ନୂଆଦିଲ୍ଲୀ,୨୩।୧୦ : ଆରବ ସାଗର ଏବଂ ବଙ୍ଗୋପସାଗରରେ ଦୁଇଟି ବିପଜ୍ଜନକ ଘୂର୍ଣ୍ଣିବଳୟ ଏକାସାଙ୍ଗରେ ସୃଷ୍ଟି ହେଉଛି। ଆରବ ସାଗରରେ ‘ତେଜ’ ଏକ ଭୟଙ୍କର ଘୂର୍ଣ୍ଣିବଳୟରେ ପରିଣତ ହୋଇଛି। ଏଥି ସହିତ ବଙ୍ଗୋପସାଗରରେ ଘୂର୍ଣ୍ଣିବଳୟ ‘ହାମୁନ’ ସୃଷ୍ଟି ହେଉଛି। ପାଣିପାଗ ବିଜ୍ଞାନୀ ୟୁଏସ ଡ୍ୟାଶ କହିଛନ୍ତି, ଓଡିଶା ଉପକୂଳଠାରୁ ପ୍ରାୟ ୨୦୦ କିଲୋମିଟର ସମୁଦ୍ରରେ ହାମୁନ ଗତି କରିବ।
ଏହାର ପ୍ରଭାବରେ ସୋମବାର ଓଡ଼ିଶାର କେତେକ ଅଞ୍ଚଳରେ ଏବଂ ଉପକୂଳର ବହୁ ଅଞ୍ଚଳରେ ହାଲୁକା ଏବଂ ମଧ୍ୟମ ବର୍ଷା ହେବାର ସମ୍ଭାବନା ରହିଛି। ପାଣିପାଗ ବିଭାଗ କହିଛି କେଉଁଝର, ମୟୂରଭଞ୍ଜ ଏବଂ ଢେଙ୍କାନାଳ ବ୍ୟତୀତ ଉତ୍ତର ତଥା ଦକ୍ଷିଣ ଉପକୂଳବର୍ତ୍ତୀ ଜିଲାର କେତେକ ସ୍ଥାନରେ ହାଲୁକା ଏବଂ ମଧ୍ୟମ ବର୍ଷା ହେବାର ସମ୍ଭାବନା ରହିଛି।
ମତ୍ସ୍ୟ ଓ ପଶୁ ସମ୍ପଦ ବିକାଶ ବିଭାଗ ପକ୍ଷରୁ ମତ୍ସ୍ୟଜୀବୀଙ୍କୁ ଗଭୀର ସମୁଦ୍ରକୁ ନ ଯିବାକୁ ପରାମର୍ଶ ଦେଇଛି। ପାଣିପାଗର ପରିସ୍ଥିତିକୁ ଦୃଷ୍ଟିରେ ରଖି ଦୁର୍ଗା ପୂଜା ଆୟୋଜକମାନେ ପାର୍ବଣ ସମୟରେ ସମ୍ଭାବ୍ୟ ବର୍ଷା ଏବଂ ପବନର ମୁକାବିଲା ପାଇଁ ପ୍ରସ୍ତୁତି ଚଳାଇଛନ୍ତି ।
