ଲକ୍ଷ୍ନୌ: ଆପଣ ଶୁଆ ପାଳିଛନ୍ତି କି? ତା’ହେଲେ ସାବଧାନ ହୋଇଯାଆନ୍ତୁ, ଆପଣଙ୍କୁ ଜରିମାନା ତ ଦେବାକୁ ପଡ଼ିବ ତା’ ସହ ୩ ବର୍ଷ ଜେଲ ଦଣ୍ଡ ବି ଭୋଗିବାକୁ ହେବ। ଏମିତି ଏକ ଆଇନ ହୋଇଛି ଉତ୍ତରପ୍ରଦେଶର କାନପୁରରେ। ଏଠାରେ ବନବିଭାଗ ପକ୍ଷରୁ ଶୁଆ ଏବଂ ମାଙ୍କଡ଼କୁ ଘରେ ପାଳିବା ନେଇ କଟକଣା ଜାରି କରାଯାଇଛି। ବନବିଭାଗ ଆଇନ ଅନୁସାରେ ଏମାନଙ୍କୁ ଘରେ ପାଳିବା ଅର୍ଥ ବନ୍ଦୀ କରିରଖିବା ସହ ସମାନ। ତେଣୁ ବନ୍ୟଜନ୍ତୁ ସଂରକ୍ଷଣ ଅଧିନିୟମ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ। କେହି ଯଦି ଏହି ଜୀବଙ୍କୁ ଘରେ ରଖିବେ ତା’ହେଲେ ତାଙ୍କୁ ୩ ବର୍ଷର ଜେଲ ଦଣ୍ଡ ସହିତ ୨୫ ହଜାର ଟଙ୍କା ଜରିମାନା ଦେବାକୁ ପଡ଼ିବ।
ବନ୍ୟଜନ୍ତୁ ସଂରକ୍ଷଣ ପାଇଁ ଏହି ନିୟମରେ ସଂଶାଧନ କରାଯାଇ ଏପରି ନିର୍ଦ୍ଦେଶନାମା ଜାରି କରାଯାଇଛି। ତେଣୁ କେହି ବି ଏଭଳି ଜୀବଙ୍କୁ ଘରେ ପାଳିଥିଲେ ସେମାନେ ଦଣ୍ଡିତ ହେବେ। ତେଣୁ ବନ ବିଭାଗ ଏହି ନିୟମ ଜାରି କରିବା ପରେ ଲୋକଙ୍କୁ ସଚେତନ କରାଇଛି। କୌଣସି ପରିସ୍ଥିତିରେ ବି ଏହି ଜୀବମାନଙ୍କୁ ଯେପରି କେହି ଘରେ ନ ରଖନ୍ତି ସେଥି ନେଇ ନିର୍ଦ୍ଦେଶ ଜାରି କରିଛି। ବର୍ତ୍ତମାନ ପରିସ୍ଥିତିରେ ସବୁ ଅଞ୍ଚଳରେ ଜଙ୍ଗଲ ସଂଖ୍ୟା କମିବା ସହିତ ବନ୍ୟଜନ୍ତୁଙ୍କ ସଂଖ୍ୟା ମଧ୍ୟ କମିଯାଉଛି। ଏମିତି କି କେତେକ ପ୍ରଜାତିର ଜୀବଜନ୍ତୁ ସମ୍ପୂର୍ଣ୍ଣ ଲୋପ ପାଇଗଲେଣି। ମଣିଷ ସମାଜର ଅତ୍ୟାଚାର ଯୋଗୁ ଜଙ୍ଗଲ ଓ ଜୀବଜନ୍ତୁଙ୍କ ଏପରି ଅବସ୍ଥା ସୃଷ୍ଟି ହୋଇଛି। ତେଣୁ ଲୋକଙ୍କ ବ୍ୟବହାର ବଦଳାଇବା ଉଦ୍ଦେଶ୍ୟରେ ବନ ବିଭାଗ ଏପରି ପଦକ୍ଷେପ ନେଇଥିବା ସ୍ପଷ୍ଟ କରିଛି।
