ନୂଆଦିଲ୍ଲୀ,୨୮।୧: କେନ୍ଦ୍ର ସରକାର ପରବର୍ତ୍ତୀ ମୁଖ୍ୟ ନିର୍ବାଚନ କମିଶନର (CEC)ଙ୍କ ନିଯୁକ୍ତି ପାଇଁ ନାମ ତାଲିକା ପ୍ରସ୍ତୁତ କରିବା ପାଇଁ କେନ୍ଦ୍ର ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲଙ୍କ ଅଧ୍ୟକ୍ଷତାରେ ଏକ ସର୍ଚ୍ଚ କମିଟି ଗଠନ କରିଛନ୍ତି। ଏକ ନିର୍ଦ୍ଦେଶକୁ ଉଦ୍ଧୃତ କରି, ସୋମବାର (ଜାନୁଆରୀ ୨୭, ୨୦୨୫)ରେ ବିଶେଷ ସୂତ୍ରରୁ ଏହି ସୂଚନା ମିଳିଛି। ଏହି କମିଟିର ଦୁଇ ସଦସ୍ୟଙ୍କ ମଧ୍ୟରେ ଅର୍ଥ ବିଭାଗର ସଚିବ ଏବଂ କର୍ମଚାରୀ ଏବଂ ତାଲିମ ବିଭାଗର ସଚିବ ଅଛନ୍ତି।
ସୂଚନା ଅନୁଯାୟୀ, ଜାନୁଆରୀ ୧୭ ତାରିଖରେ କେନ୍ଦ୍ର ଆଇନ ମନ୍ତ୍ରଣାଳୟ ଦ୍ୱାରା ଜାରି ଏକ ଆଦେଶ ଅନୁଯାୟୀ ସର୍ଚ୍ଚ କମିଟି ଗଠନ କରାଯାଇଥିଲା ଏବଂ ଏହାର ବୈଠକ ଜାନୁଆରୀ ୩୧ ତାରିଖରୁ ଆରମ୍ଭ ହେଉଥିବା ସଂସଦର ବଜେଟ ଅଧିବେଶନ ସମୟରେ ହୋଇପାରେ। ଏପର୍ଯ୍ୟନ୍ତ ସବୁଠାରୁ ବରିଷ୍ଠ ନିିର୍ବାଚନ କମିଶନରଙ୍କୁ ସିଇସିଙ୍କ ଅବସର ପରେ ମୁଖ୍ୟ ନିର୍ବାଚନ କମିଶନର ଭାବରେ ପଦୋନ୍ନତି ଦିଆଯାଉଥିଲା। ତଥାପି, ଗତ ବର୍ଷ ସିଇସି ଏବଂ ନିର୍ବାଚନ କମିଶନର (ଇସି)ଙ୍କ ନିଯୁକ୍ତି ସମ୍ପର୍କିତ ଏକ ନୂତନ ଆଇନ କାର୍ଯ୍ୟକାରୀ ହେବା ପରେ ନିଯୁକ୍ତି ପ୍ରକ୍ରିୟାରେ ପରିବର୍ତ୍ତନ ଆସିଛି।
ପାଞ୍ଚ ଜଣ ସଚିବ ସ୍ତରୀୟ ଅଧିକାରୀଙ୍କ ନାମର ଏକ ତାଲିକା ପ୍ରସ୍ତୁତ କରୁଛି। ସିଇସି ରାଜୀବ କୁମାର ଫେବୃଆରୀ ୧୮ରେ ୬୫ ବର୍ଷ ବୟସରେ ଅବସର ନେବେ। ପ୍ରଥମ ଥର ପାଇଁ ମୁଖ୍ୟ ନିର୍ବାଚନ କମିଶନର ଏବଂ ଅନ୍ୟାନ୍ୟ ନିିର୍ବାଚନ କମିଶନର (ନିଯୁକ୍ତି, ସେବା ସର୍ତ୍ତାବଳୀ ଏବଂ କାର୍ଯ୍ୟକାଳ) ଆଇନ, ୨୦୨୩ର ବ୍ୟବସ୍ଥାଗୁଡ଼ିକୁ ମୁଖ୍ୟ ନିର୍ବାଚନ କମିଶନରଙ୍କ ନିଯୁକ୍ତି ପାଇଁ ପ୍ରବର୍ତ୍ତନ କରାଯାଉଛି। ଗତ ବର୍ଷ ଅନୁପ ଚନ୍ଦ୍ର ପାଣ୍ଡେଙ୍କ ଅବସର ଏବଂ ଅରୁଣ ଗୋଏଲଙ୍କ ଇସ୍ତଫା ପରେ ସୃଷ୍ଟି ହୋଇଥିବା ଖାଲି ପଦବୀ ପୂରଣ ପାଇଁ ନିର୍ବାଚନ କମିଶନର ଜ୍ଞାନେଶ କୁମାର ଏବଂ ଏସ ଏସ ସାନ୍ଧୁଙ୍କୁ ନିଯୁକ୍ତି ଦେବା ପାଇଁ ଏହି ଆଇନ ବ୍ୟବହାର କରାଯାଇଥିଲା।
