ସମ୍ବଲପୁର,୩୧।୧(ପ୍ରମୋଦ ବହିଦାର): ସମ୍ବଲପୁର ନେତାଜୀ ନଗରରେ ଥିବା ସମର୍ଥ ମାନସିକ ଅନଗ୍ରସର ଥଇଥାନ କେନ୍ଦ୍ର ଅନ୍ତେବାସୀଙ୍କୁ ଅମାନୁସିକ ନିର୍ଯାତନା ଘଟଣାର ତନାଘନା ଜୋରସୋରରେ ଚାଲିଛି। ବୁଧବାର ଉତ୍ତରାଞ୍ଚଳ ଆଇଜି ହିମାଂଶୁ ଲାଲ ଓ ସମ୍ବଲପୁର ଦାୟିତ୍ୱରେ ଥିବା ଝାରସୁଗୁଡ଼ା ଆରକ୍ଷୀ ଅଧିକ୍ଷକ ସ୍ମିଥ ପି ପାରମାର ପ୍ରମୁଖଙ୍କ ସହିତ ତଦନ୍ତକାରୀ ଅଧିକାରୀମାନେ ଉକ୍ତ କେନ୍ଦ୍ରରେ ଖୋଳତାଡ଼ କରିଥିଲେ। ତେବେ ବର୍ତ୍ତମାନ ଉକ୍ତ କେନ୍ଦ୍ରରେ ରହୁଥିବା ଅନ୍ତେବାସୀଙ୍କ ସଂଖ୍ୟା କେତେ, କେତେଜଣ ନାମ ପଞ୍ଜିକରଣ ହୋଇଛି।
ସେମାନଙ୍କ ମଧ୍ୟରୁ କେତେଜଣଙ୍କୁ ମୃତ୍ୟୁ ହୋଇଛି ସେମାନଙ୍କ ଠିକଣା ଆଦିକୁ ନେଇ ତଦନ୍ତ କରିଥିଲେ। ମାତ୍ର ଅନ୍ତେବାସୀଙ୍କ ନାମ ଠିକଣା ଅଦି ପଞ୍ଜୀକରଣ ହୋଇଥିବା ରେଜିଷ୍ଟ୍ରାର ମିଳି ନ ଥିଲା। ଏପରିକି ଏକ ଅସମଥର୍ର୍ତ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ ଏଠାରେ ଏହି ସମୟରେ ଉପସ୍ଥିତ ଉକ୍ତ ସଂସ୍ଥାର ଜଣେ କର୍ମଚାରୀ ମଧ୍ୟ ରେଜିଷ୍ଟାର ବାବଦରେ କିଛି ଜାଣି ନ ଥିବା କହିଥିଲେ। ପୋଲିସ ପକ୍ଷରୁ ତଦନ୍ତ ସମୟରେ ସଂସ୍ଥାର ଅଫିସ ରୁମ୍ରେ ଥିବା ଏକ ଆଲମାରି ଖୋଲିବାକୁ କହିବାରୁ କର୍ମଚାରୀ ଜଣକ ତାଙ୍କ ନିକଟରେ ଚାବି ନ ଥିବା କହିଥିଲେ। ତେଣୁ ଗୁରୁବାର ସନ୍ଧ୍ୟାରେ ଜଣେ ଅତିରିକ୍ତ ମାଜିଷ୍ଟ୍ରେଟ୍ ଓ ଜିଲା ସାମାଜିକ ସୁରକ୍ଷା ଅଧିକାରୀ ଥବୀର ମହାନନ୍ଦଙ୍କ ଉପସ୍ଥିତିରେ ଉକ୍ତ ଆଲମିରାକୁ ପୋଲିସ ପକ୍ଷରୁ ଭଙ୍ଗା ଯାଇଛି। ସେଥିରୁ କି ତଥ୍ୟ ମିଳିଛି ତାହା ସ୍ପଷ୍ଟ ହୋଇ ନାହିଁ।
ସେହିପରି ଜଣେ ଅନ୍ତେବାସୀଙ୍କ ପକ୍ଷରୁ ତାଙ୍କୁ କେନ୍ଦ୍ରରେ ବାରମ୍ବାର ବଳାକତ୍ାର କରାଯାଇଥିବା ଅଭିଯୋଗ ହୋଇଥିଲା। ଏପରିକି ତାଙ୍କର ଗର୍ଭପାତ ମଧ୍ୟ କରାଯାଇଛି ବୋଲି ଅଭିଯୋଗ ହେବା ପରେ ଧନୁପାଲି ଥାନାରେ ଏକ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଛି। ଗୁରୁବାର ପୀଡ଼ିତାଙ୍କ ଡାକ୍ତରୀ ମାଇନା ପରେ ସନ୍ଧ୍ୟାରେ ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ତାଙ୍କର ବୟାନ ରେକର୍ଡ କରାଯାଇଛି। ତେବେ ଏହିପରି ଅନେକ ମହିଳା ଓ ଯୁବତୀ ମାନସିକ ଅନଗ୍ରସର ଅନ୍ତେବାସୀଙ୍କୁ ବଳାକତ୍ାର କରାଯାଇଥିବା ନେଇ ସନ୍ଦେହ କରାଯାଉଛି। ଏ ଦିଗରେ ଆବଶ୍ୟକ ପଦକ୍ଷେପ ଗ୍ରହଣ କରାଯାଇଛି ବୋଲି କହିଛନ୍ତି ସଦର ଉପଜିଲାପାଳ ଡ. ପୁଷ୍ପାଞ୍ଜଳି ପଣ୍ଡା।
