ପାଟନା,୨୯।୯: ବିହାରର ରାଜଧାନୀ ପାଟନାରେ ଏକ ସାମ୍ବାଦିକ ସମ୍ମିଳନୀରେ ନିର୍ବାଚନର ଚାଣକ୍ୟ କୁହାଯାଉଥିବା ପ୍ରଶାନ୍ତ କିଶୋର ରାଜ୍ୟ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ବିରୋଧ କରି ତାଙ୍କ ନୀତିକୁ ସମାଲୋଚନା କରିଛନ୍ତି।
ବିହାର ବିଧାନସଭା ନିର୍ବାଚନରେ ନୀତୀଶ କୁମାରଙ୍କ ଦଳ ପାଇଁ ପ୍ରଚାର କରିଥିବା ପ୍ରଶାନ୍ତ କିଶୋର ରବିବାର ତାଙ୍କ ନୀତି ତଥା ପ୍ରଶାସନିକ ନିଷ୍ପତ୍ତି ଉପରେ ପ୍ରଶ୍ନ ଉଠାଇଛନ୍ତି।
ସାମ୍ବାଦିକମାନଙ୍କ ସହ କଥାବାର୍ତ୍ତା କରି ପ୍ରଶାନ୍ତ କିଶୋର କହିଛନ୍ତି ଯେ ମୁଁ ପ୍ରଶାସକଙ୍କୁ ବିରୋଧ କରୁଛି ଯିଏ ବିହାରର ଭବିଷ୍ୟତକୁ ଚାରିଜଣ ଅବସରପ୍ରାପ୍ତ ଅଧିକାରୀଙ୍କ ହାତରେ ଛାଡିଛନ୍ତି। ନୀତୀଶ କୁମାର, ଯାହାଙ୍କୁ ମୁଁ ୨୦୧୪ରେ ସାହାଯ୍ୟ କରିଥିଲି, ସେତେବେଳେ ରାଜନୈତିକ ନୈତିକତା ଥିଲା। ଏକ ଉଦାହରଣ ଦେଇ ସେ କହିଛନ୍ତି ଯେ ଯେତେବେଳେ ନୀତୀଶ କୁମାର ରେଳମନ୍ତ୍ରୀ ଥିଲେ, ସେତେବେଳେ ସେ ପଶ୍ଚିମବଙ୍ଗରେ ଏକ ଟ୍ରେନ ଦୁର୍ଘଟଣାରେ ୨୦୦ରୁ ଅଧିକ ଲୋକ ପ୍ରାଣ ହରାଇଥିବା ବେଳେ ସେ ନୈତିକ କାରଣରୁ ଇସ୍ତଫା ଦେଇଥିଲେ।
ସେ କରୋନା ମହାମାରୀ ସମୟରେ ପରିସ୍ଥିତିକୁ ନେଇ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି, ମୁଁ ବିରୋଧ କରୁଥିବା ନୀତୀଶ କୁମାର କରୋନା ମହାମାରୀ ସମୟରେ ବାହାରକୁ ଆସି ନ ଥିଲେ। ଯେତେବେଳେ ହଜାର ହଜାର ଲୋକଙ୍କ ମୃତ୍ୟୁ ହେବା ସହ ଲକ୍ଷ ଲକ୍ଷ ପିଲା ରାସ୍ତାରେ ବୁଲୁଥିଲେ।
ସେ କହିଛନ୍ତି ଯେ ୨୦୧୫ ନିର୍ବାଚନରେ ନୀତୀଶ କୁମାର ପରାଜୟର ସମ୍ମୁଖୀନ ହୋଇନାହାଁନ୍ତି, ତାଙ୍କର ୧୧୭ବିଧାୟକ ଅଛନ୍ତି ଏବଂ ସେ ସଠିକ ନିଷ୍ପତ୍ତି ନେଇଛନ୍ତି। କିନ୍ତୁ, ଯେତେବେଳେ ତାଙ୍କ ଦଳ ୨୦୨୦ବିଧାନସଭା ନିର୍ବାଚନରେ ମାତ୍ର ୪୨ଟି ଆସନ ପାଇଥିଲେ, ତଥାପି ସେ ମୁଖ୍ୟମନ୍ତ୍ରୀ ହେବାକୁ ନିଷ୍ପତ୍ତି ନେଇଥିଲେ, ଯାହା ସାଧାରଣ ଜନତାଙ୍କ ଆଦେଶର ଉଲ୍ଲଂଘନ ଥିଲା।
ପ୍ରଶାନ୍ତ କିଶୋର କହିଛନ୍ତି ଯେ ବିଧାନସଭା ନିର୍ବାଚନର ୨୦୨୦ ଫଳାଫଳ ପରେ ମୁଁ ତାଙ୍କ ସହ କଥା ହୋଇ ତାଙ୍କୁ ମୁଖ୍ୟମନ୍ତ୍ରୀ ନହେବାକୁ ପରାମର୍ଶ ଦେଇଥିଲି। କିନ୍ତୁ, ସେ ସେହି ଦିନ ସା ୬ଟା ୩୦ରେ ମୁଖ୍ୟମନ୍ତ୍ରୀ ପଦ ଗ୍ରହଣ କରିଥିଲେ। ମୁଁ ଭଲ ପ୍ରଶାସନକୁ ସମର୍ଥନ କରୁଥିଲି, କିନ୍ତୁ ବର୍ତ୍ତମାନ ପରିସ୍ଥିତିରେ ମୁଁ ନୀତୀଶ କୁମାରଙ୍କୁ ବିରୋଧ କରୁଛି।
