ନୂଆଦିଲ୍ଲୀ,୧୬।୧: ଇଣ୍ଡିଗୋ ବିମାନରେ ପାଇଲଟଙ୍କୁ ମାରପିଟ୍ କରିବା ମାମଲା ଚର୍ଚ୍ଚାରେ ରହିଛି। ଏହି ଘଟଣାର ଭିଡିଓ ଭାଇରାଲ ହୋଇଥିଲା। ଭିଡିଓରେ ଜଣେ ଯାତ୍ରୀ ପାଇଲଟଙ୍କୁ ଚାପୁଡ଼ା ମାରୁଥିବା ଦେଖାଯାଇଥିଲା। ଏବେ ଅଭିଯୁକ୍ତ ଯାତ୍ରୀ ସାହିଲ କଟାରିଆ କ୍ଷମାପ୍ରାର୍ଥନା କରୁଥିବାର ଭିଡିଓ ସାମ୍ନାକୁ ଆସିଛି।
ରବିବାର ଅପରାହ୍ନର ଏହି ଘଟଣା। କୁହୁଡ଼ି କାରଣରୁ ଅନେକ ବିମାନ ଯାତ୍ରାରେ ବିଳମ୍ବ ହୋଇଥିଲା। ଏନେଇ ପାଇଲଟ ଅନୁପ କୁମାର ଘୋଷଣା କରୁଥିବା ବେଳେ ରାଗରେ ଗରଗର ହୋଇ ସାହିଲ ତାଙ୍କୁ ଚାପୁଡ଼ା ମାରିଥିଲେ। ଏହାପରେ ଅନୁପ ଦିଲ୍ଲୀ ପୋଲିସ ନିକଟରେ ଘଟଣା ସମ୍ପର୍କିତ ଏକ ଅଭିଯୋଗ କରିଥିଲେ। ଏବେ ୨୮ ବର୍ଷୀୟ ସାହିଲଙ୍କୁ ଜାମିନ ମିଳିଥିବା ବେଳେ ଇଣ୍ଡିଗୋ ପକ୍ଷରୁ ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରେ ବୋଲି କୁହାଯାଉଛି।
କହିରଖୁଛୁ, ରବିବାର ସକାଳ ୭ଟା ୪୦ ମିନିଟ୍ରେ ବିମାନ ଉଡ଼ାଣ ଭରିଥାନ୍ତା। ହେଲେ ଦୃଶ୍ୟମାନ କମ୍ ହେଉଥିବା କାରଣରୁ ଅପରାହ୍ନ ୩ଟା ଯାଏ ବିମାନ ଅଟକି ରହିଥିଲା। ଏନେଇ ପାଇଲଟ ଘୋଷଣା କରୁଥିବା ବେଳେ ସାହିଲ ଆକ୍ରମଣ କରିଥିଲେ। ସୋସିଆଲ ମିଡିଆରେ ଭାଇରାଲ ଫୁଟେଜ୍ରେ ଅଭିଯୁକ୍ତଜଣଙ୍କ ‘ଯିବାର ଅଛି ଯଦି ଚାଲ, ନହେଲେ ଗେଟ୍ ଖୋଲ’ ବୋଲି କହୁଥିବା ଦେଖାଯାଉଛି। ଏବେ ଅନ୍ୟ ଏକ ଭିଡିଓରେ ସେ ପାଇଲଟ୍ଙ୍କୁ କ୍ଷମା ମାଗୁଛନ୍ତି।
ପୋଲିସ ମୁତାବକ, ଦକ୍ଷିଣ ଦିଲ୍ଲୀର ଅମର କଲୋନୀ ନିବାସୀ ସାହିଲ ଏକ ଖେଳନା ଏବଂ ଅଳଙ୍କାର ଦୋକାନ ରହିଛି। ରବିବାର ସେ ନିଜ ସ୍ତ୍ରୀଙ୍କ ସହ ହନିମୁନରେ ଗୋଆ ଯାଉଥିଲେ। ହେଲେ ବିମାନ ଉଡ଼ାଣରେ ବିଳମ୍ବ ହେଉଥିବାରୁ ସେ ନିରାଶ ହୋଇ ଏଭଳି କାଣ୍ଡ ଘଟାଇଛନ୍ତି।
