ନୂଆଦିଲ୍ଲୀ,୧୦।୧୧: ନିକଟରେ ଦକ୍ଷିଣ ଆଫ୍ରିକା ବିପକ୍ଷ ବିରାଟ କୋହଲିଙ୍କ ଚମତ୍କାରିତା ପ୍ରଥମେ ପଡ଼ିଆରେ ଦେଖାଯାଇଥିଲା। ଏବଂ ଏବେ ଏହି ଅଭିଜ୍ଞ ଖେଳାଳି ICC ରାଙ୍କିଙ୍ଗରେ ମଧ୍ୟ ଚହଳ ସୃଷ୍ଟି କରିଛନ୍ତି। ଦକ୍ଷିଣ ଆଫ୍ରିକା ବିପକ୍ଷରେ ତାଙ୍କର ପ୍ରଭାବଶାଳୀ ପ୍ରଦର୍ଶନ ପରେ, ବିରାଟ କୋହଲି ସଦ୍ୟତମ ICC ଦିନିକିଆ ରାଙ୍କିଙ୍ଗରେ ୨ ନମ୍ବରରେ ପହଞ୍ଚିଛନ୍ତି। ସେ ଅନ୍ୟ ଦୁଇ ବ୍ୟାଟସମ୍ୟାନଙ୍କୁ ପଛରେ ପକାଇ ଦ୍ୱିତୀୟ ସ୍ଥାନରେ ପହଞ୍ଚିଛନ୍ତି। ଡାହାଣହାତୀ ବ୍ୟାଟସମ୍ୟାନ ନ୍ୟୁଜିଲାଣ୍ଡର ଡାରିଲ ମିଚେଲ ଏବଂ ଆଫଗାନିସ୍ତାନର ଇବ୍ରାହିମ ଜାଦ୍ରନଙ୍କୁ ପଛରେ ପକାଇ ଦେଇଛନ୍ତି। ଗୁରୁତ୍ୱପୂର୍ଣ୍ଣ କଥା ହେଉଛି, ରୋହିତ ଶର୍ମା ନମ୍ବର ୧ରେ ରହିଛନ୍ତି, କିନ୍ତୁ ବିରାଟ କୋହଲି ତାଙ୍କ ପାଇଁ ବିପଦ ପାଲଟିଛନ୍ତି।
ସଦ୍ୟତମ ICC ଦିନିକିଆ ରାଙ୍କିଙ୍ଗରେ ୭୭୩ ପଏଣ୍ଟ ସହିତ ବିରାଟ କୋହଲି ଦ୍ୱିତୀୟ ସ୍ଥାନରେ ଅଛନ୍ତି। ସେ ରୋହିତ ଶର୍ମାଙ୍କଠାରୁ ମାତ୍ର ୮ ପଏଣ୍ଟ ପଛରେ ଅଛନ୍ତି। ରୋହିତ ୭୮୧ ପଏଣ୍ଟ ସହିତ ଶୀର୍ଷ ଦିନିକିଆ ବ୍ୟାଟସମ୍ୟାନ ରହିଛନ୍ତି। ବିରାଟ ଏବେ ତାଙ୍କୁ ପଛରେ ପକାଇବାର ବହୁତ ନିକଟତର। ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜରେ କୋହଲି ଉତ୍କୃଷ୍ଟ ଫର୍ମରେ ଥିଲେ। ତିନି ମ୍ୟାଚ ବିଶିଷ୍ଟ ଦିନିକିଆ ସିରିଜରେ, ସେ ୧୫୧ ହାରରେ ୩୦୨ ରନ କରିଥିଲେ। ସେ ରାଞ୍ଚି ଏବଂ ରାୟପୁର ଦିନିକିଆରେ ଲଗାତାର ଦୁଇଟି ଶତକ ହାସଲ କରିଥିଲେ। ଶେଷ ମ୍ୟାଚ୍ରେ ସେ ୬୫ ରନ କରି ଅପରାଜିତ ରହିଥିଲେ।
ବିରାଟ କୋହଲି ଶେଷ ଥର ପାଇଁ ଏପ୍ରିଲ ୨୦୨୧ରେ ଏକଦିବସୀୟ ମ୍ୟାଚ୍ରେ ନମ୍ବର ୧ ରାଙ୍କିଙ୍ଗ ହାସଲ କରିଥିଲେ। ଏହି କିମ୍ବଦନ୍ତୀ ଖେଳାଳି ୧୨୫୮ ଦିନ ପାଇଁ ନମ୍ବର ୧ ରାଙ୍କିଙ୍ଗ୍ରେ ରହିଥିଲେ। ସେ ୨୦୧୭ରୁ ଏପ୍ରିଲ ୨୦୨୧ ପର୍ଯ୍ୟନ୍ତ ନମ୍ବର ୧ ରାଙ୍କିଙ୍ଗ୍ରେ ଥିଲେ। ବାବର ଆଜମ ୨୦୨୧ରେ ତାଙ୍କୁ ପଛରେ ପକାଇ ଦେଇଥିଲେ। ବିରାଟ କୋହଲି ଆସନ୍ତା ବର୍ଷ ପୁଣି ଥରେ ନମ୍ବର ୧ ବ୍ୟାଟ୍ସମ୍ୟାନ ହେବାର ସୁଯୋଗ ପାଇବେ। ଟିମ ଇଣ୍ଡିଆର ପରବର୍ତ୍ତୀ ଏକଦିବସୀୟ ସିରିଜ ନ୍ୟୁଜିଲାଣ୍ଡ ବିପକ୍ଷରେ। ଏହି ସିରିଜ ଜାନୁଆରୀ ୧୧ ତାରିଖରେ ଆରମ୍ଭ ହେବ, ପ୍ରଥମ ମ୍ୟାଚ ଭଦୋଦରାରେ ଖେଳାଯିବ। ଯଦି ରୋହିତଙ୍କ ପ୍ରଦର୍ଶନ ଏହି ତିନି ମ୍ୟାଚ ବିଶିଷ୍ଟ ଏକଦିବସୀୟ ସିରିଜ୍ରେ ସାମାନ୍ୟ ଖରାପ ହୁଏ ଏବଂ ବିରାଟ କୋହଲି ବଡ଼ ରନ ସ୍କୋର କରନ୍ତି, ତେବେ ସେ ରୋହିତଙ୍କ ନମ୍ବର ୧ ସ୍ଥାନକୁ ନେଇଯିବେ।
Dharitri – Odisha’s No.1 Odia Daily
