ନୂଆଦିଲ୍ଲୀ,୨୦।୨: ସବୁ କଳ୍ପନାଜଳ୍ପନାର ଅନ୍ତ । ଯାହା ଚର୍ଚ୍ଚା ହେଉଥିଲା ତାହା ହିଁ ହୋଇଛି । Delhi New CM ହୋଇଛନ୍ତି ରେଖା ଗୁପ୍ତା । ବିଧାୟକ ଦଳ ବୈଠକରେ ରେଖାଙ୍କ ନାଁ ଘୋଷଣା କରାଯାଇଛି । ଗୁରୁବାର ଅର୍ଥାତ ଆଜି ମଧ୍ୟାହ୍ନ ୧୨ ଟା ୩୫ ରେ ସେ ମୁଖ୍ୟମନ୍ତ୍ରୀ ଭାବେ ଶପଥ ନେବେ। ଏହାସହ ମନ୍ତ୍ରିମଣ୍ଡଳ ମଧ୍ୟ ଶପଥ ଗ୍ରହଣ କରିବେ । ତେବେ ରେଖାଙ୍କୁ କାହିଁକି ଦିଲ୍ଲୀ ମୁଖ୍ୟମନ୍ତ୍ରୀ କରାଗଲା ? କ’ଣ ରହିଛି ଏହା ପଛର କାରଣ ? ଏତେ ବଡ ବଡ ଚେହେରା ଥାଇ ବି କାହିଁକି ରେଖା ସିଏମ ହେଲେ ତାହା ପୁଣି ଦେଶର ରାଜଧାନୀ ଦିଲ୍ଲୀରେ। ଆସନ୍ତୁ ଜାଣିବା…
Delhi New CM ହୋଇଛନ୍ତି ରେଖା ଗୁପ୍ତା । Rekha Gupta ଏବେ ଦେଶର ରାଜଧାନୀର ଶାସନ ଭାର ସମ୍ଭାଳିବେ । ଦିଲ୍ଲୀ ଭାଜପାର ସାଧାରଣ ସମ୍ପାଦକ ଅଛନ୍ତି ରେଖା । ପ୍ରକାଶଥାଉ ଯେ, ପ୍ରଥମଥର ପାଇଁ ରେଖା ଗୁପ୍ତା ବିଧାୟକ ଭାବରେ ର୍ନିବାଚିତ ହୋଇ ସିଏମ ହୋଇଛନ୍ତି । ତାହା ପୁଣି ଦେଶର ରାଜଧାନୀର । ଦିଲ୍ଲୀର ଚତୁର୍ଥ ମହିଳା ମୁଖ୍ୟମନ୍ତ୍ରୀ ଭାବରେ ସେ ଦାୟିତ୍ୱ ସମ୍ଭାଳିବେ । ଦିଲ୍ଲୀର ଶାଲିମାର ବାଗ ଆସନରୁ ସେ ବିଧାୟିକା ରହିଛନ୍ତି ।
୧୯୯୩ରେ ରେଖା ପ୍ରଥମ କରି ନିଜର ରାଜନୈତିକ କ୍ୟାରିୟର ABVPରୁ ଆରମ୍ଭ କରିଥିଲେ । ୧୯୯୬-୧୯୯୭ ରେ ଦିଲ୍ଲୀ ବିଶ୍ବ ବିଦ୍ୟାଳୟ ଛାତ୍ର ସଂଘ (DUSU) ଅଧ୍ୟକ୍ଷ ହୋଇଥିଲେ । ୨୦୦୭ ଓ ୨୦୧୨ରେ ଉତ୍ତର ପିତମପୁରାରେ (ୱାର୍ଡ-54)ରୁ ନିଗମ ପରିଷଦ ଭାବେ ନିଯୁକ୍ତ ହୋଇଥିଲେ । ଏହାପରେ ୨୦୨୨ରେ ଦିଲ୍ଲୀ ନଗର ନିଗମର ମେୟର ପ୍ରାର୍ଥୀ ଭାବେ ଭାଜପାରୁ ର୍ନିବାଚନ ଲଢିଥିଲେ । ଚଳିତ ର୍ନିବାଚନରେ ପ୍ରଥମ କରି ସେ ବିଧାୟିକା ଭାବେ ର୍ନିବାଚିତ ହୋଇଛନ୍ତି । ଶାଲିମାର ବାଗ ର୍ନିବାଚନ ମଣ୍ଡଳୀରୁ ବିଧାୟିକା ହୋଇଥିବା ରେଖାଙ୍କ ନାଁ ମୁଖ୍ୟମନ୍ତ୍ରୀ ପଦ ପାଇଁ ଘୋଷଣା କରାଯାଇଛି ।
