ନୂଆଦିଲ୍ଲୀ,୧୮।୧୨: ଲୋକ ସଭା ଏବଂ ରାଜ୍ୟ ସଭାରେ ସମ୍ବିଧାନ ଉପରେ ଜୋରଦାର ବିତର୍କ ଚାଲିଥିଲା। ଗୃହମନ୍ତ୍ରୀ ଅମିତ ଶାହଶଙ୍କ ବୟାନକୁ ନେଇ ରାଜନୈତିକ ମହଲରେ ଚର୍ଚ୍ଚା ବଢ଼ିବାରେ ଲାଗିଛି। ସମସ୍ତ ବିରୋଧୀ ଦଳ ଭାଜପାକୁ କଟାକ୍ଷ କରୁଥିବା ବେଳେ ଶାହାଙ୍କ ଇସ୍ତଫା ଦାବି କରୁଛନ୍ତି।
ପୁଣିଥରେ ବାବା ସାହେବ ଡା. ଭିମରାଓ ଆମ୍ବେଦକର ଭାରତୀୟ ରାଜନୀତିରେ ଚର୍ଚ୍ଚାର କେନ୍ଦ୍ରକୁ ଆସିଛନ୍ତି। ଆସନ୍ତୁ ଆପଣଙ୍କୁ ଆମ୍ବେଦକରଙ୍କ ବିଷୟରେ ଏଭଳି ଏକ କଥା ବିଷୟରେ କହିବୁ, ଯାହାକି ଏଯାବତ ଆଜିର ଯୁବପୀଢ଼ି ଅନଭିଜ୍ଞ।
ଦେଶ ସ୍ବାଧୀନ ହେବା ପରେ ଗଣତାନ୍ତ୍ରିକ ଦେଶ ନିର୍ମାଣରେ ଆମ୍ବେଦକରଙ୍କ ପ୍ରମୁଖ ଭୂମିକା ରହିଥିଲା। ବହୁତ କମ୍ ଲୋକ ଜାଣନ୍ତି ସେ ପ୍ରଥମେ ଜଣେ ହିନ୍ଦୁ ଥିଲେ, ହେଲେ ପରେ ସେ ଧର୍ମ ପରିବର୍ତ୍ତନ କରି ବୌଦ୍ଧ ଧର୍ମ ଆପଣାଇଥିଲେ।
ଆମ୍ବେଦକର ଭାବୁଥିଲେ ଯେ ଜାତି ପ୍ରଥା ଥିବା ଯୋଗୁ ହିନ୍ଦୁ ଧର୍ମରେ କରୁଣା, ସମାନତା ଏବଂ ସ୍ବାଧୀନତା ଭଳି ବ୍ୟକ୍ତିର ବିକାଶ ଲାଗି ଜରୁରୀ ତତ୍ତ୍ୱର ଅଭାବ ରହିଛି। ସେ ହିନ୍ଦୁ ଧର୍ମରେ ଥିବା ବର୍ଣ୍ଣ ବ୍ୟବସ୍ଥାକୁ ଶେଷ କରିବାକୁ ଆଇନର ଆଶ୍ରା ନେଇଥିଲେ। ପରେ ସେ ବୁଝି ଯାଇଥିଲେ ଯେ ଯେଉଁ ପରିବର୍ତ୍ତନ ସେ ଚାହାନ୍ତି, ତାହା କେବେ ବି ସମ୍ଭବ ନୁହେଁ।
ବୌଦ୍ଧ ଧର୍ମ ଗ୍ରହଣ କରିବା ପୂର୍ବରୁ ଆମ୍ବେଦକର ଅନ୍ୟ ଧର୍ମ ଉପରେ ବିଚାର କରିଥିଲେ। ହେଲେ ଶେଷରେ ବେଦ୍ଧ ଧର୍ମକୁ ବାଛିଥିଲେ। ୧୩ ଅକ୍ଟୋବର ୧୯୩୫ରେ ସେ ହିନ୍ଦୁ ଧର୍ମ ଛାଡ଼ିବା ନେଇ ଘୋଷଣା କରି ସମସ୍ତଙ୍କୁ ଚମକାଇଥିଲେ। ସେତେବେଳେ ସେ ଭିନ୍ନ ଧର୍ମକୁ ଆପଣାଇବେ ବୋଲି ଅନୁମାନ କରାଯାଇଥିଲା। ହେଲେ ୨୧ ବର୍ଷ ଯାଏ ସେ ହିନ୍ଦୁ ଧର୍ମ ସହ ଜଡ଼ିତ ଥିଲେ।
୧୯୫୬,ଅକ୍ଟୋବର ୧୪ରେ ଆମ୍ବେଦକର ନାଗପୁରରେ ନିଜର ୩.୬୫ ଲକ୍ଷ ସମର୍ଥକଙ୍କ ସହ ହିନ୍ଦୁ ଧର୍ମ ଛାଡ଼ି ବୌଦ୍ଧ ଧର୍ମ ଆପଣାଇଥିଲେ। ତାଙ୍କର ଏହି ପଦକ୍ଷେପକୁ ଧର୍ମ ପରିବର୍ତ୍ତନର ସବୁଠାରୁ ବଡ଼ ଘଟଣା ଭାବେ ବିବେଗନା କରାଯାଏ। ସେତେବେଳେ ସେ କହିଥିଲେ ଯେ, ହିନ୍ଦୁ ଭାବେ ଜନ୍ମ ହୋଇଛି ସତ, ହେଲେ ହିନ୍ଦୁ ଭାବେ ମରିବି ନାହିଁ, ଅନ୍ତତଃପକ୍ଷେ ଏହା ମୋ ସାଧ୍ୟରେ ରହିଛି।
