ନୂଆଦିଲ୍ଲୀ,୧୩।୮: ଭାରତର ଦୁଇ ପ୍ରମୁଖ ଘରୋଇ ବ୍ୟାଙ୍କ ଏଚ୍ଡିଏଫ୍ସି ଏବଂ ଆଇସିଆଇସିଆଇ ନିକଟରେ ସେଭିଙ୍ଗ୍ସ ଆକାଉଣ୍ଟ ପାଇଁ ମିନିମମ ଏଭରେଜ ବାଲାନ୍ସ (MAB) ନିୟମରେ ବଡ଼ ପରିବର୍ତ୍ତନ ଆଣିଛନ୍ତି। ଆଇସିଆଇସିଆଇ ବ୍ୟାଙ୍କ ଏବେ ମେଟ୍ରୋ ଓ ସହରାଞ୍ଚଳରେ ରହୁଥିବା ଗ୍ରାହକଙ୍କୁ ଆକାଉଣ୍ଟରେ ହାରାହାରି ୫୦,୦୦୦ ଟଙ୍କା ରଖିବାକୁ କହିଛି, ଯାହା ପୂର୍ବରୁ ମାତ୍ର ୧୦,୦୦୦ ଟଙ୍କା ଥିଲା। ଅର୍ଦ୍ଧ-ସହରାଞ୍ଚଳରେ ଏହି ରାଶି ୫,୦୦୦ ଟଙ୍କାରୁ ବଢ଼ି ୨୫,୦୦୦ ଟଙ୍କା ହୋଇଛି, ଆଉ ଗ୍ରାମାଞ୍ଚଳରେ ୫,୦୦୦ ଟଙ୍କା ବଦଳରେ ଏବେ ୧୦,୦୦୦ ଟଙ୍କା ରଖିବାକୁ ପଡ଼ିବ। ସେହିପରି ଏଚଡିଏଫସି ବ୍ୟାଙ୍କ ମଧ୍ୟ ସେଭିଙ୍ଗ୍ସ ଆକାଉଣ୍ଟର ମିନିମମ ବାଲାନ୍ସ ୧୦,୦୦୦ ଟଙ୍କାରୁ ବଢ଼ାଇ ୨୫,୦୦୦ ଟଙ୍କା କରିଛି। ଯଦି ଆକାଉଣ୍ଟରେ ଏହି ରାଶି ନ ରହେ, ତେବେ ବ୍ୟାଙ୍କ ଗ୍ରାହକଙ୍କଠାରୁ ଜରିମାନା ଆଦାୟ କରିପାରେ। ତେବେ ଏହି ନିୟମ ୧ ଅଗଷ୍ଟ ୨୦୨୫ ପରେ ନୂଆ ଆକାଉଣ୍ଟ ଖୋଲିଥିବା ଗ୍ରାହକଙ୍କ ଉପରେ ଲାଗୁ ହେବ। ପୁରୁଣା ଖାତାଧାରୀଙ୍କ ପାଇଁ ପୁରୁଣା ନିୟମ ହିଁ ଜାରି ରହିବ।
ମିନିମମ ଏଭରେଜ ବାଲାନ୍ସ କ’ଣ?
