ମସ୍କୋ,୧୭।୩: ରୁଷିଆରେ ପ୍ରଥମ ଥର ବ୍ୟବହୃତ ହେଉଥିବା ରିମୋଟ ଇଲେକ୍ଟ୍ରୋନିକ ଭୋଟିଂ ସିଷ୍ଟମରେ ଏକ ବଡ଼ ଆକାରର ସାଇବର ଆକ୍ରମଣ କରାଯାଇଛି। ଶନିବାର ଜିନହୁଆ ନ୍ୟୁଜ ଏଜେନ୍ସି ରୁଷିଆର କେନ୍ଦ୍ରୀୟ ନିର୍ବାଚନ ଆୟୋଗର ମୁଖ୍ୟ ଏଲା ପାମଫିଲୋଭାଙ୍କ ଉଦ୍ଧେଶ୍ୟରେ କହିଛି ଯେ ଦୂର ଇଲେକ୍ଟ୍ରୋନିକ ଭୋଟିଂ ସିଷ୍ଟମର ମନିଟରିଂ ପୋର୍ଟାଲକୁ ଟାର୍ଗେଟ କରି ୩୦,୦୦୦ ଆକ୍ରମଣ କରାଯାଇଛି।
ପାମଫିଲୋଭା କହିଛନ୍ତି ଯେ ଶୁକ୍ରବାର ତୁଳନାରେ ଶନିବାର ଆକ୍ରମଣ ବୃଦ୍ଧି ପାଇଛି। ମସ୍କୋରେ ନିର୍ବାଚନ ପର୍ଯ୍ୟବେକ୍ଷଣ ଦଳର ମୁଖ୍ୟ ଭାଡିମ କୋଭାଲେଭ ଶନିବାର କହିଛନ୍ତି ଯେ ଏହି ଆକ୍ରମଣ ଆମେରିକା ଏବଂ ବ୍ରିଟେନରୁ କରାଯାଇଛି। କୋଭାଲେଭ କହିଛନ୍ତି, ଯେଉଁ ସର୍ଭରରୁ ଆକ୍ରମଣ ହେଉଛି ଅଧିକାଂଶ ସର୍ଭର ଆମେରିକା ଏବଂ ବ୍ରିଟେନରେ ଅବସ୍ଥିତ।
ରୁଷିଆରେ ରାଷ୍ଟ୍ରପତି ନିର୍ବାଚନ ପାଇଁ ମତଦାନ ମାର୍ଚ୍ଚ ୧୫ ରୁ ଆରମ୍ଭ ହୋଇ ମାର୍ଚ୍ଚ ୧୭ ରେ ଶେଷ ହେବ। ଦେଶର କେତେକ ସ୍ଥାନରେ ପ୍ରଥମ ଥର ପାଇଁ ରିମୋଟ ଇଲେକ୍ଟ୍ରୋନିକ ଭୋଟିଂ ଆରମ୍ଭ ହୋଇଥିଲା। ଏହି ନର୍ବାଚନରେ ଭାଗ ନେଉଥିବା ପ୍ରାର୍ଥୀମାନେ ହେଉଛନ୍ତି ରାଷ୍ଟ୍ରପତି ଭ୍ଲାଦିମିର ପୁଟିନ, ଲିବରାଲ ଡେମୋକ୍ରାଟିକ ପାର୍ଟିର ଲିଓନିଡ ସ୍ଲୁଟସ୍କି, ରୁଷିଆର କମ୍ୟୁନିଷ୍ଟ ପାର୍ଟିର ନିକୋଲାଇ ଖାରିଟୋନୋଭ, ନ୍ୟୁ ପିପୁଲ୍ସ ପାର୍ଟିର ଭ୍ଲାଡିସ୍ଲାଭ ଡାଭାନକୋଭ ଏବଂ ଜଣେ ସ୍ବାଧୀନ ପ୍ରାର୍ଥୀ ସେମାନଙ୍କ ଭାଗ୍ୟ ଚେଷ୍ଟା କରୁଛନ୍ତି।
ନ୍ୟୁଜ ଏଜେନ୍ସି ଜିନହୁଆର ରିପୋର୍ଟ ଅନୁଯାୟୀ, ଦେଶରେ ୯୦ ହଜାରରୁ ଅଧିକ ମତଦାନ କେନ୍ଦ୍ର ସ୍ଥାପନ କରାଯାଇଛି। ଦୂର ପୂର୍ବରେ ଅବସ୍ଥିତ କାମଚାଟକା ଏବଂ ଚୁକୋଟକା ଠାରେ ପ୍ରଥମେ ମତଦାନ ଆରମ୍ଭ ହୋଇଥିଲା । ରୁଷିଆର ପଶ୍ଚିମ ସୀମାରେ ଅବସ୍ଥିତ କାଲିନଗ୍ରାଡରେ ଶେଷରେ ମତଦାନ ଅନୁଷ୍ଠିତ ହେବ।
ରୁଷିଆର କେନ୍ଦ୍ରୀୟ ନିର୍ବାଚନ ଆୟୋଗ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ ପ୍ରାୟ ୧୧କୋଟି ଭୋଟର ନିର୍ବାଚନରେ ସେମାନଙ୍କ ଫ୍ରାଞ୍ଚାଇଜ ବ୍ୟବହାର କରିପାରିବେ। ନିର୍ବାଚନ ଆୟୋଗଙ୍କ ଅନୁଯାୟୀ ମାର୍ଚ୍ଚ ୨୮ ପୂର୍ବରୁ ନିର୍ବାଚନ ଫଳାଫଳ ଘୋଷଣା କରାଯିବ।
