ଅନୁଗୋଳ ଅଫିସ, ୩୦ା୧୨:ଓଡ଼ିଶାକୁ ମିଳୁଥିବା କେନ୍ଦ୍ରୀୟ ଅନୁଦାନ ନେଇ ବିଜେଡି ଓ ଭାଜପା ନେତାଙ୍କ ମଧ୍ୟରେ ବାକ୍ଯୁଦ୍ଧ ଦେଖିବାକୁ ମିଳିଛି। ଅନୁଗୋଳଠାରେ ଗୁରୁବାର ବିଭିନ୍ନ ଉଦ୍ଘାଟନ ଓ ଶିଳାନ୍ୟାସ କାର୍ଯ୍ୟକ୍ରମ ବେଳେ ଦୁଇ ଦଳର ନେତା ଏ ନେଇ ପରସ୍ପରକୁ ଆକ୍ଷେପ କରିଥିବା ଜଣାପଡ଼ିଛି।
ଅନୁଗୋଳ ଷ୍ଟାଡିୟମଠାରେ ଅନୁଷ୍ଠିତ ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମରେ ଉପସ୍ଥିତ ଢେଙ୍କାନାଳ ଏମ୍ପି ମହେଶ ସାହୁ ସିଧାସଳଖ କେନ୍ଦ୍ର ସରକାରଙ୍କୁ ଟାର୍ଗେଟ୍ କରିଥିଲେ। ଏମ୍ପି କହିଥିଲେ ଶିକ୍ଷା କ୍ଷେତ୍ରରେ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦେଶକୁ ନୂତନ ଦିଗ୍ଦର୍ଶନ ଦେଇଛନ୍ତି। ଏଥିପାଇଁ କେନ୍ଦ୍ର ସରକାରଙ୍କ ନିକଟରୁ ପ୍ରଶଂସା ମଧ୍ୟ ପାଇଛନ୍ତି। କିନ୍ତୁ କେତେଜଣ ନେତା ସାମାନ୍ୟ କିଛି କେନ୍ଦ୍ରୀୟ ଅନୁଦାନ ଆଣି ଦାନୀକର୍ଣ୍ଣ ବୋଲି କହୁଛନ୍ତି। ମନେରଖିବା ଦରକାର, ରାଜ୍ୟ ସରକାର କେନ୍ଦ୍ର ସରକାରଙ୍କୁ ୨ ହଜାର କୋଟି ଟଙ୍କାର ରାଜସ୍ବ ପ୍ରଦାନ କରୁଛି। କିନ୍ତୁ ପତିଆରା ନ ଥିବା କି ଖାତା ଖତିଆନ ନ ଥିବା କେତେଜଣ ବ୍ୟକ୍ତି ଅଯଥା ଚିତ୍କାର କରୁଛନ୍ତି। ତାଳଚେର ମେଡିକାଲ କଲେଜ ଚାଲୁ କରିବାକୁ ଚାହିଁଲେ, ହେଲେ ଏମ୍ସିଏଲ ଟିମ୍କୁ ପଠାଇବାକୁ କେନ୍ଦ୍ର ସରକାରଙ୍କ ସାହସ ହେଲାନି। କୋଠାଟିକୁ ଉଦ୍ଘାଟନ କରିବାକୁ ଆସିଲେ ନାହିଁ। ଏବେ ଚିତ୍କାର କରୁଛନ୍ତି ଏତେ ଲୋକଙ୍କୁ ରାଜ୍ୟ ସରକାର ସ୍ବାସ୍ଥ୍ୟ ସେବାରୁ ବଞ୍ଚତ୍ତ କରିଛନ୍ତି। ଓଡ଼ିଶାର ମୁଖ୍ୟମନ୍ତ୍ରୀଙ୍କୁ ଶ୍ରେଷ୍ଠ ଓ ଆଦର୍ଶ ମୁଖ୍ୟମନ୍ତ୍ରୀ ବୋଲି ପ୍ରମାଣପତ୍ର ମିଳିଛି। ହେଲେ ଯେଉଁମାନେ ଚିତ୍କାର କରୁଛନ୍ତି, ସେମାନେ ନବୀନ ବାବୁଙ୍କ ବିକାଶ ଦେଖି ଈର୍ଷା ପରାୟଣ ହୋଇଛନ୍ତି ବୋଲି ଏମ୍ପି ସାହୁ ପ୍ରକାଶ କରିଥିଲେ।
ଉକ୍ତ କାର୍ଯ୍ୟକ୍ରମର କିଛି ସମୟ ପରେ ଅନୁଗୋଳ କେନ୍ଦ୍ରୀୟ ବିଦ୍ୟାଳୟ ଦ୍ୱିତୀୟ କ୍ୟାମ୍ପସର ଶିଳାନ୍ୟାସ ଅବସରରେ ଯୋଗଦେଇ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହାର ଜବାବ ରଖିଥିଲେ। ମନ୍ତ୍ରୀ କହିଥିଲେ, ତାଳଚେର ମେଡିକାଲ କଲେଜ ପାଇଁ ବିଭିନ୍ନ ସମୟରେ ଆନ୍ଦୋଳନ କରାଯାଇଛି। ଏହି ଦାବିକୁ ପ୍ରଧାନମନ୍ତ୍ରୀ ପୂରଣ କଲେ। ମେଡିକାଲ ପରିଚାଳନା ବାବଦକୁ ୧୦ ବର୍ଷ ପାଇଁ ଆର୍ଥିକ ସହାୟତା ଦେବାକୁ ରାଜ୍ୟ ସରକାରଙ୍କ ପ୍ରସ୍ତାବକୁ କେନ୍ଦ୍ର କୋଇଲା ମନ୍ତ୍ରୀ ସ୍ବୀକୃତି ଦେଲେ। ଏହା ସତ୍ତ୍ୱେ ରାଜ୍ୟ ସରକାର ତାଳଚେର ମେଡିକାଲ କଲେଜର ପରିଚାଳନା ପାଇଁ ଆବେଦନ ନ କରିବା ଦୁର୍ଭାଗ୍ୟଜନକ। ଜିଲା ଖଣିଜ ପ୍ରତିଷ୍ଠାନ କାହାର। ରାଜ୍ୟକୁ କେନ୍ଦ୍ର ୧୫୦୦ କୋଟି ଟଙ୍କା ଦେଉଥିବାବେଳେ ଅନୁଗୋଳ ଭାଗରେ ୮ଶହ କୋଟି ପଡ଼ୁଛି। କିନ୍ତୁ ଏହି ଟଙ୍କା ବିନା ଟେଣ୍ଡରରେ କାର୍ଯ୍ୟ ହେଉଛି। ମୁଖ୍ୟମନ୍ତ୍ରୀ ମାଛ ତେଲରେ ମାଛ ଭାଜୁଛନ୍ତି ବୋଲି କେନ୍ଦ୍ରମନ୍ତ୍ରୀ ପ୍ରଧାନ କହିଥିଲେ। ସେହିପରି ଅନ୍ୟ ଦୁଇ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ଓ ପ୍ରହଲ୍ଲାଦ ଜୋଷୀ ମଧ୍ୟ ରାଜ୍ୟ ସରକାରଙ୍କୁ ଅନେକ କ୍ଷେତ୍ରରେ ସମାଲୋଚନା କରିଥିଲେ।
