ବେଙ୍ଗାଲୁରୁ,୨୬।୧୨: ଭାରତୀୟ କ୍ରିକେଟର ଷ୍ଟାର ଖେଳାଳି ବିରାଟ କୋହଲି ବିଜୟ ହଜାରେ ଟ୍ରଫି ୨୦୨୫-୨୬ରେ ଦିଲ୍ଲୀ ପାଇଁ ଜବରଦସ୍ତ ପ୍ରଦର୍ଶନ କରିଥିଲେ। କିନ୍ତୁ ଏବେ ସେ ଅଚାନକ ଦଳକୁ ଛାଡ଼ି ଘରକୁ ଫେରିଛନ୍ତି।
ରିପୋର୍ଟ ଅନୁଯାୟୀ, ବିରାଟ ବେଙ୍ଗାଲୁରୁ ଏୟାରପୋର୍ଟରୁ ନିଜ ଘରକୁ ଯାଇଛନ୍ତି। ସେ ନ୍ୟୁ ଇୟର ପାଇଁ ପରିବାର ସହିତ ଛୁଟି ମନାଇବାକୁ ଯାଇଛନ୍ତି। ବିରାଟ ଦିଲ୍ଲୀ ପାଇଁ ପ୍ରଥମ ଦୁଇ ମ୍ୟାଚ୍ ଖେଳିଥିଲେ ଯେଉଁଥିରେ ସେ ମୋଟ ୨୦୮ ରନ କରିଥିଲେ। ଆନ୍ଧ୍ରପ୍ରଦେଶ ବିପକ୍ଷରେ ୧୩୧ ରନର ଅସାଧାରଣ ଇନିଂସ ଖେଳିଥିଲେ ଏବଂ ଗୁଜରାଟ ବିପକ୍ଷରେ ୭୭ ରନ କରିଥିଲେ। ଦୁଇ ମ୍ୟାଚରେ ତାଙ୍କର ଗଡ଼ ଆଭରେଜ ୧୦୪ ରହିଛି। ଗୁଜରାଟ ବିପକ୍ଷରେ ସେ ପ୍ଲେୟର ଅଫ୍ ଦି ମ୍ୟାଚ୍ ହୋଇଥିଲେ ଏବଂ ଦିଲ୍ଲୀ ୭ ରନରେ ଜିତିଥିଲା।
ଭଲ କଥା ହେଉଛି ବିରାଟଙ୍କର ବିଜୟ ହଜାରେ ଟ୍ରଫିରେ ଫେରିବାର ସମ୍ଭାବନା ରହିଛି। ସେ ଆଗାମୀ ତିନି ମ୍ୟାଚରେ ନ ଖେଳିଲେ ମଧ୍ୟ ଜାନୁଆରୀ ୬, ୨୦୨୬ରେ ରେଳବେ ବିପକ୍ଷରେ ହେବାକୁ ଥିବା ମ୍ୟାଚରେ ଖେଳିପାରନ୍ତି। ଏହା ନ୍ୟୁଜିଲାଣ୍ଡ ବିପକ୍ଷ ଏକଦିବସୀୟ ସିରିଜ ପୂର୍ବରୁ ତାଙ୍କର ଶେଷ ଘରୋଇ ମ୍ୟାଚ ହେବ। ଏହା ପରେ ସେ ଟିମ ଇଣ୍ଡିଆରେ ଯୋଗ ଦେବେ।ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଏକଦିବସୀୟ ସିରିଜ ଜାନୁଆରୀ ୧୧, ୨୦୨୬ରୁ ଆରମ୍ଭ ହେବ ଯାହାର ପ୍ରଥମ ମ୍ୟାଚ ବଡୋଦରାରେ ହେବ। ବିରାଟ ଏବେ ଏକଦିବସୀୟ ଫର୍ମାଟରେ ଅସାଧାରଣ ଫର୍ମରେ ରହିଛନ୍ତି। ଗତ ୬ ମ୍ୟାଚ୍ରେ ସେ ୬ଟି ଫିଫ୍ଟି ପ୍ଲସ୍ ସ୍କୋର କରିଛନ୍ତି ଯେଉଁଥିରେ ତିନୋଟି ଶତକ ଅଛି। ନ୍ୟୁଜିଲାଣ୍ଡ ବିପକ୍ଷରେ ତାଙ୍କଠାରୁ ବଡ଼ ଇନିଂସ ଆଶା କରାଯାଉଛି। ବିରାଟଙ୍କର ଏହି ଛୁଟି ତାଙ୍କୁ ନୂଆ ବର୍ଷରେ ନୂଆ ଉତ୍ସାହ ଦେବ ଏବଂ ଆଗାମୀ ଆନ୍ତର୍ଜାତୀୟ ସିରିଜ ପାଇଁ ପ୍ରସ୍ତୁତ କରିବ। କ୍ରିକେଟ ପ୍ରେମୀମାନେ ତାଙ୍କର ଫେରିବା ପାଇଁ ଉତ୍ସୁକ ରହିଛନ୍ତି।
