କୋଲକାତା,୧୬।୩: ଭାରତୀୟ କ୍ରିକେଟ ଜଗତରୁ ଏକ ବଡ଼ ଖବର ସାମ୍ନାକୁ ଆସୁଛି। ଷ୍ଟାର୍ ବ୍ୟାଟସମ୍ୟାନ୍ ବିରାଟ କୋହଲି ଏବଂ ରୋହିତ ଶର୍ମାଙ୍କ ଟେଷ୍ଟ କ୍ରିକେଟରୁ ସନ୍ନ୍ୟାସ ନେବା ପରେ ଏବେ ଅନେକ ପ୍ରଶ୍ନ ଉଠିଛି। କ’ଣ ମୁଖ୍ୟ କୋଚ୍ ଗୌତମ ଗମ୍ଭୀରଙ୍କ ସହ ତିକ୍ତତା ଯୋଗୁଁ ଏହି ଦୁଇ ଦିଗ୍ଗଜ ଟେଷ୍ଟ୍କୁ ବାଏ ବାଏ କହିଲେ? ଏହି ବିବାଦ ଉପରେ ଏବେ ନିଜେ ଗମ୍ଭୀର ମୁହଁ ଖୋଲିଛନ୍ତି।
କୋଲକାତାରେ ଆୟୋଜିତ ଏକ କାର୍ଯ୍ୟକ୍ରମରେ ଗୌତମ ଗମ୍ଭୀର ଗଣମାଧ୍ୟମର ପ୍ରଶ୍ନର ଉତ୍ତର ଦେଇ ଏକ ଚମକାଇଲା ଭଳି ସଙ୍କେତ ଦେଇଛନ୍ତି। ଗମ୍ଭୀର ସ୍ୱୀକାର କରିଛନ୍ତି ଯେ ବିରାଟ ଓ ରୋହିତଙ୍କ ସହ ସମ୍ପର୍କ ପରିଚାଳନାରେ ତାଙ୍କର କିଛି ଭୁଲ୍ ହୋଇଥାଇପାରେ।
“ମୁଁ ଜଣେ ମଣିଷ, ମୋର ମଧ୍ୟ ଭୁଲ୍ ହୋଇପାରେ। ଗତ ୧୮ ମାସ ମଧ୍ୟରେ ମୁଁ ଅନେକ ଭୁଲ୍ ନିଷ୍ପତ୍ତି ନେଇଥାଇପାରେ, ସେଥିପାଇଁ ମୁଁ ପଛଘୁଞ୍ଚା ଦେବି ନାହିଁ। ଯଦି ନିଷ୍ପତ୍ତି ଭୁଲ୍ କିନ୍ତୁ ଉଦ୍ଦେଶ୍ୟ ସଠିକ୍, ତେବେ ତାହା ଗ୍ରହଣୀୟ। ମାତ୍ର ଡ୍ରେସିଂ ରୁମ୍ରେ ଭୁଲ୍ ଉଦ୍ଦେଶ୍ୟ ରଖି କରାଯାଇଥିବା କାମକୁ ମୁଁ ବରଦାସ୍ତ କରିବି ନାହିଁ।”
ସୂଚନାଯୋଗ୍ୟ ଯେ, ଗମ୍ଭୀରଙ୍କ କୋଚିଂ ସମୟରେ ବର୍ଡର-ଗାଭାସ୍କର ଟ୍ରଫି ଏବଂ ନ୍ୟୁଜିଲ୍ୟାଣ୍ଡ ବିପକ୍ଷ ସିରିଜ୍ରେ ଭାରତର ଶୋଚନୀୟ ପରାଜୟ ପରେ BCCI କଠୋର ଆଭିମୁଖ୍ୟ ଗ୍ରହଣ କରିଥିଲା। ଖେଳାଳିଙ୍କ ବ୍ୟକ୍ତିଗତ ସ୍ୱାଧୀନତା ଉପରେ ଅଙ୍କୁଶ ଲଗାଯିବା ପରେ ରୋହିତ ଓ ବିରାଟ ଟେଷ୍ଟରୁ ଅବସର ଘୋଷଣା କରିଥିଲେ।
ଏବେ ଶୁଭମନ ଗିଲ୍ଙ୍କ ଅଧିନାୟକତ୍ୱରେ ଭାରତୀୟ ଦଳରେ ଏକ ନୂତନ ଯୁଗ ଆରମ୍ଭ ହୋଇଛି। ଅନ୍ୟପଟେ, ରୋହିତ ଓ ବିରାଟ କେବଳ ODI ଫର୍ମାଟ୍ ଖେଳୁଥିଲେ ମଧ୍ୟ, ୨୦୨୭ ବିଶ୍ୱକପ୍ ଦଳରେ ସେମାନଙ୍କ ସ୍ଥାନ ପକ୍କା ନୁହେଁ ବୋଲି ଗମ୍ଭୀର ସ୍ପଷ୍ଟ କରିଛନ୍ତି।
