ନୂଆଦିଲ୍ଲୀ,୧୨।୯: ରାତାରାତି ଏମିତି କ’ଣ ଘଟିଲା ଯେ, ଆଇସିସି ଟି୨୦ ବିଶ୍ୱକପ୍ ପାଇଁ ଟିମ୍ ଇଣ୍ଡିଆକୁ ମେଣ୍ଟରଙ୍କ ଆବଶ୍ୟକତା ପଡ଼ିଲା? ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)କୁ ଏହି ପ୍ରଶ୍ନ କରିଛନ୍ତି ପୂର୍ବତନ ଭାରତୀୟ କ୍ରିକେଟର ଅଜୟ ଜାଡେଜା।
ଆସନ୍ତା ଅକ୍ଟୋବର ୧୭ରୁ ୟୁଏଇ ଏବଂ ଓମାନଠାରେ ହେବାକୁ ଯାଉଥିବା ଟି୨୦ ବିଶ୍ୱକପ୍ ଲାଗି ଗତ ଗୁରୁବାର ୧୫ ଜଣିଆ ଭାରତୀୟ ଦଳ ଘୋଷଣା କରାଯାଇଥିଲା। ଦଳ ସହ ମେଣ୍ଟର ଭାବେ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ ଡ୍ରେସିଂ ରୁମ୍ରେ ଉପସ୍ଥିତ ରହିବେ ବୋଲି ଘୋଷଣା କରିଥିଲେ ବିସିସିଆଇ ସମ୍ପାଦକ ଜୟ ଶାହ। ଏଭଳି ପଦକ୍ଷେପ ଧୋନୀଙ୍କ ଫ୍ୟାନ୍ସଙ୍କୁ ଉତ୍ସାହିତ କରିଥିବା ବେଳେ ଏହି ପଦକ୍ଷେପ ପଛର କାରଣ ଖୋଜୁଛନ୍ତି ଜାଡେଜା।
କ୍ରିକେଟରରୁ ଭାଷ୍ୟକାର ପାଲଟିଥିବା ଜାଡେଜା କହିଛନ୍ତି, ଏହା ମୋ ପାଇଁ ବୁଝିବା କଷ୍ଟକର। ଧୋନୀଙ୍କ ନିଯୁକ୍ତି ଉପରେ ଗତ ଦୁଇ ଦିନ ହେଲା ଚିନ୍ତା କରୁଛି। କିନ୍ତୁ ବିସିସିଆଇର ଏଭଳି ନିଷ୍ପତ୍ତି ପଛର କାରଣ ବୁଝିପାରୁ ନାହିଁ। ମୁଁ ଧୋନୀଙ୍କ ସମ୍ପର୍କରେ କହୁ ନାହିଁ। ତାଙ୍କ ଅଭିଜ୍ଞତା ବିଶ୍ୱକପ୍ ଭଳି ଇଭେଣ୍ଟରେ ଦଳ ପାଇଁ ବେଶ୍ ଉପଯୋଗୀ। ମୋ ଠାରୁ ବଡ଼ ଧୋନୀଙ୍କ ପ୍ରଶଂସକ ନାହାନ୍ତି। ମୋ ମତରେ ଧୋନୀ ପ୍ରଥମ ଅଧିନାୟକ ଯିଏକି, ନେତୃତ୍ୱ ଛାଡ଼ିବା ପୂବରୁ ପରବର୍ତ୍ତୀ ଅଧିନାୟକଙ୍କୁ ପ୍ରସ୍ତୁତ କରିଥିଲେ। ଅଧିନାୟକ ବିରାଟ କୋହଲି ଓ ମୁଖ୍ୟ କୋଚ୍ ରବି ଶାସ୍ତ୍ରୀଙ୍କ ନେତୃତ୍ୱରେ ଭାରତ ଭଲ ପ୍ରଦର୍ଶନ କରୁଛି। ଦଳକୁ ଶୀର୍ଷରେ ପହଞ୍ଚାଇଥିବା କୋଚ୍ ଥିବା ବେଳେ ଆଗାମୀ ବିଶ୍ୱକପ୍ ପାଇଁ ମେଣ୍ଟରଙ୍କ ଆବଶ୍ୟକତା କ’ଣ। ଏହା ମୁଁ ବୁଝି ପାରୁନି।
