ଲଣ୍ଡନ,୨୦ା୩:ଫିନ୍ଲାଣ୍ଡ ବିଶ୍ୱର ସବୁଠୁ ସୁଖୀ ରାଷ୍ଟ୍ର ଭାବେ ନିଜର ମାନ୍ୟତା ବଜାୟ ରଖିଛି। କ୍ରମାଗତ ଭାବେ ୯ମ ଥର ପାଇଁ ବିଶ୍ୱର ସବୁଠୁ ସୁଖୀ ରାଷ୍ଟ୍ର ସୂଚୀ (ଓ୍ବାର୍ଲଡ ହାପିନେସ୍ ରିପୋର୍ଟ)ରେ ଏହି ଦେଶ ସର୍ବାଗ୍ରେ ରହିଛି। କେବଳ ଫିନ୍ଲାଣ୍ଡ ନୁହେଁ, ଡେନ୍ମାର୍କ, ସୁଇଡେନ ଏବଂ ନରଓ୍ବେ ଭଳି ଉତ୍ତର ଆଟଲାଣ୍ଟିକ୍ର ବିଭିନ୍ନ ଦେଶ ଏହି ରିପୋର୍ଟର ପ୍ରଥମ ୧୦ ସ୍ଥାନରେ ରହିଛନ୍ତି। ଅକ୍ସଫୋର୍ଡ ୟୁନିଭର୍ସିଟିର ଓ୍ବେଲ୍ବିଙ୍ଗ ରିସର୍ଚ୍ଚ ସେଣ୍ଟର ପକ୍ଷରୁ ପ୍ରତିବର୍ଷ ଓ୍ବାର୍ଲଡ ହାପିନେସ୍ ରିପୋର୍ଟ ପ୍ରକାଶ କରାଯାଇଥାଏ। ସାମ୍ପ୍ରତିକ ସମୟରେ ଫିନ୍ଲାଣ୍ଡବାସୀ ବିଶ୍ୱର ସବୁଠୁ ଖୁସି ନାଗରିକ ହେବାର ସୌଭାଗ୍ୟ ବଜାୟ ରଖିଛନ୍ତି।
ଜାତିସଂଘର ସଷ୍ଟେନେବଲ ଡେଭଲପମେଣ୍ଟ ସଲ୍ୟୁଶନ ନେଟ୍ଓ୍ବର୍କ ଏବଂ ଗ୍ୟାଲପ୍ ନାମକ ଘରୋଇ ସଂସ୍ଥାର ମିଳିତ ଉଦ୍ୟମରେ ୧୪୦ଟି ଦେଶର ଲୋକଙ୍କ ମତାମତକୁ ନେଇ ଏହି ରିପୋର୍ଟ ପ୍ରସ୍ତୁତ କରାଯାଇଥାଏ। ଭାରତ ଏହି ତାଲିକାରେ ୧୧୬ତମ ସ୍ଥାନରେ ରହିଥିଲାବେଳେ ଯୁଦ୍ଧ ଲଢୁଥିବା ଇସ୍ରାଏଲ ଏବଂ ଇରାନ୍ ଭାରତ ଠାରୁ ଭଲ ସ୍ଥାନରେ ରହିଛନ୍ତି। ଏହି ଦୁଇ ଦେଶର ସ୍ଥାନ ୯୭ତମ ସ୍ଥାନରେ ରହିଛି। ଆମେରିକାର ସ୍ଥାନ ୨୩ ରହିଥିଲାବେଳେ କାନାଡ଼ା ୨୫ ଏବଂ ବ୍ରିଟେନ ସ୍ଥାନ ୨୯ ରହିଛି। ହାପିନେସ୍ ରିପୋର୍ଟ ଅନୁଯାୟୀ ଭାରତରେ ହାରାହାରି ଜୀବନକାଳ ୫୮.୨ ବର୍ଷ ରହିଛି। ସ୍ବାଧୀନତା ମାପଦଣ୍ଡକୁ ନେଇ ଭାରତର ସ୍ଥାନ ୬୧ ରହିବା ସହ ଦୁର୍ନୀତି କ୍ଷେତ୍ରରେ ୬୪ ରହିଛି। ତେବେ ସୋସିଆଲ ମିଡିଆର ପ୍ରଭାବ ଯୁବପିଢିଙ୍କ ସୁଖ ଏବଂ ଜୀବନଶୈଳୀକୁ ଯଥେଷ୍ଟ ମାତ୍ରାରେ ପ୍ରଭାବିତ କରଥିବା ରିପୋର୍ଟରେ କୁହାଯାଇଛି। ବିଶେଷକରି ଇଂରାଜୀ ଭାଷାଭାଷୀ ପଶ୍ଚିମ ୟୁରୋପୀୟ ଦେଶଗୁଡିକରେ କିଶୋର ବର୍ଗ ସୋସିଆଲ ମିଡିଆ ପ୍ରଭାବରେ ନିଜର ସୁଖ ସ୍ବାଚ୍ଛନ୍ଦ୍ୟ ନଷ୍ଟକରି ସ୍ବାସ୍ଥ୍ୟଗତ ଦୃଷ୍ଟିରୁ ଅବନତିମୁହାଁ ହେଉଛନ୍ତି ବୋଲି ଏହି ରିପୋର୍ଟରେ କୁହାଯାଇଛି।
Dharitri – Odisha’s No.1 Odia Daily
