ନୂଆଦିଲ୍ଲୀ,୧୫।୧: ଭାରତୀୟ ଅଲରାଉଣ୍ଡର ୱାଶିଂଟନ ସୁନ୍ଦରଙ୍କ ପାର୍ଶ୍ୱ ଷ୍ଟ୍ରେନ ଯୋଗୁ ଆସନ୍ତା ବୁଧବାରରୁ ଆରମ୍ଭ ହେଉଥିବା ନ୍ୟୁଜିଲାଣ୍ଡ ବିପକ୍ଷ ପାଞ୍ଚ ମ୍ୟାଚ ବିଶିଷ୍ଟ ଟି-୨୦ ସିରିଜରୁ ବାଦ୍ ପଡ଼ିଛନ୍ତି। ଜାନୁଆରୀ ୧୧ ତାରିଖ ରବିବାର ଭଦୋଦରାରେ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଦିନିକିଆରେ ବୋଲିଂ କରିବା ସମୟରେ ୱାଶିଂଟନ ଆହତ ହୋଇଥିଲେ। ପରେ ତାଙ୍କୁ ତିନି ମ୍ୟାଚ ବିଶିଷ୍ଟ ଏକକାଳୀନ ସିରିଜରୁ ବାଦ୍ କରାଯାଇଥିଲା।
ସୂତ୍ର ଅନୁଯାୟୀ, ୨୬ ବର୍ଷୀୟ ୱାଶିଂଟନ ଆସନ୍ତା ମାସ ନାଗପୁରରେ ଆରମ୍ଭ ହେଉଥିବା ପାଞ୍ଚ ମ୍ୟାଚ ବିଶିଷ୍ଟ ଟି-୨୦ ସିରିଜ ପାଇଁ ସମୟ ମଧ୍ୟରେ ସୁସ୍ଥ ହୋଇପାରିବେ ନାହିଁ। ବିସିସିଆଇର ଜଣେ ଅଧିକାରୀ ପିଟିଆଇକୁ କହିଛନ୍ତି, “ସାଇଡ ଷ୍ଟ୍ରେନ ଯୋଗୁ ୱାଶିଂଟନ ସୁନ୍ଦର ନ୍ୟୁଜିଲାଣ୍ଡ ବିପକ୍ଷ ଟି-୨୦ ସିରିଜରୁ ବାଦ୍ ପଡିଛନ୍ତି। ୱାଶିଂଟନଙ୍କ ଆଘାତ ଫେବୃଆରୀ ୭ ତାରିଖରୁ ଆରମ୍ଭ ହେଉଥିବା ଟି-୨୦ ବିଶ୍ୱକପରେ ତାଙ୍କ ଅଂଶଗ୍ରହଣ ଉପରେ ସନ୍ଦେହ ସୃଷ୍ଟି କରୁଛି। ଯଦି ଏହା ହୁଏ, ତେବେ ଟିମ ଇଣ୍ଡିଆର ଦଳରେ ପରିବର୍ତ୍ତନ ହୋଇପାରେ।
ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ସିରିଜର ପ୍ରଥମ ଏକଦିବସୀୟ ମ୍ୟାଚ ଜାନୁଆରୀ ୧୧, ୨୦୨୬ରେ ଭଦୋଦରାର କୋଟାମ୍ବି ଷ୍ଟାଡିୟମରେ ଖେଳାଯାଇଥିଲା। ସୁନ୍ଦର ପାଞ୍ଚ ଓଭର ବୋଲିଂ କରିଥିଲେ, ୫.୪୦ ଇକୋନୋମି ରେଟରେ ୨୭ ରନ ଦେଇଥିଲେ। ହେଲେ ତାଙ୍କୁ ଗୋଟିଏ ବି ଉଇକେଟ୍ ମିଳିନଥିଲା। ବ୍ୟାଟିଂ କରି ସେ ସାତ ବଲରୁ ସାତ ରନ କରିଥିଲେ ଏବଂ ମ୍ୟାଚ ଶେଷ ପର୍ଯ୍ୟନ୍ତ ଖେଳିଥିଲେ। ଏହି ମ୍ୟାଚ ସମୟରେ ସେ ଆଘାତ ପାଇଥିଲେ।
