ନୂଆଦିଲ୍ଲୀ,୨୦।୨: ଭାଜପା ବିଧାୟକ ଦଳର ବୈଠକ ପରେ, ଦିଲ୍ଲୀ ମୁଖ୍ୟମନ୍ତ୍ରୀଙ୍କ ନାମ ଚୂଡ଼ାନ୍ତ ହୋଇଥିଲା। ରେଖା ଗୁପ୍ତା ୨୦ ଫେବୃଆରୀ ଦିନ ୧୨ଟାରେ ଦିଲ୍ଲୀର ରାମଲିଲି ମଇଦାନରେ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି। ଏହି କାର୍ଯ୍ୟକ୍ରମ ପାଇଁ ରାମଲୀଳା ମଇଦାନ ଗେରୁଆ ରଙ୍ଗରେ ରଙ୍ଗିନ ହୋଇଥିଲା। ରେଖା ଗୁପ୍ତା ମଧ୍ୟ ଗେରୁଆ ଶାଢି ପିନ୍ଧି ଶପଥ ନେଇଥିଲେ।
ତେବେ ଶପଥ ନେବା ପୂର୍ବରୁ ଦିଲ୍ଲୀର ମୁଖ୍ୟମନ୍ତ୍ରୀ ରେଖା ଗୁପ୍ତା କହିଥିଲେ ଯେ ସେ ଏକ ଗେରୁଆ ରଙ୍ଗର ଶାଢ଼ି ପିନ୍ଧି ଶପଥ ନେବେ। ସେ ଏହା ମଧ୍ୟ କହିଥିଲେ ଯେ ସେ ନୂଆ ଶାଢ଼ି କିଣି ପାରିନାହାଁନ୍ତି।
ଦିଲ୍ଲୀର ଭବିଷ୍ୟତ ମୁଖ୍ୟମନ୍ତ୍ରୀଙ୍କ ଏହି ବକ୍ତବ୍ୟ ରାଜନୀତିରେ ବହୁତ ଗୁରୁତ୍ୱପୂର୍ଣ୍ଣ। ଏବେ ରେଖା ଗୁପ୍ତା ଦିଲ୍ଲୀର ଆସନରେ ପହଞ୍ଚିବା ପାଇଁ କିପରି ଯାତ୍ରା କରିଥିଲେ ତାହା ଜାଣିବାକୁ ଅନେକଙ୍କର ଆଗ୍ରହ ରହିଛି। ଦିଲ୍ଲୀ ବିଶ୍ୱବିଦ୍ୟାଳୟ ଛାତ୍ର ସଂଘ (DUSU)ର ପୂର୍ବତନ ସଭାପତି ଏବଂ ପ୍ରଥମ ଥର ପାଇଁ ବିଧାୟକ ହୋଇଥିବା ରେଖା ଗୁପ୍ତା ଦିଲ୍ଲୀର ଚତୁର୍ଥ ମହିଳା ମୁଖ୍ୟମନ୍ତ୍ରୀ ଭାବରେ ଶପଥ ନେଇଛନ୍ତି, ଯିଏ ରାଜଧାନୀରେ ମହିଳା କଲ୍ୟାଣ ପାଇଁ ବହୁତ କାମ କରିଛନ୍ତି।
ଦୀର୍ଘ ସମୟ ଧରି ରାଷ୍ଟ୍ରୀୟ ସ୍ବୟଂସେବକ ସଂଘ (ଆରଏସଏସ) ସହିତ ଜଡିତ ୫୦ ବର୍ଷୀୟା ରେଖା ସମ୍ପ୍ରତି ଦିଲ୍ଲୀ ବିଧାନସଭା ନିର୍ବାଚନରେ ଶାଲିମାର ବାଗରୁ ବିଧାୟକ ନିର୍ବାଚିତ ହୋଇଥିଲେ। ଏହା ପରେ, ବୁଧବାର ୧୯ (ଫେବୃଆରୀ) ରେ ତାଙ୍କୁ ଦଳୀୟ ବିଧାୟକ ଦଳର ନେତା ନିର୍ବାଚିତ କରାଯାଇଥିଲା। ଅରବିନ୍ଦ କେଜରିୱାଲଙ୍କ ନେତୃତ୍ୱାଧୀନ ଆମ ଆଦମୀ ପାର୍ଟିର ୧୦ ବର୍ଷର ଶାସନକୁ ଶେଷ କରି ଭାଜପା ୨୭ ବର୍ଷ ପରେ ଦିଲ୍ଲୀରେ କ୍ଷମତାକୁ ଫେରିଛି।
