ନବରଙ୍ଗପୁର,୨୨ା୧୨(ସଦାଶିବ ପ୍ରହରାଜ): ରାଇଘର ବ୍ଲକ ୩ଟି ପଞ୍ଚାୟତ ତୁରୁଡ଼ିହି, କଚରାପରା -୩ ଓ ପରଚିପାରା ଦାୟିତ୍ୱରେ ଥିବା ପିଇଓ ସୁରେନ୍ଦ୍ର ଭତ୍ରା କୋଟିଏରୁ ଊର୍ଦ୍ଧ୍ୱ ଟଙ୍କା ଆତ୍ମସାତ କରିଥିବା ଅଭିଯୋଗ ହୋଇଛି। ତୁରୁଡ଼ିହି ପଞ୍ଚାୟତରେ ୬୫ ଲକ୍ଷ ଟଙ୍କା ଆତ୍ମସାତ୍ ଅଭିଯୋଗରେ ପ୍ରଥମେ ସେପ୍ଟେମ୍ବରରେ କୁନ୍ଦେଇ ଥାନାରେ ଅଭିଯୋଗ ହୋଇଥିଲା। ପରେ ପିଇଓଙ୍କୁ ଜିଲାପାଳ ନିଲମ୍ବନ କରିଥିଲେ। ଏବେ ଭିଜିଲାନ୍ସ
ଆଉ ଦୁଇ ପଞ୍ଚାୟତର ୫୦ ଲକ୍ଷରୁ ଊର୍ଦ୍ଧ୍ୱ ସରକାରୀ ଟଙ୍କା ଆତ୍ମସାତ୍ ଅଭିଯୋଗରେ ସମ୍ପୃକ୍ତ ନିଲମ୍ବିତ ପିଇଓଙ୍କୁ ଉଠାଇ ନେଲା ନବରଙ୍ଗପୁର ଭିଜିଲାନ୍ସ। କୋରାପୁଟ ଜିଲା ଜୟପୁରସ୍ଥିତ ଭିଜିଲାନ୍ସ ଏସ୍ପିଙ୍କ କାର୍ଯ୍ୟାଳୟରେ ଅଟକ ରଖି ପଚରାଉଚରା ଚଳାଇଛି।
ନବରଙ୍ଗପୁର ଜିଲା ରାଇଘର ବ୍ଲକ ଅନ୍ତର୍ଗତ ପରଚିପାରା ଓ କଚରାପାରା-୩ ପଞ୍ଚାୟତର ନିଲମ୍ବିତ ପଞ୍ଚାୟତ ନିର୍ବାହୀ ଅଧିକାରୀ (ପିଇଓ ) ସୁରେନ୍ଦ୍ର ଭତ୍ରାଙ୍କୁ ଗତକାଲି ରାତିରେ ନବରଙ୍ଗପୁର ସହରରୁ ଭିଜିଲାନ୍ସ ଉଠାଇନେଇଛି। ସୁରେନ୍ଦ୍ର ପରଚିପାରା ପଞ୍ଚାୟତରେ କାର୍ଯ୍ୟରତ ଥିବା ସମୟରେ ଚାଉଳ, ଉନ୍ନୟନମୂଳକ କାର୍ଯ୍ୟ, ପେନ୍ସନ୍, ସିଏଫ୍ସି, ଏସ୍ଏଫ୍ସି ପାଣ୍ଠିରୁ ୧୫ ଲକ୍ଷରୁ ଊର୍ଦ୍ଧ୍ୱ ସରକାରୀ ଟଙ୍କା ଆତ୍ମସାତ କରିଥିବା ବେଳେ କଚରାପାରା-୩ ପଞ୍ଚାୟତର ମଧ୍ୟ ସେହିଭଳି ୩୫ ଲକ୍ଷରୁ ଊର୍ଦ୍ଧ୍ୱ ସରକାରୀ ଟଙ୍କା ହଡ଼ପ କରିଥିବା ଅଭିଯୋଗ ଆସିଥିଲା। ସେହି ସମୟରେ ନବରଙ୍ଗପୁର ଭିଜିଲାନ୍ସ ନିଜପଟୁ ୨ଟି ମାମଲା (କେସ୍ ନଂ- ୨୭ଓ ୨୮/୪୪)ରୁଜୁ କରି ତଦନ୍ତ ଚଳାଇଥିବା ବେଳେ ଗତକାଲି ରାତିରେ ନବରଙ୍ଗପୁର ସହରରୁ ତାଙ୍କୁ ଭିଜିଲାନ୍ସ ଉଠାଇନେଇଛି l
ପୂର୍ବରୁ ସେ ଉକ୍ତ ବ୍ଲକର ତୁରୁଡିହି ପଞ୍ଚାୟତର ୬୫ ଲକ୍ଷରୁ ଊର୍ଦ୍ଧ୍ୱ ସରକାରୀ ଟଙ୍କା ହଡ଼ପ କରିଥିବା ନେଇ ରାଇଘର ବିଡିଓ ଲକ୍ଷ୍ମୀସାଗର ମାଝୀ କୁନ୍ଦେଇ ଥାନାରେ ଏତଲା ଦେଇ ବିଭାଗୀୟ ତଦନ୍ତ କରିଥିଲେ। ସେହି ତଦନ୍ତ ଆଧାରରେ ନବରଙ୍ଗପୁର ଜିଲାପାଳ ସୁରେନ୍ଦ୍ରଙ୍କୁ ନିଲମ୍ବନ କରିଥିଲେ। ପିଇଓ ସୁରେନ୍ଦ୍ର ଭତ୍ରା ୩ଟି ପଞ୍ଚାୟତ (ପରଚିପାରା, କଚରାପାରା ଓ ତୁରୁଡ଼ିହି)ର ଦାୟିତ୍ୱ ଥିବା ବେଳେ ୧ କୋଟିରୁ ଊର୍ଦ୍ଧ୍ୱ ସରକାରୀ ଟଙ୍କା ଆତ୍ମସାତ କରିଥିବା ଅଭିଯୋଗ ହୋଇଛି। ସେ କୁନ୍ଦେଇ ଥାନା ମାମଲାକୁ ନେଇ ସର୍ତ୍ତମୂଳକ ଜାମିନରେ ଆସି କାର୍ଯ୍ୟରେ ଯୋଗ ନ ଦେବା ସହ କୌଣସି ସହଯୋଗ ମଧ୍ୟ କରୁ ନ ଥିଲେ।
