ନୂଆଦିଲ୍ଲୀ,୧୩ା୧୧:କେରଳର ଓ୍ବାୟନାଡ୍ ଲୋକ ସଭା ଆସନ ସମେତ ୧୦ ରାଜ୍ୟର ୩୧ ବିଧାନସଭା ଆସନରେ ବୁଧବାର ଉପନିର୍ବାଚନ ପାଇଁ ମତଦାନ ଆରମ୍ଭ ହୋଇଛି। ଓ୍ବାୟନାଡ୍ ଆସନରେ କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା ପ୍ରାର୍ଥୀ ହେବା ସହ ପ୍ରଥମ ଥର ପାଇଁ ନିର୍ବାଚନୀ ରାଜନୀତିରେ ପ୍ରବେଶ କରିଛନ୍ତି। ଯଦିଓ ଉପନିର୍ବାଚନ ଫଳାଫଳ ସରକାରଙ୍କ ଉପରେ କୌଣସି ବଡ଼ ପ୍ରଭାବ ପକାଇବ ନାହିଁ, ତେବେ କଂଗ୍ରେସ ଏବଂ ଇଣ୍ଡିଆ ବ୍ଲକ୍ ପାଇଁ ଏହାକୁ ବଡ଼ ପରୀକ୍ଷା ଭାବେ ଦେଖାଯାଉଛି। ନିକଟରେ ଅନୁଷ୍ଠିତ ହରିୟାଣା ବିଧାନସଭା ନିର୍ବାଚନରେ ସେମାନଙ୍କ ମିଳିତ ଶକ୍ତି ବିଫଳ ହୋଇଥିଲା। ଉପରୋକ୍ତ ଆସନଗୁଡ଼ିକର ପ୍ରାର୍ଥୀ ଲୋକ ସଭା ନିର୍ବାଚନ ଲଢ଼ି ବିଜୟୀ ହେବା ଏବଂ ଅନ୍ୟ କେତେକ ଆସନରେ ନିର୍ବାଚିତ ପ୍ରତିନିଧିଙ୍କ ମୃତ୍ୟୁ ଯୋଗୁ ଉପନିର୍ବାଚନ ଅନୁଷ୍ଠିତ ହେଉଛି। କଂଗ୍ରେସ ନେତା ରାହୁଲ ଗାନ୍ଧୀ ଲୋକ ସଭା ନିର୍ବାଚନରେ ଓ୍ବାୟନାଡ୍ ସହ ଉତ୍ତରପ୍ରଦେଶର ରାଏବରେଲୀରୁ ଲଢ଼ିଥିଲେ। ସେ ରାଏବରେଲୀକୁ ରଖି ଓ୍ବାୟନାଡ୍କୁ ଛାଡ଼ିବାରୁ ସେଠାରେ ଉପନିର୍ବାଚନ କରାଇବାକୁ ପଡ଼ିଥିଲା। ବୁଧବାର ରାଜସ୍ଥାନର ୭ ବିଧାନସଭା ଆସନ ସମେତ ପଶ୍ଚିମବଙ୍ଗର ୬, ଆସାମର ୫, ବିହାରର ୪, କର୍ନାଟକର ୩, ମଧ୍ୟପ୍ରଦେଶର ୨ ଏବଂ ଛତିଶଗଡ଼, ଗୁଜରାଟ, କେରଳ ଓ ମେଘାଳୟର ଗୋଟିଏ ଲେଖାଏ ଆସନରେ ମତଦାନ ଚାଲିଛି। ଆସନ୍ତା ୨୩ରେ ଭୋଟଗଣନା କରାଯାଇ ଫଳାଫଳ ପ୍ରକାଶ ପାଇବ।
