ଭୁବନେଶ୍ୱର,୮।୮(ବ୍ୟୁରୋ): ଠକେଇ ଅଭିଯୋଗ ନେଇ ପୁଣି ଖଣ୍ଡଗିରି ଥାନାର ଦ୍ୱାରସ୍ଥ ହୋଇଛନ୍ତି ଓଡ଼ିଆ ଅଭିନେତ୍ରୀ ବିଦୁସ୍ମିତା ମନ୍ତ୍ରୀ। ତାଙ୍କୁ ଏକ ରିଅଲ ଇଷ୍ଟେଟ କମ୍ପାନୀ ୨୫ ଲକ୍ଷ ଟଙ୍କା ଠକିଥିବା ନେଇ ସେ ଥାନାରେ ଅଭିଯୋଗ କରିଛନ୍ତି।
ଅଭିଯୋଗ ଅନୁସାରେ ବିଦୁସ୍ମିତା ଓ ତାଙ୍କ ମା’ ଦୁଇଟି ଡୁପ୍ଲେକ୍ସ ପାଇଁ ବିଭିନ୍ନ କିସ୍ତିରେ ୨୫ ଲକ୍ଷ ଟଙ୍କା ଦେଇଥିଲେ । ୨୦୧୯ ପୂର୍ବରୁ ବିଦୁସ୍ମିତା ୧୫ ଲକ୍ଷ ଓ ତାଙ୍କ ମା’ ୧୦ ଲକ୍ଷ ଟଙ୍କା ରିଅଲ ଇଷ୍ଟେଟ କମ୍ପାନୀକୁ ଦେଇଥିଲେ । ୨ ବର୍ଷ ପରେ ତାଙ୍କୁ ଘର ଦେବାକୁ କମ୍ପାନୀ ପ୍ରତିଶ୍ରୁତି ଦେଇଥିଲା । ଜାଗା ଦେଖାଇ ଡିଲ୍ ମଧ୍ୟ ଫାଇନାଲ ହୋଇଥିଲା । ମାତ୍ର ବିଳମ୍ବ ଯୋଗୁ ବାରମ୍ବାର କହିବା ପରେ କମ୍ପାନୀ କିଛି ଟଙ୍କା ଫେରାଇଥିଲା ।
ଏ ନେଇ ଗତ ଫେବୃୟାରିରେ ଭୁବନେଶ୍ବର ଖଣ୍ଡଗିରି ଥାନାରେ ଅଭିଯୋଗ କରିବା ପରେ ୩ ମାସ ଭିତରେ ଟଙ୍କା ଫେରାଇବାକୁ ପୋଲିସ ଉପସ୍ଥିତିରେ କମ୍ପାନୀ କର୍ତ୍ତୃପକ୍ଷ ପ୍ରତିଶ୍ରୁତି ଦେଇଥିଲେ । ହେଲେ ୬ ମାସ ବିତିଥିଲେ ସୁଦ୍ଧା ଟଙ୍କା ଫେରି ନପାଇବାରୁ ପୁଣି ଅଭିନେତ୍ରୀ ଥାନାର ଦ୍ୱାରସ୍ତ ହୋଇଛନ୍ତି।
