେ। ଏହା କରିବା ପାଇଁ ସମ୍ପୂର୍ଣ୍ଣ ମୁକ୍ତ, କିନ୍ତୁ ପଶ୍ଚିମବଙ୍ଗର ଦୁର୍ବ୍ୟବହାର କର ନାହିଁ। ସେ କହିଛନ୍ତି ଯେ, ସିବିଆଇକୁ ରାଜ୍ୟ ସରକାର ସମ୍ପୂର୍ଣ୍ଣ ସହଯୋଗ ଯୋଗାଇ ଦିଆଯିବ ଯାହାଦ୍ୱାରା ଏହି ମାମଲାର ଶୀଘ୍ର ସମାଧାନ ହୋଇପାରିବ।
