ସୋନପୁର,୬।୮(ମୃତ୍ୟୁଞ୍ଜୟ ଶତପଥୀ):ସୁବର୍ଣ୍ଣପୁର ଜିଲା ବିନିକା ସହର ମନହାରି ପଡାର ସୁରେଖା ମଲ୍ଲିକ ପ୍ରଶଂସାର ପାତ୍ର ପାଲଟିଛନ୍ତି। ଦେଶର ୭୯ତମ ସ୍ବାଧୀନତା ଦିବସ ପାଇଁ ରାଷ୍ଟ୍ରପତି ଦୌପଦୀ ମୁର୍ମୁଙ୍କ ପାଖରୁ ତାଙ୍କ ନିକଟକୁ ନିମନ୍ତ୍ରଣ ଆସିଛି। ସନ୍ଧ୍ୟା ୬ଟାରେ ରାଷ୍ଟ୍ରପତି ଭବନର ସାଂସ୍କୃତିକ କେନ୍ଦ୍ରରେ ତାଙ୍କୁ ଉପସ୍ଥିତ ରହିବାକୁ କୁହାଯାଇଛି। ସେ ରାତ୍ରୀଭୋଜନରେ ରାଷ୍ଟ୍ରପତି ଓ ଅନ୍ୟ ବରେଣ୍ୟ ଅତିଥିଙ୍କ ସହ ସାମିଲ ହେବେ। ଭାରତୀୟ ଡାକ ବିଭାଗ ମାଧ୍ୟମରେ ରାଷ୍ଟ୍ରପତି ଭବନ ଯିବା ପାଇଁ ନିମନ୍ତ୍ରଣ ପତ୍ର ପାଇବା ପରେ ସୁରେଖା ବେଶ ଖୁସି ଅଛନ୍ତି।
ଅଳ୍ପ ବୟସରେ ସ୍ବାମୀ ପ୍ରଶାନ୍ତ ମଲ୍ଲିକଙ୍କୁ ସୁରେଖା ହରାଇଛନ୍ତି। ଦୁଇ ପୁଅ ଓ ବୃଦ୍ଧା ଶାଶୁଙ୍କ ବୋଝକୁ ନେଇ ସେ ପରିବାର ସମ୍ଭାଳୁଛନ୍ତି। ଗତ ୨ବର୍ଷ ପୂର୍ବରୁ ଅସହାୟ ସୁରେଖାଙ୍କୁ ବିନିକା ଏନ୍ଏସି ପକ୍ଷରୁ ପ୍ରଧାନମନ୍ତ୍ରୀ ଆବାସ ଯୋଜନା(ସହରୀ)ରେ କାର୍ଯ୍ୟାଦେଶ ମିଳିଥିଲା। ସେହି ସମୟରେ ସ୍ବାମୀ ପ୍ରଶାନ୍ତ ରୋଗାକ୍ରାନ୍ତ ହୋଇ ଶଯ୍ୟାଶାୟୀ ଥିଲେ। ତେବେ ହିତାଧିକାରୀ ସୁରେଖା କଷ୍ଟ ଭିତରେ ସଂଘର୍ଷ କରି ଘର କାମକୁ ଠିକ୍ ସମୟରେ ସମ୍ପୂର୍ଣ୍ଣ କରିଥିଲେ। ସେ ଦୈନନ୍ଦିନ ରୋଜଗାର ପାଇଁ ବିଭିନ୍ନ ବସ୍ତି ଓ ହାଟକୁ ଯାଇ ନିଜର କୌଳିକ ବୃତ୍ତି ଚୁଡି କାମ କରନ୍ତି। ତାଙ୍କ ପରି ଜଣେ ଅସହାୟ ଓ ସାଧାରଣ ମହିଳାଙ୍କୁ ନିଜେ ରାଷ୍ଟ୍ରପତି ସ୍ବାଧୀନତା ଦିବସରେ ନୂଆଦିଲ୍ଲୀ ଆସିବାକୁ ନିମନ୍ତ୍ରଣ କରିଛନ୍ତି। ଗରିବ ଅସହାୟ ମହିଳା ସୁରେଖା ଏଥିପାଇଁ ଉଭୟ ରାଷ୍ଟ୍ରପତି ଓ ଦେଶ ପାଖରେ କୃତଜ୍ଞ ବୋଲି ପ୍ରତିକ୍ରିୟାରେ କହିଛନ୍ତି। ତେବେ ପ୍ରଶାସନ ପକ୍ଷରୁ ସୁରେଖାଙ୍କୁ ଭୁବନେଶ୍ୱର ପଠାଯିବାର ବ୍ୟବସ୍ଥା କରାଯାଇଛି। ରାଜ୍ୟ ସରକାର ତାଙ୍କୁ ଭୁବନେଶ୍ୱରରୁ ଦିଲ୍ଲୀ ଯିବାର ସମସ୍ତ ସୁବ୍ୟବସ୍ଥା କରିବେ ବୋଲି ଜଣାପଡିଛି।
