ବୈଶିଙ୍ଗା,୧୦।୨(ରତନ ଦାଶ): ମୟୂରଭଞ୍ଜ ଜିଲ୍ଲାର ବୈଶିଙ୍ଗା ଥାନା ଅଞ୍ଚଳ ଅଶାନ୍ତ ହୋଇଉଠିଛି। ଶୁକ୍ରବାର ୮ ଜଣ କୁଖ୍ୟାତ ଆନ୍ତଃରାଜ୍ୟ ଡ଼କାୟତଙ୍କୁ ବିଭିନ୍ନ ମାରଣାସ୍ତ୍ର ସହ ଧରି କୋର୍ଟ ଚାଲାଣ କରିବାର ମାତ୍ର ଚବିଶ ଘଣ୍ଟା ଭିତରେ ପୁଣି ୮ ଜଣ କୁଖ୍ୟାତ ଅପରାଧୀ ଢାବାରେ ଦୌରାତ୍ମ୍ୟ ସୃଷ୍ଟି କରିଛନ୍ତି।
ମିଳିଥିବା ସୂଚନା ମୁତାବକ, ଶୁକ୍ରବାର ରାତି ଗୋଟାଏ ସମୟରେ ୧୮ ନଂ ଜାତୀୟ ରାଜପଥର ଖଇରବଣି ନିକଟରେ “ରୟାଲ ଢ଼ାବା” ରେ ଡକାୟତି ଉଦ୍ଦେଶ୍ୟରେ ୩ଟି ବାଇକ ଓ ୨ଟି ସ୍କର୍ପିଓ ଗାଡ଼ିରେ ଆଠ ଜଣ ଅଜ୍ଞାତ ଯୁବକ ପହଞ୍ଚିଥିଲେ। ତେବେ ପ୍ରଥମେ ସେମାନେ ଖାଇଥିଲେ। ସେତିକିବେଳେ ପୋଲିସ ପାଟ୍ରୋଲିଂ ଟିମ ସହ ପହଞ୍ଚିଥିଲେ ଏସ୍ଆଇ ଇତିଶ୍ରୀ ସାହୁ। ଯୁବକଙ୍କୁ ପଚରାଉଚରା କରିବାରୁ ସେମାନେ ବାଲେଶ୍ୱର ଟାଉନ୍ରୁ ଆସିଛନ୍ତି ଓ ଖାଇସାରି ଫେରିଯିବେ କହିଥିଲେ। ପୋଲିସ ଟିମ ଚାଲିଥିବା ପରେ ହଠାତ ହୋଟେଲ ମାଲିକ ରାଜେନ୍ଦ୍ର ହାତୀ ଓ କର୍ମଚାରୀଙ୍କୁ ତେଲେଙ୍ଗା କଟୁରୀ, ଖଣ୍ଡା , ଭୁଜାଲି ଓ ବନ୍ଧୁକ ଦେଖାଇ ଭୟଭୀତ କରି ଟଙ୍କା ମାଗିଥିଲେ। ଟଙ୍କା ନ ଦେବାରୁ ତାଙ୍କୁ ଭୁଜାଲିରେ ଆକ୍ରମଣ କରି କ୍ୟାସ ବାକ୍ସରେ ଥିବା ନଗଦ ୧୮୦୦୦ ଟଙ୍କା, ତାଙ୍କ ବେକରୁ ସୁନାଚେନ ଛିଣ୍ଡାଇ ନେଇଥିଲେ। ଯନ୍ତ୍ରଣାରେ ସେମାନଙ୍କ ଚିତ୍କାର ଶୁଣି ପାଖଆଖ ଦୋକାନୀ ମାନେ ଧାଇଁ ଆସିଥିଲେ। ସେମାନଙ୍କୁ ଗୋଡ଼ାଇ ଜଣଙ୍କୁ ମାଡ଼ି ବସିଥିଲେ ହେଁ ଅନ୍ୟ ମାନେ ଅନ୍ଧାରରେ ଖସି ଯାଇଥିଲେ।
ଘଟଣା ସମ୍ପର୍କରେ ଖବର ପାଇ ବୈଶିଙ୍ଗା ପୋଲିସ ତୁରନ୍ତ ଘଟଣା ସ୍ଥଳରେ ପହଞ୍ଚି ବାଲେଶ୍ୱର ସହର ଆକତପୁର ଅଞ୍ଚଳର ବିଜୟ ଦାସଙ୍କ ପୁଅ କ୍ଷୀତିଶ ଓ ଅନ୍ୟ ମାନେ ଛାଡ଼ି ପଳାଇଥିବା ସ୍କୋର୍ପିଓ ଗାଡ଼ିକୁ ଜବତ କରି ଥାନାକୁ ଆଣିଥିଲେ। ଏହାକୁ ନେଇ ୬୮/୨୦୨୬ ନଂ ରେ ଏକ ମାମଲା ରୁଜୁ କରାଯାଇଛି। ତେବେ ଧରାପଡ଼ିଥିବା ଅଭିଯୁକ୍ତ ନିକଟରୁ ସୂଚନା ପାଇ ରାତି ତମାମ ବିଭିନ୍ନ ସ୍ଥାନରେ ଚଢାଉ କରି ବାଲେଶ୍ୱର ଜିଲାର ବାଲିଆ ଅଞ୍ଚଳର ଶ୍ରୀକୃଷ୍ଣ ମହାନ୍ତିଙ୍କ ପୁଅ ସୁରଜ, ସିଙ୍ଗଲା ଅଞ୍ଚଳର ଇଡଦା ଗ୍ରାମର ଧନଞ୍ଜୟ ମହାନ୍ତିଙ୍କ ପୁଅ ଅକ୍ଷତ, ସାହୁପଡା ଗ୍ରାମର ଭରତ ସ୍ବାଇଁଙ୍କ ପୁଅ ରତିକାନ୍ତଙ୍କୁ ଗିରଫ କରି ଶନିବାର ସାରେ କୋର୍ଟ ଚାଲାଣ କରାଯାଇଥିବା ଜଣାପଡ଼ିଛି।
ଅଭିଯୁକ୍ତ ମାନଙ୍କ ନିକଟରୁ ତେଲେଙ୍ଗା କଟୁରୀ, ଛୁରୀ, ଭୁଜାଲି, ୪ଟି ଦାମୀ ମୋବାଇଲ, ୩ଟି ବାଇକ, ଗୋଟିଏ ସ୍କର୍ପିଓ ଗାଡ଼ି ଜବତ କରାଯାଇଥିଲା। ଫେରାର ଥିବା ଆଉ ଚାରି ଜଣଙ୍କୁ ଖୁବଶୀଘ୍ର ଗିରଫ କରାଯିବ ବୋଲି ଥାନାଧିକାରୀ ବାରିଣୀ ଦାସ କହିଛନ୍ତି।
Dharitri – Odisha’s No.1 Odia Daily