ନୂଆଦିଲ୍ଲୀ,୧୯।୧୧: ସୀମାପାର ଆତଙ୍କବାଦକୁ ପାକିସ୍ତାନ ଉସୁକାଉଛି ବୋଲି ପୁଣିଥରେ ସ୍ୱୀକାର କରିଛନ୍ତି ଜଣେ ପାକିସ୍ତାନୀ ନେତା। ପାକିସ୍ତାନୀ ନେତା ଚୌଧୁରୀ ଅନୱାରୁଲ ହକ୍ କହିଛନ୍ତି ଯେ ଆତଙ୍କବାଦୀ ଗୋଷ୍ଠୀଗୁଡ଼ିକ “ଲାଲ୍କିଲ୍ଲାରୁ ଆରମ୍ଭ କରି କାଶ୍ମୀରର ଜଙ୍ଗଲ ପର୍ଯ୍ୟନ୍ତ” ଭାରତକୁ ଟାର୍ଗେଟ୍ କରିଛନ୍ତି।
ସୋସିଆଲ୍ ମିଡିଆରେ ଭାଇରାଲ୍ ହୋଇଥିବା ଏକ ଭିଡିଓରେ ହକ୍ କହିଛନ୍ତି, “ମୁଁ ପୂର୍ବରୁ କହିଥିଲି ଯେ ଯଦି ଆପଣ ବାଲୁଚିସ୍ତାନକୁ ରକ୍ତସ୍ରାବ କରିବେ, ତେବେ ଆମେ ଲାଲ୍କିଲ୍ଲାରୁ କାଶ୍ମୀର ଜଙ୍ଗଲ ପର୍ଯ୍ୟନ୍ତ ଭାରତକୁ ଟାର୍ଗେଟ୍ କରିବୁ। ଆଲ୍ଲାହଙ୍କ ଦୟାରୁ ଆମେ ତାହା କରିଛୁ ଏବଂ ସେମାନେ ଏପର୍ଯ୍ୟନ୍ତ ମୃତଦେହ ଗଣିବାରେ ସମର୍ଥ ହୋଇନାହାଁନ୍ତି।”
ହକ୍ଙ୍କ ଏହି ମନ୍ତବ୍ୟ ନଭେମ୍ବର ୧୦ରେ ଦିଲ୍ଲୀର ଲାଲ୍କିଲ୍ଲା ନିକଟରେ ହୋଇଥିବା କାର୍ ବିସ୍ଫୋରଣକୁ ସୂଚାଉଛି, ଯେଉଁଥିରେ ୧୪ ଜଣଙ୍କର ମୃତ୍ୟୁ ହୋଇଥିଲା। ଏହି ଷଡଯନ୍ତ୍ରର ମାଷ୍ଟରମାଇଣ୍ଡ୍ ଡାକ୍ତର ଉମର ଉନ୍ ନବୀ, ଜୈଶ-ଏ-ମହମ୍ମଦ (JeM) ସହ ଜଡିତ ଥିଲେ।
‘କାଶ୍ମୀରର ଜଙ୍ଗଲ’ ଉପରେ ତାଙ୍କର ମନ୍ତବ୍ୟ ଏପ୍ରିଲ୍ ମାସରେ ଜମ୍ମୁ-କାଶ୍ମୀରର ପହଲଗାମର ବୈସରନ୍ ଘାଟିରେ ହୋଇଥିବା ଆତଙ୍କବାଦୀ ଆକ୍ରମଣକୁ ସୂଚିତ କରୁଛି, ଯେଉଁଠାରେ ଆତଙ୍କବାଦୀମାନେ ପର୍ଯ୍ୟଟକଙ୍କ ଉପରକୁ ଗୁଳି ଚଳାଇବାରୁ ୨୬ ଜଣଙ୍କର ମୃତ୍ୟୁ ଘଟିଥିଲା।
ଏହି ଘଟଣାକ୍ରମରେ ଫରିଦାବାଦରେ ‘ହ୍ୱାଇଟ୍-କଲାର’ ଆତଙ୍କବାଦୀ ମଡ୍ୟୁଲ୍ ଭଣ୍ଡାରି ହୋଇଛି, ଯାହାକି ଡିସେମ୍ବର ୬ (ବାବ୍ରି ମସଜିଦ ଭଙ୍ଗା ଦିବସ)ରେ “ଅପରେସନ୍ ଡି-୬” ସଂକେତ ନାମରେ ଏକ ବଡ଼ ଧରଣର ଆତ୍ମଘାତୀ ଆକ୍ରମଣ ପାଇଁ ପ୍ରସ୍ତୁତି କରୁଥିଲା। ଏହି ମଡ୍ୟୁଲ୍ରେ ୫-୬ ଜଣ ଡାକ୍ତର ସାମିଲ ଥିଲେ, ଯେଉଁମାନେ ବିସ୍ଫୋରକ ପାଇଁ ରାସାୟନିକ ସାମଗ୍ରୀ ଯୋଗାଡ଼ କରୁଥିଲେ।
ଏହା ପୂର୍ବରୁ ମଧ୍ୟ ଅନେକ ପାକିସ୍ତାନୀ ରାଜନେତା ସୀମାପାରି ଆତଙ୍କବାଦକୁ ଉତ୍ସାହିତ କରିବାରେ ଇସଲାମାବାଦର ଭୂମିକାକୁ ପ୍ରକାଶ କରିସାରିଛନ୍ତି।
