ଆବୁଧାବି, ୨୧।୧୦: ଚଳିତ ଆଇପିଏଲ୍ର ୩୯ତମ ମୁକାବିଲାରେ କୋଲକାତା ନାଇଟ୍ ରାଇଡର୍ସ (କେକେଆର୍) ଓ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ପରସ୍ପର ସାମ୍ନା ସାମ୍ନି ହେବେ। ସ୍ଥାନୀୟ ଶେଖ୍ ଜାୟେଦ ଷ୍ଟାଡିୟମରେ ଖେଳାଯିବାକୁ ଥିବା ଏହି ମ୍ୟାଚ୍ ଅବସରରେ ଆର୍ସିବି ଅଧିନାୟକ ବିରାଟ କୋହଲିଙ୍କ ନିକଟରେ ଛକା ଓ ଚୌକାରେ ଏକ ସ୍ବତନ୍ତ୍ର କୀର୍ତ୍ତିମାନ ସ୍ଥାପନ କରିବାର ସୁଯୋଗ ରହିଛି। ଆଇପିଏଲ୍ରେ ୨୦୦ ଛକା ମାରିବାଠାରୁ ବିରାଟ ଆଉ ଗୋଟିଏ ପାଦ ପଛରେ ରହିଛନ୍ତି। ସେହିଭଳି ୫୦୦ ଚୌକା ମାରିବାଠାରୁ ୨ଟି ପାଦ ଦୂରରେ। ବିରାଟ ବର୍ତ୍ତମାନ ସୁଦ୍ଧା ଆଇପିଏଲ୍ରେ ୧୯୯ ଛକା ଓ ୪୯୮ ଚୌକା ମାରି ସାରିଛନ୍ତି।
ସର୍ବାଧିକ ଚୌକା ମାରିବା ମାମଲାରେ ବିରାଟ ତାଲିକାର ୨ୟ ସ୍ଥାନରେ ରହିଛନ୍ତି। ୫୭୫ ଚୌକା ସହ ଦିଲ୍ଲୀ କ୍ୟାପିଟାଲ୍ସର ଶିଖର ଧାଓ୍ବାନ ଏହି ତାଲିକାର ସର୍ବାଗ୍ରେ ରହିଛନ୍ତି। ଧାଓ୍ବନଙ୍କ ବ୍ୟତୀତ ଆଉ କୌଣସି ବ୍ୟାଟ୍ସମ୍ୟାନ ଆଇପିଏଲ୍ରେ ୫୦୦ ଚୌକା ମାରିପାରି ନାହାନ୍ତି। ସେହିଭଳି ଆଇପିଏଲ୍ରେ ସର୍ବାଧିକ ଛକା ମାରିବା ତାଲିକାରେ ବିରାଟ ୫ମ ସ୍ଥାନରେ ରହିଛନ୍ତି। କିଙ୍ଗ୍ସ ଇଲେଭେନ ପଞ୍ଜାବର କ୍ରିସ ଗେଲ୍ (୩୩୫) ଆଇପିଏଲ୍ ଇତିହାସରେ ସର୍ବାଧିକ ଛକା ମାରିଛନ୍ତି। ଯଦି ବିରାଟ ୨୦୦ ଛକା ମାଇଲଖୁଣ୍ଟ ସ୍ପର୍ଶ କରନ୍ତି ତେବେ ଏହି କୀର୍ତ୍ତିମାନ କରିବାରେ ସେ ୩ୟ ଭାରତୀୟ ବ୍ୟାଟ୍ସମ୍ୟାନ ହେବେ। ତାଙ୍କ ପୂର୍ବରୁ ମହେନ୍ଦ୍ର ସିଂ ଧୋନୀ (୨୧୫) ଓ ରୋହିତ୍ ଶର୍ମା (୨୦୯) ୨୦୦ରୁ ଊର୍ଦ୍ଧ୍ୱ ଛକା ମାରି ସାରିଛନ୍ତି। ସର୍ବାଧିକ ଛକା ମାରିବା ତାଲିକାରେ ଏବି ଡି ଭିଲର୍ସ (୨୩୧) ୨ୟ ସ୍ଥାନରେ ରହିଛନ୍ତି।