ଯେତେବେଳେ ଜଣେ ବ୍ୟକ୍ତି ବ୍ୟାଙ୍କରେ ସେଭିଙ୍ଗ୍ସ ଆକାଉଣ୍ଟ ଖୋଲନ୍ତି, ତେବେ ବ୍ୟାଙ୍କ ତାଙ୍କୁ ପ୍ରତି ମାସରେ ଏକ ନିର୍ଦ୍ଧିଷ୍ଟ ରାଶି ଆକାଉଣ୍ଟରେ ରଖିବାକୁ କୁହେ। ଏହାକୁ ମିନିମମ ଏଭରେଜ ବାଲାନ୍ସ (MAB) କୁହାଯାଏ। ଏହି ରାଶି ବ୍ୟାଙ୍କ ଓ ଆକାଉଣ୍ଟ ଅନୁଯାୟୀ ଭିନ୍ନ ହୋଇପାରେ। ଯଦି ଗ୍ରାହକ ଏହି ରାଶି ରଖି ନ ପାରନ୍ତି, ତେବେ ବ୍ୟାଙ୍କ ଜୋରିମାନା ଆଦାୟ କରିପାରେ।
ସରକାରୀ ବ୍ୟାଙ୍କଗୁଡ଼ିକରେ ମିନିମମ ବାଲାନ୍ସ ନିୟମ ନାହିଁ:
ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ (SBI): ପାଞ୍ଚ ବର୍ଷ ତଳେ ଏସ୍ବିଆଇ ମିନିମମ୍ ଏଭରେଜ୍ ବାଲାନ୍ସ ନିୟମ ବନ୍ଦ କରିଦେଇଛି। ଏହା ପରେ ଗ୍ରାହକମାନେ ନିଜ ଆବଶ୍ୟକତା ଅନୁଯାୟୀ ଆକାଉଣ୍ଟରେ ଟଙ୍କା ରଖିପାରୁଛନ୍ତି।
କାନାରା ବ୍ୟାଙ୍କ: ଜୁନ ୨୦୨୫ରୁ କାନାରା ବ୍ୟାଙ୍କ ସମସ୍ତ ସେଭିଙ୍ଗ୍ସ, ସାଲାରୀ ଓ ଏନ୍ଆର୍ଆଇ ଆକାଉଣ୍ଟରୁ ମିନିମମ୍ ବାଲାନ୍ସ ସର୍ତ୍ତ ହଟାଇ ଦେଇଛି।
ଇଣ୍ଡିଆନ ବ୍ୟାଙ୍କ: ୭ ଜୁଲାଇ ୨୦୨୫ରୁ ଇଣ୍ଡିଆନ ବ୍ୟାଙ୍କ ମିନିମମ ବାଲାନ୍ସ ନିୟମ ସମ୍ପୂର୍ଣ୍ଣ ବନ୍ଦ କରିଛି। ଏହା ଗ୍ରାହକଙ୍କ ସୁବିଧା ପାଇଁ କରାଯାଇଥିବା କୁହାଯାଇଛି।
ପଞ୍ଜାବ ନ୍ୟାସନାଲ ବ୍ୟାଙ୍କ ଓ ବ୍ୟାଙ୍କ ଅଫ ବରୋଦା: ୧ ଜୁଲାଇ ୨୦୨୫ରୁ ଏହି ବ୍ୟାଙ୍କଗୁଡ଼ିକ ସାଧାରଣ ସେଭିଙ୍ଗ୍ସ ଆକାଉଣ୍ଟରେ ମିନିମମ ବାଲାନ୍ସ ହଟାଇ ଜିରୋ ବାଲାନ୍ସ ସୁବିଧା ଦେଇଛନ୍ତି। ତେବେ ପ୍ରିମିୟମ ଆକାଉଣ୍ଟରେ ନିର୍ଦ୍ଧିଷ୍ଟ ରାଶି ରଖିବା ଆବଶ୍ୟକ।
ଘରୋଇ ବ୍ୟାଙ୍କଗୁଡ଼ିକ ଆଦାୟ କରୁଛନ୍ତି ଜୋରିମାନା:
ଏଚ୍ଡିଏଫ୍ସି ବ୍ୟାଙ୍କ: ସହରାଞ୍ଚଳରେ ଗ୍ରାହକଙ୍କୁ ୨୫,୦୦୦ ଟଙ୍କା ହାରାହାରି ମାସିକ ବାଲାନ୍ସ ରଖିବାକୁ ପଡ଼ିବ। ଏହା ନ ରଖିଲେ ସହରାଞ୍ଚଳରେ ୬୦୦ ଟଙ୍କା ଓ ଅନ୍ୟ ଅଞ୍ଚଳରେ ୩୦୦ ଟଙ୍କା ଜରିମାନା ଲାଗିପାରେ।
ଆକ୍ସିସ ବ୍ୟାଙ୍କ: ଅର୍ଦ୍ଧ-ସହରାଞ୍ଚଳରେ ୧୨,୦୦୦ ଟଙ୍କା ହାରାହାରି ମାସିକ ବାଲାନ୍ସ ରଖିବା ଆବଶ୍ୟକ। ଏହା ନ ରହିଲେ ୬% ଜରିମାନା ଲାଗିପାରେ, ତେବେ ସର୍ବାଧିକ ୬୦୦ ଟଙ୍କା ଜୋରିମାନା ନିଆଯିବ।