ବିଧାୟକ ପରଭେଶ ବର୍ମା, ସତୀଶ ଉପାଧ୍ୟାୟ, ଆଶିଷ ସୁଦ, ଜିତେନ୍ଦ୍ର ମହାଜନ, ବିଜେନ୍ଦ୍ର ଗୁପ୍ତା, ଅଭୟ ବର୍ମା, ରେଖା ଗୁପ୍ତା ଏବଂ ଶିଖ ରାୟଙ୍କ ଭିତରୁ ଜଣେ ମୁଖ୍ୟମନ୍ତ୍ରୀ ହେବାନେଇ ଚର୍ଚ୍ଚା ହେଉଥିଲା । ଚର୍ଚ୍ଚାର ଆଗରେ ଥିଲା ରେଖାଙ୍କ ନାଁ । ଏପରିକି ଭାଜପା ଆଶ୍ଚର୍ଯ୍ୟଜନକ ଭାବେ କାହାକୁ ବି ମୁଖ୍ୟମନ୍ତ୍ରୀ ଭାବେ ଘୋଷଣା କରିପାରେ ବୋଲି ମଧ୍ୟ କୁହାଯାଉଥିଲା । ହେଲେ ବିଧାୟକ ଦଳ ବୈଠକରେ ରେଖାଙ୍କ ନାଁରେ ମୋହର ମାରିଛି ଦଳ ।
କହିରଖୁଛୁ କି, ଭାଜପା ସବୁବେଳେ ନୂଆ ଚେହେରାକୁ ସୁଯୋଗ ଦେଉଛି । ଗୁଜରାଟ, ମଧ୍ୟପ୍ରଦେଶ, ଓଡିଶା, ଛତିଶଗଡରେ ମଧ୍ୟ ଭାଜପାର ଏ ଗେମ ପ୍ଲାନ ପୂର୍ବରୁ ଦେଖିବାକୁ ମିଳିଛି । ତାହାସହ ରେଖାଙ୍କ ବୟସ ମଧ୍ୟ କମ ଅନ୍ୟ ଚେହେରାଙ୍କ ଅପେକ୍ଷା ।
ଭାଜପାର କୌଣସି ମୁଖ୍ୟମନ୍ତ୍ରୀଙ୍କ ନାମରେ ଦୁର୍ନୀତିର ଦାଗ ନାହିଁ । ରେଖାଙ୍କ କ୍ଷେତ୍ରରେ ମଧ୍ୟ ଏହା ଦେଖିବାକୁ ମିଳିଛି । ଜନତାଙ୍କ ସେବକ ଭାବରେ କାର୍ଯ୍ୟ କରିବାର କ୍ଷମତା ମଧ୍ୟ ରେଖାଙ୍କ ପାଖରେ ରହିଛି । ସେ ସାଧାରଣ ବର୍ଗରୁ ଆସନ୍ତି । ଯାହାଫଳରେ ସେ ମୁଖ୍ୟମନ୍ତ୍ରୀ ହେବା ପାଇଁ ଯୋଗ୍ୟ ହୋଇଛନ୍ତି ।
ସଂଗଠନରେ ମଧ୍ୟ ରେଖା ଗୁପ୍ତାଙ୍କ ଦବଦବା ରହିଛି । ଆରଏସଏସ ସହ ସେ ଦୀର୍ଘ ଦିନରୁ ଜଡିତ ମଧ୍ୟ । ତାହାସହ ଦେଶର ରାଜଧାନୀର ସେ ଲୋକପ୍ରିୟ ଚେହେରା ମଧ୍ୟ । ସେହିଭଳି ପରଭେଶ ବର୍ମାଙ୍କୁ ଦିଲ୍ଲୀର ଉପ-ମୁଖ୍ୟମନ୍ତ୍ରୀ ପଦ ମିଳିଛି । ସେ ଅରବିନ୍ଦ କେଜ୍ରିୱାଲଙ୍କୁ ପରାସ୍ତ କରିଥିଲେ । ପ୍ରକାଶଥାଉ ଯେ ରେଖା ଗୁପ୍ତା ବଣିଆ ସମ୍ପ୍ରଦାୟର । ଦିଲ୍ଲୀରେ ତାଙ୍କର ଅଧିକ ଦବଦବା ରହିଛି ଓ ସେ ରାଷ୍ଟ୍ରୀୟ ମହିଳା ମୋର୍ଚ୍ଚାର ଉପାଧ୍ୟକ୍ଷ ମଧ୍ୟ ରହି ସାରିଛନ୍ତି । ଦିଲ୍ଲୀର ନବମ ମୁଖ୍ୟମନ୍ତ୍ରୀ ଓ ଚତୁର୍ଥ ମହିଳା ମୁଖ୍ୟମନ୍ତ୍ରୀ ହେବେ ରେଖା । ରେଖା ଦକ୍ଷିଣ ଦିଲ୍ଲୀ ନିଗମର ପୂର୍ବତନ ମେୟର ମଧ୍ୟ ଥିଲେ ।
