ନୂଆଦିଲ୍ଲୀ,୧୫।୧୧: ଭାରତୀୟ କ୍ରିକେଟର ବିରାଟ କୋହଲିଙ୍କ ସହ ରିଙ୍କୁ ସିଂଙ୍କ ସମ୍ପର୍କ ବେଶ ନିବିଡ଼। ନିକଟରେ ରିଙ୍କୁ ତାଙ୍କ ସହ ଖେଳିବାକୁ ଇଚ୍ଛା ପ୍ରକାଶ କରିଥିଲେ। ହେଲେ ଏହି ଇଚ୍ଛା ପୂରଣ ହେବା ପୂର୍ବରୁ ବିରାଟଙ୍କ ଗୋଟିଏ ଉପହାର ଅଶୁଭ ପାଲଟିଛି। ସେ ଟିମ୍ ଇଣ୍ଡିଆରୁ ବାଦ୍ ପଡ଼ିବାର ଆଶଙ୍କା ଦେଖାଦେଇଛି।
ବିରାଟ ପ୍ରାୟତଃ ଟିମ୍ ଇଣ୍ଡିଆ ଖେଳାଳିଙ୍କୁ ତାଙ୍କ ବ୍ୟାଟ୍ ଉପହାରରେ ଦେଉଥିବା ଦେଖାଯାଏ। ଆଇପିଏଲ୍ ସମୟରେ ରିଙ୍କୁ ଏହା ଦାବି କରିଥିଲେ। ବିରାଟ ମଧ୍ୟ ତାଙ୍କର ଆଶା ପୂର୍ଣ୍ଣ କରିଥିଲେ। ହେଲେ ସେବେଠାରୁ ଅନ୍ତର୍ଜାତୀୟ କ୍ରିକେଟରେ ତାଙ୍କର ଦୁର୍ଭାଗ୍ୟ ଆରମ୍ଭ ହୋଇଛି। ଦୀର୍ଘଦିନ ଧରି ରିଙ୍କୁଙ୍କ ବ୍ୟାଟିଂ ବିପର୍ଯ୍ୟୟ ଘଟିଥିବା ବେଳେ ସେ ଦଳରୁ ବାଦ୍ ପଡ଼ିପାରନ୍ତି ବୋଲି ଚର୍ଚ୍ଚା ହେଉଛି।
ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଉଥିବା ମୁକାବିଲାରେ ରିଙ୍କୁ ସଂଘର୍ଷ କରୁଥିବା ନଜର ଆସିଛି। ପ୍ରଥମ ମୁକାବିଲାରେ ୧୦ ବଲ୍ରେ ୧୧ ରନ୍, ଦ୍ୱିତୀୟରେ ୧୧ ବଲ୍ରେ ୯ ରନ୍ କରିଛନ୍ତି। ଗତ ୭ ଇନିଂସ ବିଷୟରେ କହିଲେ ସେ ୧୨୮.୧୬ ଷ୍ଟ୍ରାଇକ୍ରେଟ୍ରେ ମାତ୍ର ୯୧ ରନ୍ କରିଛନ୍ତି। ଟି୨୦ ଅନ୍ତର୍ଜାତୀୟ କ୍ୟାରିୟରରେ ରିଙ୍କୁ ୧୬୫ ଷ୍ଟ୍ରାଇକ୍ ରେଟ୍ରେ ବ୍ୟାଟିଂ କରିଛନ୍ତି। କ୍ରିକେଟ ବିଶେଷଜ୍ଞମାନେ ରିଙ୍କୁଙ୍କ ଫର୍ମକୁ ନେଇ ଚିନ୍ତା ପ୍ରକଟ କରିଛନ୍ତି।
