ନୂଆଦିଲ୍ଲୀ,୧୧।୧: ଗତ କିଛି ଦିନ ହେବ BCCI ଏବଂ ବାଂଲାଦେଶ କ୍ରିକେଟ ବୋର୍ଡ ମଧ୍ୟରେ ବିବାଦ ବଢ଼ିବାରେ ଲାଗିଛି। BCCI ନିର୍ଦ୍ଦେଶରେ KKR ଫ୍ରାଞ୍ଚାଇଜ୍ ଷ୍ଟାର୍ ବୋଲର ମୁସ୍ତାଫିଜୁର ରହମାନଙ୍କୁ ଦଳରୁ ବାଦ୍ ଦେବା ପରେ ଏହା ତୀବ୍ର ହୋଇଛି। ଏହାର ଜବାବରେ ବାଂଲାଦେଶ ସରକାର ନିଜ ଦେଶରେ IPL ପ୍ରସାରଣ ଉପରେ ରୋକ୍ ଲଗାଇବା ସହ ଭାରତରେ ଟି-୨୦ ବିଶ୍ୱକପ୍ ଖେଳିବାକୁ ନେଇ ସୁରକ୍ଷା ଚିନ୍ତା ପ୍ରକଟ କରିଥିଲେ।
ଏହି ସବୁ ବିବାଦ ଭିତରେ ଭଦୋଦରାରେ ଅନୁଷ୍ଠିତ ଭାରତ ବନାମ ନ୍ୟୁଜିଲାଣ୍ଡ ପ୍ରଥମ ଦିନିକିଆରେ ବାଂଲାଦେଶର ଶରଫୁଦ୍ଦୌଲା ସାଇକତଙ୍କୁ ତୃତୀୟ ଅମ୍ପାୟର ଭାବେ ନିଯୁକ୍ତି ମିଳିଛି। ଯେଉଁଠାରେ ବାଂଲାଦେଶ ବୋର୍ଡ ନିଜ ଖେଳାଳିଙ୍କ ସୁରକ୍ଷାକୁ ନେଇ ଭୟଭୀତ ଥିଲା, ସେଠାରେ ନିଜ ଦେଶର ଅମ୍ପାୟରଙ୍କୁ ଭାରତ ପଠାଇବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।
ଏହି ପ୍ରସଙ୍ଗରେ ବାଂଲାଦେଶ କ୍ରିକେଟ ବୋର୍ଡର କୌଣସି ହାତ ନାହିଁ। ଏହାର ମୁଖ୍ୟ କାରଣ ହେଉଛି ICC ର ଅମ୍ପାୟରିଂ ବ୍ୟବସ୍ଥା। ଆନ୍ତର୍ଜାତୀୟ ଅମ୍ପାୟରମାନେ ସିଧାସଳଖ ICC ସହିତ ଚୁକ୍ତିବଦ୍ଧ ହୋଇଥାନ୍ତି। ଅମ୍ପାୟରମାନେ ‘ICC ଏଲିଟ୍ ପାନେଲ’ ଏବଂ ‘ICC ଇଣ୍ଟରନ୍ୟାସନାଲ ପାନେଲ’ ଅନ୍ତର୍ଗତ କାର୍ଯ୍ୟ କରନ୍ତି। କୌଣସି ବି ମ୍ୟାଚ୍ରେ କେଉଁ ଅମ୍ପାୟର ରହିବେ, ତାହା ICC ନିର୍ଦ୍ଧାରଣ କରେ, ସମ୍ପୃକ୍ତ ଦେଶର ବୋର୍ଡ ନୁହେଁ। ଅମ୍ପାୟର ଶରଫୁଦ୍ଦୌଲା ICC ର ଏଲିଟ୍ ପାନେଲର ସଦସ୍ୟ ହୋଇଥିବାରୁ ତାଙ୍କର ନିଯୁକ୍ତି ସମ୍ପୂର୍ଣ୍ଣ ରୂପେ ICC ଦ୍ୱାରା ନିୟନ୍ତ୍ରିତ। ତେଣୁ BCB ଚାହିଁଲେ ମଧ୍ୟ ତାଙ୍କୁ ଭାରତ ଆସିବାରୁ ଅଟକାଇ ପାରିବ ନାହିଁ।
