ନୂଆଦିଲ୍ଲୀ, ୨୫।୧୨: ଖ୍ରୀଷ୍ଟମାସ ଏବଂ ନୂଆବର୍ଷ ଉପଲକ୍ଷେ ପାହାଡି ରାଜ୍ୟ ହିମାଚଳ ପ୍ରଦେଶରେ ବିପୁଳ ପର୍ଯ୍ୟଟକଙ୍କ ସମାଗମ ହେତୁ ଭୀଷଣ ଟ୍ରାଫିକ୍ ସମସ୍ୟା ସୃଷ୍ଟି ହୋଇଛି। ଏଭଳି ସ୍ଥିତିରେ ଭିଡ଼ରୁ ବଞ୍ଚିବା ପାଇଁ ଜଣେ ଡ୍ରାଇଭର ନଈ ଭିତରେ ଏସୟୁଭି ଥାର ଚାଲି ଯିବାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି।
ଏହି ଭିଡିଓରେ ଦେଖିବାକୁ ମିଳୁଛି ପର୍ଯ୍ୟଟକ ଲାହୁଲ ଉପତ୍ୟକାର ଚନ୍ଦ୍ରା ନଦୀ ଦେଇ ଏକ ମହିନ୍ଦ୍ରା ଥାର ଏସୟୁଭି ଚଲାଉଛନ୍ତି। ସୌଭାଗ୍ୟବଶତ, ନଦୀର ଜଳ ସ୍ତର ସେତେଟା ନଥିଲା ଯାହା କୌଣସି ବିପଦର କାରଣ ହୋଇଥାନ୍ତା। ସୋସିଆଲ ମିଡିଆରେ ବହୁଳ ଭାବରେ ସେୟାର ହୋଇଥିବା ବେଳେ ସ୍ଥାନୀୟ ଲୋକେ ଏହାର ସମାଲୋଚନା କରିଛନ୍ତି।
ଗତକାଲି ସନ୍ଧ୍ୟାରେ ଲାହୁଲରୁ ମନାଲି ମାର୍ଗରେ ଅନେକ ସ୍ଥାନରେ ବିରାଟ ଟ୍ରାଫିକ ଜାମ୍ ହୋଇଥିଲା ଯେତେବେଳେ ପର୍ଯ୍ୟଟକ ଜଣକ ତାଙ୍କ କାର ନଦୀକୁ ନେଇ ଯାଇଥିଲେ। ଗତ ତିନି ଦିନରେ ପ୍ରାୟ ୫୫ ହଜାର କାର ଅଟଳ ଟନେଲ ପାର କରି କୁଲୁ, ଲାହଲ୍ ଏବଂ ସ୍ପିଟିରେ ଅଭିମୁଖେ ଯାଉଥିବା ଅଧିକାରୀମାନେ କହିଛନ୍ତି। ସୋସିଆଲ ମିଡିଆରେ ଏବେ ଏହି ରାସ୍ତାରେ ଗାଡି ଗୁଡିକର ଲମ୍ବା ଧାଡି ଦେଖାଯାଉଥିବା ଅନେକ ଭିଡିଓ ସାମ୍ନାକୁ ଆସିଛି।
ଯଦିଓ ପର୍ଯ୍ୟଟକଙ୍କ ଆଗମନ ଆତିଥ୍ୟ କ୍ଷେତ୍ର ପାଇଁ ଏକ ଉତ୍ସାହ, କିନ୍ତୁ ଏହାକୁ ପରିଚାଳନା କରିବା ପ୍ରଶାସନ ପାଇଁ ଏକ ଆହ୍ବାନ ସାଜିଛି। ସେହିପରି ନୂଆ ବର୍ଷ ପାଳନ ପାଇଁ ଏହି ସପ୍ତାହରେ ୧ ଲକ୍ଷରୁ ଅଧିକ ଗାଡି ଶିମଲାରେ ପ୍ରବେଶ କରିବ ବୋଲି ଆଶା କରାଯାଉଛି।ଏହି ଭିଡ଼ ଅଞ୍ଚଳର ପରିବେଶ ଉପରେ ମଧ୍ୟ ଏକ ବଡ ପ୍ରଭାବ ପକାଇପାରେ ଯାହା ଭୂସ୍ଖଳନ ଏବଂ ପ୍ରାକୃତିକ ବିପର୍ଯ୍ୟୟର କେନ୍ଦ୍ରବିନ୍ଦୁ ଅଟେ।
