ଜେରୁଜେଲମ,୧୭।୭: ଇରାନ ପରେ ଏବେ ଇସ୍ରାଏଲ ସିରିଆ ବିରୁଦ୍ଧରେ ଯୁଦ୍ଧ ଘୋଷଣା କରିଛି। ଇସ୍ରାଏଲୀ ସେନା ବୁଧବାର (୧୬ ଜୁଲାଇ ୨୦୨୫) ସିରିଆର ରାଜଧାନୀ ଡାମାସ୍କସରେ ପ୍ରତିରକ୍ଷା ମନ୍ତ୍ରଣାଳୟ ମୁଖ୍ୟାଳୟ ଏବଂ ରାଷ୍ଟ୍ରପତି ଭବନ ନିକଟରେ ଡ୍ରୋନ ଆକ୍ରମଣ କରିଛି। ଏହି ଆକ୍ରମଣର ଏକ ଭିଡିଓ ସାମ୍ନାକୁ ଆସିଛି। ଯେତେବେଳେ ଏହି ଆକ୍ରମଣ କରାଯାଇଥିଲା, ସେତେବେଳେ ଜଣେ ଟିଭି ଆଙ୍କର ନିକଟବର୍ତ୍ତୀ ଏକ କୋଠାରେ ସିଧା ପ୍ରସାରଣ କରୁଥିଲେ। ସେହି ସମୟରେ, ଜୋରରେ ବିସ୍ଫୋରଣ ହୋଇଥିଲା, ଯାହା ଯୋଗୁ ସେ ଭୟଭୀତ ହୋଇ ଏଣେତେଣେ ଦୌଡ଼ିବାକୁ ଲାଗିଲେ।
ଇସ୍ରାଏଲୀ ପ୍ରତିରକ୍ଷା ମନ୍ତ୍ରୀ କାଟଜ X ରେ ଏହି ଭିଡିଓ ଶେୟାର କରି ଆକ୍ରମଣକୁ ନିଶ୍ଚିତ କରିଛନ୍ତି। ସେ କହିଛନ୍ତି ଯେ ଡାମାସ୍କସରେ ସିରିଆର ସାମରିକ ମୁଖ୍ୟାଳୟର ପ୍ରବେଶ ଦ୍ୱାରକୁ ଟାର୍ଗେଟ କରାଯାଇଛି। ସୁୱାଇଦାରୁ ପଛକୁ ହଟିଯିବା ପାଇଁ ସିରିଆର ସେନାକୁ ଚେତାବନୀ ଦେବା ପରେ ଇସ୍ରାଏଲୀ ଦ୍ୱାରା ଏହି କାର୍ଯ୍ୟାନୁଷ୍ଠାନ ନିଆଯାଇଛି। ଇସ୍ରାଏଲୀ ପ୍ରତିରକ୍ଷା ମନ୍ତ୍ରୀ କହିଛନ୍ତି, ଏବେ ଆମର ଚେତାବନୀ ଶେଷ ହୋଇଛି। ଏବେ ଆମେ ଡାମାସ୍କସରେ ଭୟଙ୍କର ଆକ୍ରମଣ କରିବୁ। ଇସ୍ରାଏଲୀ ପ୍ରତିରକ୍ଷା ବାହିନୀ (IDF) ସୁୱାଇଦାରେ ଜୋରଦାର କାର୍ଯ୍ୟାନୁଷ୍ଠାନ ଜାରି ରଖିବ।”
ଦକ୍ଷିଣ ସିରିଆର ସୁୱାଇଦାରେ ସ୍ଥାନୀୟ ସୁରକ୍ଷା ବାହିନୀ ଏବଂ ଡ୍ରୁଜ ସମ୍ପ୍ରଦାୟ ମଧ୍ୟରେ ହୋଇଥିବା ସଂଘର୍ଷରେ ଇସ୍ରାଏଲ ସମ୍ପ୍ରତି ହସ୍ତକ୍ଷେପ କରିଛି। ଇସ୍ରାଏଲର ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ IDF ସିରିଆରେ ଡ୍ରୁଜ ସମ୍ପ୍ରଦାୟକୁ ସୁରକ୍ଷା ଦେବ। ଏହା ଲଗାତାର ତୃତୀୟ ଦିନ ଯେ ଇସ୍ରାଏଲ ସିରିଆ ଉପରେ ଆକ୍ରମଣ କରିଛି। ଇସ୍ରାଏଲୀ ପ୍ରତିରକ୍ଷା ମନ୍ତ୍ରୀଙ୍କ ଅନୁଯାୟୀ, ଡ୍ରୁଜ ସମ୍ପ୍ରଦାୟ ଏବଂ ସିରିଆ ସୁରକ୍ଷା ବାହିନୀ ମଧ୍ୟରେ ଯୁଦ୍ଧବିରତି ଭଙ୍ଗ ହେବା ପରେ ଏହି ଆକ୍ରମଣ କରାଯାଇଥିଲା।
