ଅତାବିରା,୧୩।୩(ଯୁଧିଷ୍ଠିର ମହାପାତ୍ର ): ବରଗଡ଼ ଜିଲା ଅତାବିରା ଥାନା ଅନ୍ତର୍ଗତ ବିଭିନ୍ନ ସ୍ଥାନରେ ବେଧଡକ୍ ଚାଲିଛି ନିଶା କାରବାର । ସବୁ ଜାଣି ଅଜଣା ଭଳି ଚୁପ୍ ମାରି ବସିଛନ୍ତି ପୋଲିସ ଓ ଅବକାରୀ ବିଭାଗ । ଅନ୍ୟପକ୍ଷରେ ଗାଁରେ ନିଶା କାରବାରକୁ ସମ୍ପୂର୍ଣ ବନ୍ଦ ପାଇଁ ଅତାବିରା ଥାନା ଅନ୍ତର୍ଗତ ପାଲି ବୁଗବୁଗା ଗ୍ରାମର ମହିଳାମାନେ ଅଣ୍ଟା ଭିଡିଛନ୍ତି। ବୁଧବାର ସନ୍ଧ୍ୟାରେ ଗ୍ରାମର ମହିଳାମାନେ ସଂଗଠିତ ହୋଇ ପାଲି ବୁଗବୁଗା ଗ୍ରାମରେ ଚାଲିଥିବା ନିଶା କାରବାର ଉପରେ ଦୃଢ଼ କାର୍ଯ୍ୟାନୁଷ୍ଠାନ ନେବା ସହିତ ଗ୍ରାମକୁ ନିଶାମୁକ୍ତ କରିବା ପାଇଁ ଅତାବିରା ଥାନା ଅଧିକାରୀଙ୍କୁ ଫେରାଦ ହୋଇଥିଲେ।
ମହିଳାଙ୍କ ଅଭିଯୋଗ ଅନୁଯାୟୀ, ଗ୍ରାମର ଅନେକ ଘରେ ରନ୍ଧା ମଦ ବିକ୍ରି ହେଉଛି । ମଦ ପିଇବା ଦ୍ବାରା ଘରେ ଅଶାନ୍ତି ବଢୁଛି । ଏଥିରେ ବିଶେଷ କରି ଯୁବପିଢ଼ି ପଥଭ୍ରଷ୍ଟ ହେଉଛନ୍ତି । ଅନେକ ସମୟରେ ନିଶାଜନିତ ରୋଗରେ ଆକ୍ରାନ୍ତ ହୋଇ ଲୋକେ ଅକାଳ ମୃତ୍ୟୁ ମୁଖରେ ପଡୁଛନ୍ତି । ବିଭିନ୍ନ ସ୍ଥାନରୁ ମାଫିଆମାନେ ରନ୍ଧା ମଦ ଯୋଗାଉଛନ୍ତି । କେବଳ ସେତିକି ନୁହେଁ, ଉକ୍ତ ଅଞ୍ଚଳରେ ନକଲୀ ବିଦେଶୀ ମଦ, କଫ୍ ସିରପ୍ କାରବାର ମଧ୍ୟ ଅବାଧରେ ଚାଲିଥିବା ଅଞ୍ଚଳବାସୀ ଅଭିଯୋଗ କରୁଛନ୍ତି । ତେବେ ପ୍ରାୟ ଏକ ବର୍ଷ ପୂର୍ବେ ଗ୍ରାମର ମହିଳାମାନେ ଗ୍ରାମରେ ମଦ ବନ୍ଦ ପାଇଁ ଥାନାର ଦ୍ବାରସ୍ଥ ହୋଇଥିଲେ । ମାତ୍ର ସେତେବେଳେ ଗ୍ରାମବାସୀ ତରଫରୁ ଗ୍ରାମରେ କୁଚିଆ ଭାଟି ଦିଆଯାଇଥିଲା । ପରବର୍ତ୍ତୀ ମୁହୂର୍ତ୍ତରେ ଗ୍ରାମର କୁଚିଆ ଭାଟିକୁ ବନ୍ଦ କରି ଦିଆଯାଇଥିଲା । ଲୋକେ ମଧ୍ୟ ଧିରେଧିରେ ମଦ ଛାଡ଼ିବା ଆରମ୍ଭ କରିଥିଲେ । ଏହାର ସୁଯୋଗ ନେଇ କେତେକ ଲୋକେ ପୋଲିସ ଓ ଅବକାରୀକୁ ବେଖାତିର କରି ଗ୍ରାମରେ ପୁଣି ନିଶା ଆଡ୍ଡା ଗୁଡିକ ଖୋଲି ଅବାଧରେ ନିଶା କାରବାର ଚଲାଇଥିବା ଅଭିଯୋଗ ହୋଇଛି।
ତେବେ ଗ୍ରାମକୁ ସମ୍ପୂର୍ଣଭାବେ ନିଶାମୁକ୍ତ କରିବା ପାଇଁ ଲଢେଇ ଜାରି ରହିବ ବୋଲି ମହିଳାମାନେ କହିଥିବାବେଳେ ବିଚ୍ ରାସ୍ତାକଡରେ ଚାଲିଥିବା ନିଶା କାରବାର ପ୍ରତି ଆଖି ବୁଜି ଦେଇ ଥିବାରୁ ଅବକାରୀ ଓ ପୋଲିସ ବିଭାଗର କାର୍ଯ୍ୟଦକ୍ଷତା ପଦାରେ ପଡି ଯାଇଛି ବୋଲି ସାଧାରଣରେ ଚର୍ଚ୍ଚା ହେଉଛି ।
