ନୂଆଦିଲ୍ଲୀ,୨୬।୧୨: ଭାରତୀୟ ଅଧିନାୟକ ରୋହିତ ଶର୍ମା ଟି-୨୦ ବିଶ୍ୱକପ ୨୦୨୪ ଖେଳିବା ବିଷୟରେ ନିଜ ମତ ରଖିଛନ୍ତି। ରୋହିତ କହିଛନ୍ତି, କ୍ରିକେଟ ଖେଳିବାକୁ ଏକ ଇଚ୍ଛା ଅଛି। ସମସ୍ତେ ଭଲ କରିବାକୁ ଏବଂ ସମସ୍ତ ମ୍ୟାଚ ଖେଳିବାକୁ ଚାହୁଁଛନ୍ତି। ମୁଁ ଟି-୨୦ ବିଶ୍ୱକପ୍ ଖେଳିବି କି ନାହିଁ ଖୁବ୍ଶୀଘ୍ର ଏହାର ଜବାବ ମିଳିବ।
ରୋହିତ ଶର୍ମା ଗତ ନଭେମ୍ବର ୨୦୨୨ରେ ଅନ୍ତର୍ଜାତୀୟ ଟି-୨୦ ମ୍ୟାଚ ଖେଳିଥିଲେ, ଯାହା ଇଂଲଣ୍ଡ ବିପକ୍ଷ ଟି-୨୦ ବିଶ୍ୱକପର ସେମିଫାଇନାଲ ଥିଲା। ଏଠାରେ ଦଳ ୧୦ ଉଇକେଟରେ ହାରି ଯାଇଥିଲା। ଏହା ପରେ ହାର୍ଦ୍ଦିକ ପାଣ୍ଡ୍ୟା ୨୦୨୩ରେ ଭାରତୀୟ ଟି-୨୦ ଦଳର ଦାୟିତ୍ୱ ଗ୍ରହଣ କରିଥିଲେ। ୨୦୨୩ ଦିନିକିଆ ବିଶ୍ୱକପରେ ହାର୍ଦ୍ଦିକ ଆହତ ହେବା ପରେ ସୂର୍ଯ୍ୟକୁମାର ଯାଦବ ଭାରତର ଟି-୨୦ ଦଳର ଅଧିନାୟକ ହୋଇଥିଲେ।
ରୋହିତ ଏବଂ ବିରାଟ କୋହଲିଙ୍କ ପାଇଁ ୨୦୨୩ରେ ଅନ୍ତର୍ଜାତୀୟ ଟି-୨୦ କ୍ରିକେଟ ଠାରୁ ଦୂରରେ ରହିବା ମଧ୍ୟ ବୁଝାପଡୁଥିଲା। କାରଣ ଏହା ଏକ ଦିନିକିଆ ବିଶ୍ୱକପ ବର୍ଷ ଥିଲା ଏବଂ ବରିଷ୍ଠ ଖେଳାଳିମାନେ କେବଳ ଦିନିକିଆ ଫର୍ମାଟ ଉପରେ ଧ୍ୟାନ ଦେବାକୁ ଚାହୁଁଥିଲେ। କିନ୍ତୁ ଦିନିକିଆ ବିଶ୍ୱକପ ପରେ ମଧ୍ୟ ରୋହିତ ଏବଂ ବିରାଟ ଅନ୍ତର୍ଜାତୀୟ ଟି-୨୦କୁ ଫେରିନାହାଁନ୍ତି।
