ବାଲେଶ୍ୱର ଅଫିସ, ୬ା୨: ବାଲେଶ୍ୱର ଜିଲା ରେମୁଣା ବ୍ଲକ ଚଷାଖଣ୍ଡ ପଞ୍ଚାୟତରେ ୩ ଜଣ ପ୍ରାର୍ଥୀ ନିଜକୁ ଗୋଟିଏ ଦଳର ସମର୍ଥିତ ଦାବି କରି ନିର୍ବାଚନ ପ୍ରଚାର ଜାରି ରଖିଛନ୍ତି। ଏହାକୁ ନେଇ ଦ୍ୱନ୍ଦ୍ୱରେ ପଡ଼ିଛନ୍ତି ଭୋଟର। କିନ୍ତୁ ଦଳ ଗୋଟିଏ ଗୁଳିରେ ତିନୋଟି ଶିକାର କରିବାକୁ ଲକ୍ଷ୍ୟ ରଖିଛି। ଯିଏ ଜିତିବ ସେ ଦଳର। ସମସ୍ତଙ୍କ ବେକରେ ଶଙ୍ଖ ଚିହ୍ନର ଉତ୍ତରୀୟ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ବଚ୍ଛ ଶାସନ ଏବଂ ଜନହିତକର ଯୋଜନାକୁ ଲୋକଙ୍କ ପାଖରେ ପହଞ୍ଚାଇ ସେମାନେ ବିଜେଡିର ଅସଲି ପ୍ରାର୍ଥୀ ବୋଲି ଦାବି କରୁଛନ୍ତି। ଏଥିରୁ ବାଲେଶ୍ୱର ବିଜେଡିରେ ଥିବା ଗୋଷ୍ଠୀକନ୍ଦଳ ପଦାରେ ପଡ଼ିଥିବା ପରିଲକ୍ଷିତ ହେଉଛି।
ବାଲେଶ୍ୱର ବିଜେଡିରେ ଚାଲିଛି ଶୀତଳ ଯୁଦ୍ଧ। ୩ ଗୋଷ୍ଠୀରେ ଚାଲିଛି ଛକାପଞ୍ଝା। ବର୍ତ୍ତମାନର ବିଧାୟକ ସୁଧାଂଶୁ ଶେଖର ପରିଡ଼ା ଏବଂ ବ୍ଲକ ସଭାପତିଙ୍କ ଅନୁମୋଦନକ୍ରମେ ଚଷାଖଣ୍ଡ ପଞ୍ଚାୟତରେ ସରପଞ୍ଚ ପ୍ରାର୍ଥୀ ଭାବେ ସୁବାସ ଲେଙ୍କା, ସମିତିସଭ୍ୟ ଭାବେ ନବନିତା ବାରିକ ପ୍ରତିଦ୍ୱନ୍ଦ୍ୱିତା କରୁଥିବା ବେଳେ ପୂର୍ବତନ ବିଧାୟକ ସୁଦର୍ଶନ ଜେନାଙ୍କ ସମର୍ଥନରେ ସରପଞ୍ଚ ପ୍ରାର୍ଥୀ ଭାବେ କେଦାର ସାହୁ ଓ ସମିତିସଭ୍ୟ ଭାବେ ସେକ୍ ଆଲିହସେନ୍ ଖୁଲମ୍ଖୁଲା ଭାବେ ବିଜେଡି ଗାମୁଛାକୁ ବେକରେ ପକାଇ ଘରକୁ ଘର ବୁଲି ପ୍ରଚାର କରୁଛନ୍ତି। ଅନ୍ୟପକ୍ଷରେ ସରପଞ୍ଚ ପ୍ରାର୍ଥୀ ଶରତ ନାୟକ ଓ ସମିତିସଭ୍ୟ ଅଜୟ ବେହେରା ନିଜ ବ୍ୟାନର୍ରେ ସୌଜନ୍ୟ ସୁବାସିନୀ ଜେନାଙ୍କ ନାମ ଲେଖି ବିଭିନ୍ନ ସ୍ଥାନରେ ଲଗାଇଛନ୍ତି। ଏଥିରୁ ଉକ୍ତ ୩ ଗୋଷ୍ଠୀ ଶଙ୍ଖ ଚିହ୍ନ ନାମରେ ନିର୍ବାଚନୀ ବୈତରଣୀ ପାରି ହେବାର ସ୍ପଷ୍ଟ ହେଉଛି। ଏହାକୁ ନେଇ ବିରୋଧୀଙ୍କ ମଧ୍ୟରେ ଚର୍ଚ୍ଚା ଜୋର୍ ଧରିଛି। ଏନେଇ ଦଳୀୟ ଟିକେଟରେ ୩୯ନଂ. ଜୋନ୍ରେ ବିଜେଡିରୁ ଟିକେଟ୍ ପାଇ ଜିଲା ପରିଷଦ ପ୍ରାର୍ଥତ୍ନୀ ଭାବେ ପ୍ରତିଦ୍ୱନ୍ଦ୍ୱିତା କରୁଥିବା କବିତା ପାଣି କହନ୍ତି, ଦଳ ସରପଞ୍ଚ ପ୍ରାର୍ଥୀ ଭାବେ ସୁବାସ ଲେଙ୍କା ଓ ସମିତିସଭ୍ୟ ଭାବେ ନବନିତା ବାରିକଙ୍କୁ ସମର୍ଥନ ଜଣାଇଥିବାରୁ ତାଙ୍କ ସହ ମିଶି ପ୍ରଚାର ଜାରି ରଖିଛି। ଅନ୍ୟମାନେ କହୁଛନ୍ତି ବିଜେଡିର। କିନ୍ତୁ ସେମାନେ ଦଳର ନୁହନ୍ତି ବୋଲି କହିଛନ୍ତି।
ପୂର୍ବତନ ବିଧାୟକ ସୁଦର୍ଶନ ଜେନା କାନ୍ଧରେ ବିଜେଡି ଗାମୁଛା ପକାଇ ମୁଖ୍ୟମନ୍ତ୍ରୀ ନବୀନ ବାବୁଙ୍କର ସୁଶାସନ ଜନ୍ମରୁ ମୃତ୍ୟୁ ପର୍ଯ୍ୟନ୍ତ ପ୍ରଣୟନ ହୋଇଥିବା ଜନହିତକର ଯୋଜନାକୁ ପ୍ରଚାର କରି ସରପଞ୍ଚ ପ୍ରାର୍ଥୀ କେଦାର ସାହୁ ଓ ସମିତିସଭ୍ୟ ସେକ୍ ଆଲିହସେନ୍ଙ୍କ ସହ ଗାଁ ଗାଁ ବୁଲି ପ୍ରଚାର କରୁଛନ୍ତି।
ସରପଞ୍ଚ ପ୍ରାର୍ଥୀ ସୁବାସ ଲେଙ୍କା କହନ୍ତି, ରେମୁଣା ବିଧାୟକ ଏବଂ ବ୍ଲକ ସଭାପତିଙ୍କ ଅନୁମୋଦନକ୍ରମେ ପ୍ରାର୍ଥୀ ହୋଇଛି। ମୁଁ ୧୦ବର୍ଷ ଧରି ପଞ୍ଚାୟତରେ ବିଜେଡି ସଭାପତି ଭାବେ କାର୍ଯ୍ୟ କରିଆସୁଛି। ଦଳର ସମର୍ଥନରୁ ସରପଞ୍ଚ ପ୍ରାର୍ଥୀ ଭାବେ ପ୍ରତିଦ୍ୱନ୍ଦ୍ୱିତା କରୁଛି। ଆଉ କିଏ କ’ଣ ପ୍ରଚାର କରୁଛି ସେମାନେ ଦଳର ନୁହନ୍ତି। କିଛି ଲୋକ ମୁଖ୍ୟମନ୍ତ୍ରୀ ଓ ସ୍ଥାନୀୟ ବିଧାୟକଙ୍କ ନିର୍ମଳ ଓ ସ୍ବଚ୍ଛ ଶାସନ ନାଁ ନେଇ ନିର୍ବାଚନୀ ବୈତରଣୀ ପାରି ହେବା ପାଇଁ ଚେଷ୍ଟା ଚଳାଇଥିବା ପ୍ରକାଶ କରିଛନ୍ତି।