ନୂଆଦିଲ୍ଲୀ: କରୋନା ମହାମାରୀ ଯୋଗୁ ବଜାର ପ୍ରଭାବିତ ହୋଇ ରହିଛି। ଅକ୍ଟୋବରଠାରୁ ପୁଣି ଥରେ ସ୍ଥିତିରେ ସୁଧାର ଆସୁଥିବା ନଜରକୁ ଆସିଛି। ଦେଶର ଅଟୋମୋବାଇଲ କ୍ଷେତ୍ରର ବିକ୍ରି ଟ୍ରାକକୁ ଫେରୁଥିବା ନଜରକୁ ଆସିଛି। ଏମଜି ମୋଟର୍ସ ଇଣ୍ଡିଆ ଯାନର ଖୁଚୁରା ବିକ୍ରି କ୍ଷେତ୍ରରେ ଭଲ ରେକର୍ଡ ହାସଲ କରିଛି। ଚାଇନାର ଏସ୍ଏଆଇସି ମୋଟର୍ସ କର୍ପର ସମ୍ପୂର୍ଣ୍ଣ ସହଯୋଗୀ ଏହି କମ୍ପାନୀର ବିକ୍ରି ୨୮.୫% ବଢିଛି। ସେହିଭଳି ଅଶୋକ ଲେଲାଣ୍ଡର ବିକ୍ରି ନଭେମ୍ବରରେ ୫% ବଢିଥିବା ସୂଚନା ମିଳିଛି। ଟୟୋଟା ମୋଟର୍ସ ୨.୪% ଅଧିକ ଯାନ ବିକ୍ରି କରିବାକୁ ସକ୍ଷମ ହୋଇଛି। ସେହିଭଳି ମାରୁତି ସୁଜୁକି ଇଣ୍ଡିଆ ଲିମିଟେଡର ବିକ୍ରି ୧.୭% ବଢିଥିବା କମ୍ପାନୀ ପକ୍ଷରୁ ସୂଚନା ରହିଛି। ବଜାଜ ଅଟୋର ବିକ୍ରି ନଭେମ୍ବରରେ ୫% ଉର୍ଦ୍ଧ୍ୱରେ ରହିଛି। ଏସ୍କଟର୍ସ ଟ୍ରାକ୍ଟରର ବିକ୍ରିରେ ୩୩% ବୃଦ୍ଧି ଘଟିଥିବା ନଜରକୁ ଆସିଛି। ସୂଚନା ଯୋଗ୍ୟ, କରୋନା ଯୋଗୁ ବଜାର ପ୍ରଭାବିତ ରହିବା କାରଣରୁ ଗାଡି ବିକ୍ରି ପ୍ରଭାବିତ ସ୍ଥିତିରେ ରହିଥିଲା। ବିଭିନ୍ନ ବର୍ଗର ବିକ୍ରି ପ୍ରଭାବିତ ରହିଥିଲା। ହେଲେ ଏଥିରେ ବର୍ତ୍ତମାନ ପରିବର୍ତ୍ତନ ଦେଖାଯାଉଛି।
