ଗଞ୍ଜାମ,୧୫ା୧୧(ବିଦ୍ୟାଧର ସାହୁ): ଗଞ୍ଜାମ ବ୍ଲକ ଅନ୍ତର୍ଗତ ମଲାଡ଼ ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ଥିବା ମେଗା ପାନୀୟ ଜଳ ପ୍ରକଳ୍ପ ରହିଛି। ଏହି ପ୍ରକଳ୍ପ ଦ୍ୱାରା ଗଞ୍ଜାମ ବ୍ଲକର ବିଭିନ୍ନ ପଞ୍ଚାୟତକୁ ପାନୀୟ ଜଳ ଯୋଗାଣ ହେଉଛି। କିନ୍ତୁ ଉକ୍ତ ପ୍ରକଳ୍ପର ବର୍ଜ୍ୟ ବା ଗୋଳିଆ ପାଣି ଓଭର ଫ୍ଲୋ ହୋଇ ନିକଟସ୍ଥ ଚାଷଜମିରେ ପଶୁଛି। ଯାହା ଫଳରେ ସ୍ଥାନୀୟ ଚାଷୀଙ୍କ ମହଲରେ ଘୋର ଅସନ୍ତୋଷ ଦେଖାଦେଉଛି। ବର୍ତ୍ତମାନ ଜମିରେ ଧାନ ପାଚି ଯାଇଥିବା ବେଳେ ଆଉ କିଛି ଦିନ ପରେ ଚାଷୀ ଅମଳ କରି ଘରକୁ ନେବେ। କିନ୍ତୁ ଗୋଳିଆ ବର୍ଜ୍ୟ ପାଣି ପଶିଯିବା ଫଳରେ ପାଚିଲା ଧାନ ନଷ୍ଟ ହେଇଯିବ। ଏନେଇ ସ୍ଥାନୀୟ ସରପଞ୍ଚ ମମତା ବେହେରା ଛତ୍ରପୁର ବିଧାୟକ କୃଷ୍ଣଚନ୍ଦ୍ର ନାୟକଙ୍କ ଦୃଷ୍ଟି ଆକର୍ଷଣ କରିଥିଲେ। ବିଧାୟକ ନାୟକ ଉକ୍ତ ପ୍ରକଳ୍ପ ସ୍ଥଳ ଏବଂ ପ୍ରକଳ୍ପ ବର୍ଜ୍ୟ ପାଣି ପଶୁଥିବା ଧାନଚାଷ ଜମି ବୁଲି ଅନୁଧ୍ୟାନ କରିବା ସହ ପ୍ରକୃତ ଚାଷୀମାନଙ୍କ ସହ ଆଲୋଚନା କରିଥିଲେ। ଏଥିସହ ପ୍ରକଳ୍ପ ଅଧିକାରୀ ଏବଂ ଜଳ ସେଚନ ବିଭାଗୀୟ ଅଧିକାରୀଙ୍କ ସହ କଥା ହୋଇ ଉକ୍ତ ମଇଳା ପାଣି କେନାଲକୁ ସଂଯୋଗ କରିବା ନିମନ୍ତେ ବ୍ଲୁ ପ୍ରିଣ୍ଟ ପ୍ରସ୍ତୁତ କରିବାକୁ ପରାମର୍ଶ ଦେଇଛନ୍ତି ବିଧାୟକ। ବିଭାଗୀୟ ଅଧିକାରୀମାନେ ଉକ୍ତ ଜଳ କେନାଲକୁ ଖୁବ୍ଶୀଘ୍ର ସଂଯୋଗ କରାଯିବ ବୋଲି ପ୍ରତିଶ୍ରୁତି ଦେଇଥିବା ସରପଞ୍ଚ ପ୍ରତିନିଧି ସୁଦାମ ବେହେରା ଗଣମାଧ୍ୟମକୁ ସୂଚନା ଦେଇଛନ୍ତି। ଜମିକୁ ଉକ୍ତ ମଇଳା ପାଣି ପଶିବା ଫଳରେ ଧାନଚାଷ ବ୍ୟତୀତ ଅନ୍ୟ କୌଣସି ଚାଷ କାର୍ଯ୍ୟ ହୋଇ ପାରୁନଥିବା ସରପଞ୍ଚ ପ୍ରତିନିଧି କହିଛନ୍ତି l ସମସ୍ୟା ଦୂର ହେବା ଜାଣି ଚାଷୀ ମହଲରେ ଖୁସିର ଲହରି ଖେଳିଯାଇଛି।
